«قازمۇنايگاز» ۇك اق باسقارما توراعاسى ماعزۇم مىرزاعاليەۆ ماۋسىمنىڭ 30-ى كۇنى ماسكەۋ قالاسىندا «ترانسنەفت» جاق پرەزيدەنتى نيكولاي توكارەۆپەن كەزدەستى. تاراپتار كاسپي قۇبىر جەلىسى كونسورتسيۋمىنىڭ (كقك) قازاقستاندىق مۇنايدى تاسىمالداۋ جونىندەگى قىزمەتتىڭ وزەكتى ماسەلەلەرىن تالقىلادى. قازاقستان مەن رەسەي اراسىنداعى ستراتەگيالىق سەرىكتەستىك ءۇشىن كقك جوباسىنىڭ ماڭىزدىلىعىنا دا توقتالدى. م.مىرزاعاليەۆ «ترانسنەفت» كومپانياسى قازاقستاندىق مۇنايدى تاسىمالداۋ مەن ءترانزيتى سالاسىنداعى قمگ-نىڭ ۇزاق مەرزىمدى جانە سەنىمدى سەرىكتەسى ەكەنىن اتاپ ءوتتى.
كەزدەسۋدە ءبىرىنشى جانە ەكىنشى جىلجىمالى ايلاق قۇرىلعىلارى ماڭايىن جارىلعىش زاتتاردان تازارتۋ بويىنشا ءجۇرىپ جاتقان جۇمىستارعا بايلانىستى كقك تەڭىز تەرمينالىنداعى قازىرگى جاعدايىنا ايرىقشا دەن قويىلدى.
ءبىرىنشى جانە ەكىنشى جىلجىمالى ايلاق قۇرىلعىلارى اكۆاتورياسىندا سۋ استىنداعى قاۋىپتى زاتتاردى جەتە تەكسەرۋ جانە كادەگە جاراتۋ جۇمىستارىن رەسەيدىڭ توتەنشە جاعدايلار مينيسترلىگى وسى جىلدىڭ 15 ماۋسىمنان بەرى جۇرگىزىپ كەلەدى. ءۇشىنشى جىلجىمالى ايلاق قالىپتى جۇمىس ىستەپ تۇر. باستاپقىدا مينالاردان تازارتۋ جۇمىستارىن ماۋسىمنىڭ 25-نە دەيىن اياقتاۋ جوسپارلانعان ەدى. بىراق اۋا-رايىنىڭ قولايسىزدىعىنا بايلانىستى وسى جىلدىڭ 5-ءشى شىلدەسىنە دەيىن ۇزارتىلدى.
كەزدەسۋ بارىسىندا تاراپتارعا ەكىنشى جىلجىمالى ايماق ماڭايىندا ميناسىزداندىرۋ جۇمىستارى اياقتالۋعا جاقىن ەكەندىگى, شىلدەنىڭ 1-نەن باستاپ مۇناي قۇبىرى ەكى ايلاق ارقىلى جۇمىس ىستەيتىنى ايتىلدى. ءبىرىنشى جىلجىمالى ايماق اكۆاتورياسىنداعى قاۋىپتى زاتتاردى ىزدەۋ جۇمىستارى 2022 جىلدىڭ 5 شىلدەسىنە دەيىن اياقتالادى دەپ جوسپارلانۋدا.
قمگ مەن «ترانسنەفت» جاق باسشىلارى وسى جاعدايلارعا قاراماستان, كقك قازاقستاندىق مۇنايدى جۇك بەرۋشىلەردىڭ كەستەسىنە ساي كىدىرىسسىز جونەلتىپ جاتقاندىعىن اتاپ ءوتتى.
ءبىرىنشى جانە ەكىنشى جىلجىمالى ايلاق قۇرىلعىلارى ماڭايىن جارىلعىش زاتتاردان تازارتۋ جۇمىستارىنىڭ بارىسى جايلى پىكىر الماسقاننان كەيىن م.مىرزاعاليەۆ پەن ن.توكارەۆ جۇمىستار ۋاقىتىلى اياقتالاتىنىنا سەنىم ءبىلدىردى. سونىمەن قاتار ءۇش ايلاقتىڭ دا تۇراقتى جۇمىس ىستەپ تۇرۋىنىڭ ماڭىزدىلىعىنا توقتالدى.
قمگ مەن «ترانسنەفت» جاق باسشىلارى بىرلەسكەن قىزمەتتىڭ بارلىق اسپەكتىلەرى بويىنشا ەكى كومپانيا اراسىنداعى قاتىناستار ديناميكاسىنا وڭ باعا بەردى جانە تاراپتار ىنتىماقتاستىعى ءوزارا تۇسىنىستىك جانە سەرىكتەستىككە نەگىزدەلەتىنىن مالىمدەدى.
