ەلوردالىق اتا-اجەلەر «قارتتار كۇنىن» كوڭىلدى فلەش-موب بيلەۋدەن باستادى. «جاستار» سارايىندا وتكەن مەرەكەلىك شاراعا قالانىڭ 300-گە جۋىق زەينەتكەرى قاتىستى.
«ارداگەرلەر سالاۋاتتى ءومىر سالتىن قولدايدى» تاقىرىبىنداعى فلەشموب قيمىلدارىن قاريالارمەن بىرگە وقۋشىلار مەن ستۋدەنت جاستار بىرگە جاسادى. بۇل شاراعا ۇيىتقى بولعان قالالىق ارداگەرلەر كەڭەسى مەن, الماتى, سارىارقا, ەسىل اۋداندارىنىڭ ارداگەرلەر كەڭەسى. سونىمەن بىرگە قارتتار كۇنىندەگى سپورتتىق شاراعا مادەنيەت, مۇراعاتتار جانە قۇجاتتاما باسقارماسى مەن دەنەشىنىقتىرۋ جانە سپورت باسقارماسى قولداۋ كورسەتكەن.
«وسكەلەڭ ۇرپاققا ۇلگى بولۋ ماقساتىندا يگى شارانى ەكىنشى جىل قاتارىنان وتكىزىپ كەلەمىز. سپورتپەن شۇعىلدانۋعا ەشقاشان كەش ەمەس. ارداگەرلەرىمىزدىڭ زەرىگىپ, بوس وتىراتىن ۋاقىتى دا جوق. شاحمات وينايدى, قىستا شاڭعىمەن جارىسادى, ارامىزدا سپورت شەبەرلەرى دە بارشىلىق. جاستايىنان سالاۋاتتى ومىرگە بەيىم بولسا, قارتايعاندا دا بەلسەندى قالپىندا سەرگەك جۇرمەك» دەيدى قالالىق ارداگەرلەر كەڭەسى توراعاسىنىڭ ورىنباسارى ەسبولات دۇيسەنوۆ.
شىنىمەن دە جاستارعا سەكىلدى جاسامىستارعا دا دەنەشىنىقتىرۋ تاڭسىق ەمەس. قۇربى-قۇرداس ەكى-ءۇش اجەنى سوزگە تارتقانىمىزدا ولار بىزگە فيتنەسكە باراتىندىقتارىن ايتتى. «بۇگىنگى فلەش-موب جالعاسىن تابۋى ءتيىس جاقسى باستاما. زامانداستارىمىزدىڭ اراسىندا قارتايعاندا جۇگىرىپ, جاتتىعۋ جاساۋعا ۇيالىپ, نە بولماسا ءبىر جەرىمدى اۋىرتىپ الام دەپ قورقاتىندار بار. ەندى سول كوزقاراستارى وزگەرگەن شىعار. بۇل ءبىر سەرىگۋ عوي. ونى ەندى كۇندەلىكتى ادەتكە اينالدىرۋ كەرەك. ماسەلەن ءوزىمنىڭ فيتنەسكە قاتىسىپ جۇرگەنىمە بيىل مىنە ءۇش جىل» دەيدى ءوزىن نينا يۆانوۆنا دەپ تانىستىرعان سۇيكىمدى اجەي.
اتاپ وتەيىك, قارتتار كۇنىندەگى مەرەكەلىك باعدارلامالار بۇگىن استانادا كۇنى بويى جالعاسادى.
مادينا جاقىپ
