كەشەگىنى ۇمىتپاي, ۇنەمى ەسكە الىپ وتىرساق, بۇگىنگىنى باعالاپ, الداعىنى ارداق تۇتارىمىز انىق. ءارى ءبىز ءۇشىن ەڭ باستى ماقسات تىنىشتىق, تۇراقتىلىق, تاتۋلىق دەسەك, اينالامىزدا بولىپ جاتقان وقيعالاردى ءجىتى قاداعالاپ, ءتيىستى وي ءتۇيىپ وتىرۋىمىز ماڭىزدى.
بۇل رەتتە قىتاي استاناسى بەيجىڭدە وتكەن «ءبىر بەلدەۋ, ءبىر جول» حالىقارالىق ىنتىماقتاستىق فورۋمىن سوڭعى اپتانىڭ ءىرى وقيعاسى رەتىندە قابىلداعان ءجون. 29 مەملەكەتتىڭ باسشىسى قاتىسقان مارتەبەلى جيىن الپاۋىت مەملەكەتتەردىڭ قازىرگى تەكەتىرەس جاعدايىندا حالىقارالىق احۋالدى جاقسارتۋعا يگى اسەر ەتەدى دەپ كۇتىلۋدە. ماسەلەن, قىتاي باسشىسى سي تسزينپين ەۋرازيادا ەجەلگى جىبەك جولىن جاڭا, زاماناۋي فورماتتا قايتا جانداندىرۋ يدەياسى الەمدە بەلەڭ الىپ كەلە جاتقان ساياسي, ەكونوميكالىق, گۋمانيتارلىق داعدارىستارعا بەرىلگەن ۋاقىتىلى جاۋاپ دەسە, پرەزيدەنت ن.ءا.نازارباەۆ «ءبىر بەلدەۋ, ءبىر جول» باستاماسى جاڭا ەكونوميكالىق پاراديگما قالىپتاستىرۋعا مۇمكىندىك بەرەتىنىن ءارى ونىڭ تابىستى ىسكە اسۋى 4,4 ميلليارد ادام تۇرعىندى قامتيتىن ەلدەرگە پايدا اكەلەتىنىن, قازاقستاننىڭ قۇرلىق ەلدەرى اراسىنداعى تاتۋ كورشىلىك قاتىناستاردى نىعايتۋدى بەلسەندى تۇردە جاقتايتىنىن ەرەكشەاتاپ ءوتتى. وسى ماقساتتا ەلباسى بىرقاتار مەملەكەتتەردىڭ كوشباسشىلارىمەن كەزدەسۋ وتكىزدى. رەسەي پرەزيدەنتى پۋتينمەن جانە تۇرىك رەسپۋبليكاسىنىڭ پرەزيدەنتى
ەردوعانمەن اڭگىمەلەسىپ, تاياۋدا استانادا وتكەن سيريا جونىندەگى كەلىسسوزدەردىڭ قورىتىندىلارى ءسوز بولدى. تايپ ەردوعان استانا پروتسەسىنىڭ ناتيجەلەرىنە توقتالا كەلە, سيريا ماسەلەلەرى جونىندەگى ديالوگتى جەنەۆادا جالعاستىرۋ ءۇشىن ونىڭ ماڭىزدى بولعانىن اتاپ ءوتتى.
ن.نازارباەۆ, سونداي-اق, بۇۇ باس حاتشىسى انتونيۋ گۋتتەريشپەن اڭگىمەلەستى. اڭگىمە بارىسىندا ول شانحاي ىنتىماقتاستىق ۇيىمىنىڭ استانادا وتەتىن سامميتىنە قاتىسۋ نيەتى بار ەكەنىن راستادى.
الەم دونالد ترامپتىڭ اقش پرەزيدەنتى رەتىندەگى 100 كۇنى وتكەن سوڭ باستاعان شەتەلگە العاشقى ساپارىنا نازار اۋدارۋدا. ساپار بارىسىندا ول ساۋد ارابياسىنا, يزرايلگە, ۆاتيكانعا سوعادى. كەزدەسۋلەر تاياۋ شىعىستاعى اق ءۇيدىڭ ۇستانىمىنا ەلەۋلى وزگەرىستەر ەنگىزىپ, حالىقارالىق ىنتىماقتاستىقتى نىعايتۋعا باعىتتايدى دەگەن ءۇمىت ۇيالاتادى. تاياۋدا وتكەن يناۋگۋراتسيادان سوڭ فرانتسيانىڭ رەسمي پرەزيدەنتى قىزمەتىنە كىرىسكەن ەممانۋەل ماكرون كەزىندە اسكەري بورىشىن وتەمەگەندىكتەن, بەسىنشى رەسپۋبليكا تاريحىندا العاش رەت اسكەري تاجىريبەسى جوق ءبىرىنشى باس قولباسشى بولىپ وتىر, ال بۇل جايت بيىل 40 جاسقا تولاتىن جاڭا پرەزيدەنتتىڭ جاڭاشا ساياساتى دا بەيبىت باستامالارعا عانا جول اشادى دەپ ايتۋعا نەگىز بولا الاتىنداي.
دەگەنمەن حالىقارالىق قارىم-قاتىناستا ىزعاردىڭ بەتى ءالى قايتار ەمەس.
14 مامىر كۇنى پحەنيان «حۆانسون-12» بالليستيكالىق راكەتاسىن ۇشىرىپ, وسى ەلدىڭ باسشىسى كيم چەن ىن «اقش پەن ونىڭ جاقتاستارى سولتۇستىك كورەياعا قاتىستى دۇرىس تاڭداۋ جاساماسا, سىناق ودان ءارى جالعاسا بەرەتىنىن» ءمالىم ەتتى. ال بەيتاراپ ساياسات ۇستاناتىن فينليانديا سولتۇستىك اتلانتيكا اليانسىنا كىرۋگە شەشىم قابىلداعانىن حابارلادى. بۇعان ەۋرووداقتىڭ ەڭ مىقتى ءارى باي ەلدەرىنىڭ ءبىرى سانالاتىن اۆستريادا ۇكىمەت داعدارىسى ورىن العانىن قوسىڭىز.
كەنجەبولات جولدىباي,
ساياساتتانۋشى
