ەۋروپالىق فۋتبول قاۋىمداستىقتارى وداعى (ۋەفا) وتكەن جىلدىڭ اياعىندا استانادا سالىناتىن جابىق فۋتبول الاڭى قۇرىلىسىن قارجىلاندىرۋ تۋرالى شەشىم قابىلداعانى بەلگىلى. الايدا, ونىڭ قاي جەردە ورنالاساتىنى وسى ۋاقىتقا دەيىن ايتىلماعان ەدى. جاقىندا قازاقستاننىڭ فۋتبول فەدەراتسياسى جاڭا الاڭنىڭ باۋىرجان مومىشۇلى داڭعىلىندا ورنالاسقان وقۋشىلار سارايى جانىنان بوي كوتەرەتىنىن حابارلادى.
استانا قالاسى اكىمدىگى وسى اۋماقتان ارنايى جەر ۋچاسكەسىن بولگەن. ال ۋەفا الاڭنىڭ قۇرىلىسىنا 3,5 ميلليون ەۆرو ءبولۋ جونىندە شەشىم قابىلداعان. قازاقستان فۋتبول فەدەراتسياسىنىڭ توراعاسى ەرلان قوجاعاپانوۆتىڭ ايتۋىنشا, جابىق الاڭنىڭ العاشقى كىرپىشىن فيفا-نىڭ جاڭا پرەزيدەنتى دجانني ينفانتينو كەلىپ قالاۋى ءتيىس ەكەن. قازىرگى ۋاقىتتا ۋەفا مەن قازاقستان فۋتبول فەدەراتسياسى اراسىندا كەلىسىمشارتتاردى پىسىقتاۋ شارالارى ءجۇرىپ جاتسا كەرەك. ودان سوڭ, قۇرىلىستى جۇرگىزەتىن مەردىگەر كومپانيا انىقتالادى. وسى ارالىقتا, ياعني, الداعى ءساۋىر ايىنىڭ باسىنا دەيىن كوپتەن كۇتكەن مارتەبەلى مەيمان د.ينفانتينو دا كەلمەك.
بولاشاق جابىق فۋتبول الاڭى استانانىڭ ەڭ قولايلى جەرىندە ورنالاسپاقشى. قالانىڭ ەكى جاعالاۋىنان دا وعان قاتىناۋ ىڭعايلى. جوبانى جۇزەگە اسىرۋعا ۋەفا «حەت-تريك» باعدارلاماسى اياسىندا قارجىلىق قولداۋ كورسەتەدى. استانا قالاسى اكىمدىگى دە ءوز تاراپىنان قارجىلىق جانە باسقا دا كومەكتەر جاسايتىن بولادى. جوسپار بويىنشا جابىق الاڭ جىل اياعىنا دەيىن پايدالانۋعا بەرىلمەك.
مەڭدوللا نۇرىمۇلى
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
