قازاقتا «جاقسىنىڭ جاقسىلىعىن ايت, نۇرى تاسىسىن» دەيتىن اتالى ءسوز بار. سونداي جاقسى سوزگە جارايتىن جانداردىڭ ءبىرى نۇر-سۇلتان قالاسىنىڭ تۇرعىنى بولات جاناتايۇلى تەمىرباەۆ دەسەك ارتىق ايتقانىمىز ەمەس
زەيىندى زەينەتكەر, بۇرىن رەسەيدە تۇرعان, بارلىق ەڭبەك جولىن اۋىل شارۋاشىلىعىنا ارناعان بولات جاناتايۇلى قۇرمەتتى ەڭبەك دەمالىسىنا شىققان سوڭ اتامەكەنگە ورالۋعا شەشىم قابىلداپ, قازاقستان ەلورداسىندا تۇرىپ جاتقان بالالارىنىڭ جانىنا كەلدى. نەگىزگى جۇمىسىمەن قاتار قوعامدىق شارالارعا بەلسەنە ارالاساتىن زەينەتكەر ەلورداعا كەلگەن سوڭ دا دامىل تاۋىپ وتىرا المادى. رەسپۋبليكالىق ارداگەرلەر كەڭەسىنە بارىپ, جەرگىلىكتى ارداگەرلەرمەن ارالاسىپ, قوعامدىق شارالارعا قاتىسىپ جۇرەدى. سودان ۇيىم باسشىلىعى بەلسەندى زەينەتكەردى اقمولا وبلىسىنىڭ تسەلينوگراد اۋداندىق ارداگەرلەر كەڭەسىنىڭ توراعاسى بولۋعا ۇسىنىس بىلدىرەدى. مىنە, سول 2014 جىلدان بەرى بولات جاناتايۇلى ەلوردا مەن اۋدان ارداگەرلەرى, زەينەتكەرلەرىنىڭ ىستىق ءىلتيپاتىنا بولەنىپ ءجۇر.
رەسپۋبليكالىق جانە ەلوردالىق ۇيىمداردىڭ بەلسەندىلەرىمەن بىرلەسىپ, ۇلى وتان سوعىسىنا قاتىسقان اقمولالىق جاۋىنگەرلەردىڭ ەسىمىن انىقتاۋعا كوپ ەڭبەك ءسىڭىردى. ەكى مارتە كەڭەس وداعىنىڭ باتىرى اتاعىن العان تالعات بيگەلدينوۆتىڭ اتىن ماڭگىلىككە قالدىرۋ ءۇشىن نۇر-سۇلتان قالاسىنداعى №1 مەكتەپ-ليتسەيگە باتىردىڭ ەسىمىن بەرگىزۋگە اتسالىستى. سونداي-اق نۇر-سۇلتان قالاسىنىڭ ىرگەسىندەگى تالعات بيگەلدينوۆتىڭ كىندىك قانى تامعان قىزىلسۋات اۋىلىنداعى مەكتەپكە دە باتىردىڭ اتىن بەرۋ جونىندە باستاما كوتەرىپ, بۇل ماقساتىنا دا جەتتى.
رەيحستاگقا تۋ تىككەن راقىمجان قوشقارباەۆ جايلى دا كوپ مالىمەت جينادى. اۋدان كولەمىندە جۇرگىزىلەتىن تازالىق جۇمىستارىنا مەيلىنشە كوڭىل ءبولدى. اعاش ءوسىرۋ باستاماسىن قولداپ, ءوزى باستاپ وسى جۇمىسقا جاستاردىڭ قاتىسۋىنا ىقپال ەتتى. زەينەتكەرلەرگە, جالعىزىلىكتى انالارعا اسا كوڭىل ءبولىپ, ولاردىڭ الەۋمەتتىك ماسەلەلەرىن جەڭىلدەتۋگە بايلانىستى جۇمىستاردى جۇرگىزۋگە ۇيىتقى بولا ءبىلدى. قوسشى قالاسىنداعى №1 مەكتەپكە حالىق قاھارمانى راقىمجان قوشقارباەۆتىڭ ەسىمىن بەرگىزۋگە ەڭبەك ءسىڭىردى. ۇلى وتان سوعىسى ارداگەرلەرىنە ارنالعان ەسكەرتكىشتى اباتتاندىرۋدى ۇيىمداستىردى. 2021 جىلى 30 ساۋىردە باتىردىڭ رەيحستاگقا تىككەن تۋىن حالىق الدىنا شىعارىپ كورسەتتى. بۇل تۋدى رەسەي جەرىنەن اكەلۋگە ءوزى اتسالىسقان بولاتىن. زەينەتكەرلەر, مۇگەدەكتەر, كوپبالالى انالاردىڭ قالا ماڭىنداعى اۆتوكولىكتەردە, سونداي-اق مادەنيەتتى ءىس-شارالارعا تەگىن قاتىسۋىنا كومەكتەستى.
