استاناداعى رۇقسات ەتىلمەگەن قوقىس ۇيىندىلەرىنەن 29 مىڭ توننا قوقىس شىعارىلدى, دەپ حابارلايدى astana-akshamy.kz
استانادا جاڭا ماۋسىم باستالىسىمەن رۇقسات ەتىلمەگەن قوقىس ۇيىندىلەرىن جويۋ جانە ورىنسىز جەرلەردە قوقىس توگەتىندەردى جاۋاپكەرشىلىككە تارتۋ بويىنشا تۇراقتى نەگىزدە بەلسەندى جۇمىس جۇرگىزىلۋدە. ستيحيالىق پوليگونداردى جويۋعا تيەگىشتەر, ساموسۆالدار جانە باسقا دا ارنايى تەحنيكا قاتىسادى. وسى جىلدىڭ ءساۋىر ايىندا رۇقسات ەتىلمەگەن ورىنداردان 29 مىڭ تونناعا جۋىق قوقىس شىعارىلدى.
مىسالى, نۇرا اۋدانىندا 20-دان استام رۇقسات ەتىلمەگەن قوقىس ورىندارى جويىلدى (ە-128 كوشەسى, زاپادنىي ساياجاي اۋماعى, ش.شوقين كوشەسى, 6, قورعالجىن تاس جولى, ۇلى دالا داڭعىلى, ايتماتوۆ كوشەسى, ۇركەر, حۋسەين بەن تالال كوشەسى جانە ت. ب.). وسى ورىنداردان 27 مىڭ 300 تونناعا جۋىق قۇرىلىس قوقىسى شىعارىلدى.
سارىارقا اۋدانى كوكتال كوشەسىندە رۇقسات ەتىلمەگەن قوقىس ءۇيىندىسى انىقتالدى. وسى جەردەن 600 توننادان استام قوقىس شىعارىلدى. سونداي-اق, الماتى اۋدانى قالداياقوۆ كوشەسىنەن, شارباقتى كوشەسىنەن جانە ت. ب. 1 مىڭ توننادان استام قوقىس تازارتىلدى.
ايتا كەتەيىك, الاش تاس جولىنىڭ بويىندا ورنالاسقان ەلوردانىڭ ەكوپوليگونىنا عانا ءىرى كولەمدى, قۇرىلىس قوقىس تۇرلەرىن شىعارۋعا رۇقسات ەتىلگەن. اباتتاندىرۋ ەرەجەلەرىن بۇزعانى ءۇشىن قر اقبتك 505-بابى بويىنشا اكىمشىلىك ايىپپۇلدار كوزدەلگەن. سونىمەن قاتار جەكە تۇلعالار ءۇشىن 20 اەك, ال كاسىپكەرلەر ءۇشىن 30-دان 100 اەك مولشەرىندە ايىپپۇل قاراستىرىلعان.
2023 جىلى 224 ۋچاسكەدە رۇقسات ەتىلمەگەن پوليگوندار جويىلدى. قالالىق پوليتسيا دەپارتامەنتى قوقىستاردى زاڭسىز شىعارعانى, جالپى اۋماقتاردى لاستاعانى جانە ارنايى بولىنگەن ورىنداردان تىس اعىندى سۋلاردى اعىزعانى ءۇشىن 30 000-نان استام قۇقىق بۇزۋشىعا ايىپپۇل سالدى.
زاڭسىز پوليگونداردى جويۋ جۇمىستارى جالعاسۋدا. ونىڭ ىشىندە جاڭا وشاقتاردىڭ پايدا بولۋىنا جول بەرمەۋ بويىنشا شارالار قابىلدانۋدا.
سونداي-اق, ەلوردادا اۋقىمدى ەكولوگيالىق اكتسيا جالعاسۋدا. ونىڭ شەڭبەرىندە رۇقسات ەتىلمەگەن قوقىس ۇيىندىلەرىن جويۋ, قالانى سانيتارلىق تازارتۋ, نوسەر جانە ارىق كارىز جەلىلەرىن تازارتۋ, كوشەلەردى, تروتۋارلاردى, ورامىشىلىك اۋماقتاردى, قوعامدىق كەڭىستىكتەر مەن اۋلالاردى جيناۋ جۇمىستارى جۇرگىزىلۋدە. سونداي-اق, جاسىل جەلەكتەردى كۇتىپ-باپتاۋ جانە وتىرعىزۋ, ساۋدا نىساندارىنا ىرگەلەس اۋماقتاردى جيناۋ جانە ت. ب. بويىنشا ماۋسىمدىق اگروتەحنيكالىق جۇمىستار جۇرگىزىلۋدە.
