نۇر-سۇلتان قالاسىندا ارنايى مامانداندىرىلعان «جاس سارباز» سىنىپتارىنىڭ تاربيەلەنۋشىلەرى اراسىندا «جايدارلى جاس سارباز» جايدارمان ويىندارى ءوتتى.
جاستار جىلى اياسىندا قازاقستان حالقى بىرلىگى كۇنىنە وراي جاسوسپىرىمدەردى ونەرگە باۋلۋ, ونەرلى جاس ساربازداردىڭ ارتىقشىلىقتارىن كورنەكىلەندىرۋ ماقساتىندا وتكىزىلگەن بۇل شارانى «جاس سارباز» جاسوسپىرىمدەر اسكەري-پاتريوتتىق قوزعالىسى رەسپۋبليكالىق قوعامدىق بىرلەستىگىنىڭ نۇر-سۇلتان قالالىق فيليالى ۇيىمداستىردى.
فيليال باسشىسى اسحات باعداتۇلىنىڭ ايتۋىنشا, سايىسقا قاتىسۋعا 30-دان اسا كوماندا ءوتىنىش بىلدىرگەن. ىرىكتەۋدەن كەيىن ەڭ ۇزدىك 10 كوماندا اقتىق جارىسقا جولداما الىپتى. جارىس وتە تارتىمدى, قىزىقتى ءوتتى. ويىن سوڭىندا جەڭىمپاز كوماندالار انىقتالدى. باس جۇلدە №42 مەكتەپ وقۋشىلارىنان جاساقتالعان «سۇيكىمدىلەر» كومانداسىنا بەرىلدى.
«جاس سارباز» جاسوسپىرىمدەر اسكەري-پاتريوتتىق قوزعالىسى رەسپۋبليكالىق قوعامدىق بىرلەستىگىنىڭ مۇشەلەرى, قالالىق «جايدارمان ويىندارى» ۇيىمىنىڭ جەتەكشىلەرى, ەلىمىزگە
تانىمال ءازىل-وسپاقشىلار شاراعا قاتىستى.