2017 جىلى سوعىستا حابارسىز كەتكەن ب.تاجىباەۆتىڭ مۇردەسىن تۋعان جەرى جالعىزقۇدىق اۋىلىنا اكەلىپ, جەرلەۋگە اتسالىستى. قازىر دە رەسەيلىك اسكەري ارحيۆ مەكەمەلەرىمەن تىكەلەي بايلانىسىپ, حابارسىز كەتكەن 300 مىڭنان استام جاۋىنگەردى ىزدەۋ جۇمىسىن جۇرگىزۋدە.
قاجىمۇقان مۇڭايتپاسوۆتىڭ 150 جىلدىق مەرەيتويىندا اتاقتى بالۋاننىڭ اناسىنىڭ باسىنا تاس كوتەرىپ, ەستەلىك قالدىردى. قازاق جەرىنىڭ تۇتاستىعىن ساقتاپ قالعان جۇمابەك تاشەنوۆتىڭ ەسىمىن ماڭگى حالىقتىڭ ەسىندە قالدىرۋ ءۇشىن تالماي ەڭبەكتەندى, قۇجاتتارىن ىزدەستىردى. كوپشىلىكپەن جۇرگىزىلگەن سونداي جۇمىستاردىڭ ناتيجەسىندە نۇر-سۇلتان قالاسىنداعى №10 مەكتەپكە جۇمابەك تاشەنوۆ ەسىمى بەرىلدى, كەيىننەن ەسكەرتكىشى بوي كوتەردى.
زەينەتكەرلەردىڭ رۋحاني بايلىعىن كوبەيتۋگە كومەكتەستى. استانا قالاسى زەينەتكەرلەرىنە مادەني ورتالىقتارعا شاقىرۋ بيلەتىن تاراتىپ, ءىس-شارالار جۇرگىزدى. سونىمەن قاتار 2019 جىلدان باستاپ «زامانداستار» حورىن قۇرۋعا باستاماشى بولىپ, بۇگىنگى تاڭدا بۇل ونەر ۇجىمى رەسپۋبليكالىق جانە ەلوردادا ءوتىپ تۇراتىن مادەني ءىس-شارالارعا تۇراقتى قاتىسادى. كەزىندە ەڭبەگىمەن ەلەنگەن زەينەتكەرلەردى ءتۇرلى مەملەكەتتىك جانە قوعامدىق ناگرادالارعا ۇسىنىپ, ولاردىڭ مەرەيىن وسىرۋگە بەلسەندى كومەكتەستى.
بولات جاناتايۇلى ءوزى دە ماراپاتتان كەندە بولعان جوق. كەۋدەسىندە جارقىراعان «ەڭبەك ارداگەرى», «قازاقستان رەسپۋبليكاسى تاۋەلسىزدىگىنە 30 جىل», «راقىمجان قوشقارباەۆ اتىنداعى مەدال», «التىن قىران» مەدالدارى جانە باسقا دا ناگرادالارى سول ەسىل ەڭبەگى مەن قوعامدىق ومىردەگى جەتىستىگىن ايقىندايدى.
جاقسىلىق وتەشەۆ, ارداگەرلەر كەڭەسى تورالقاسىنىڭ مۇشەسى
