جالدامالى پاتەرگە ءوتىنىمدى 29 جاسقا دەيىنگى جۇمىس ىستەيتىن جاستار بەرە الادى. وتىنىمدەر 5 قاراشادان باستاپ 10 قاراشاعا دەيىن قابىلدانادى. پاتەردىڭ اي سايىنعى تولەمى ءۇيدىڭ جالپى اۋدانىنىڭ كولەمىنە بايلانىستى 5 مىڭنان 15 مىڭ تەڭگە ارالىعىندا بولادى.
«ازاماتتارعا ىڭعايلى بولۋ ءۇشىن وسى باعدارلامانى ەلەكتروندى تۇردە جۇرگىزۋدى ءجون كوردىك. ءوتىنىم Smart Astana پورتالى ارقىلى ەلەكتروندى تۇردە قابىلدانادى. جالدامالى ۇيدەن ءۇمىتتى بولساڭىز, Smart Astana پورتالىندا ەتسق ارقىلى ونلاين رەجىمدە ءوتىنىش جىبەرە الاسىز. ءوتىنىش بەرگەننەن كەيىن ءبىز ونى وڭدەيمىز. وڭدەۋ ۋاقىتى بىرنەشە كۇندى الادى. وسىدان كەيىن ءوتىنىم بەرۋدەگى كەمشىلىكتەردى جويۋ ءۇشىن ايتپەسە ءسىز تىزىمدە ءبىر نارسەنى ۇمىت قالدىرساڭىز نەمەسە ناقتى مارتەبەڭىزدى, دەرەكتەردى ناقتىلاعىڭىز كەلسە, ءار ۇمىتكەرگە قۇجاتتاردى تولىقتىرۋعا ءبىر كۇن بەرەمىز. سونداي-اق ول دا ەلەكتروندى تارتىپتە جۇرگىزىلەدى» دەدى ەلوردا اكىمدىگىندە وتكەن بريفينگتە نۇر-سۇلتان قالاسى اكىمدىگىنىڭ تۇرعىن ءۇي قورىنىڭ ديرەكتورى نۇرسۇلۋ قوجاحمەتوۆا.
ىرىكتەۋدەن وتكەن جاستاردىڭ ءتىزىمى 2019 جىلدىڭ 10 جەلتوقسانىنان كەشىكتىرلمەي جاريالانادى. سونداي-اق جالدامالى پاتەرگە ىلىككەن جاستار بيىل جىل سوڭىنا دەيىن قونىس تويىن تويلايتىن بولادى. «ءار وتباسىنىڭ قۇرامى ءارتۇرلى, سوندىقتان مارتەبەسى دە ارقالاي بولماق. كوپبالالى بولساڭىز دا, ءۇش بولمەلى پاتەردىڭ بەرىلمەيتىنىن, تەك ءبىر جانە ەكى بولمەلىلەر تاراتىلاتىنى ەسكەرۋ كەرەك. تۇرعىن ءۇي ساتىپ الۋ, ۇزارتۋ قۇقىعىنسىز بەس جىلعا بەرىلەدى. ياعني, بەس جىلدان كەيىن ءبىز سىزدەن وسى تۇرعىن ءۇيدى بوساتۋدى سۇراۋعا ءماجبۇر بولامىز, ويتكەنى ءبىز بۇل پاتەرلەردى باسقا جاستارعا بەرەمىز» دەپ قوستى تۇرعىن ءۇي قورىنىڭ ديرەكتورى.
بەلگىلى بولعانداي, جالعا بەرىلەتىن تۇرعىن ۇيلەر ش.ءۋاليحانوۆ – س.سەيفۋللين كوشەسىنىڭ قيىلىسىندا («استانالىق» بازارىنىڭ ماڭايى), بوگەنباي باتىر مەن ءا.جانگەلدين كوشەلەرىنەن بەرىلەدى. ءبىر بولمەلى پاتەر اۋدانى 30-45 شارشى مەتر بولسا, ەكى بولمەلى پاتەر 46-70 شارشى مەتردى قۇرايدى.
