ۇلىستىڭ ۇلى كۇنى – ءاز ناۋرىز مەرەكەسى قارساڭىندا «قازاقستان» ۇلتتىق ارناسى قايىرلى ءىس جاساپ, «قازاقستان» كونتسەرت زالىندا تاعدىردىڭ تاۋقىمەتىنە ۇشىراعان جاندارعا كومەك بەرۋ ماقساتىندا ەفيرگە جول تارتقان «جان جىلۋى» باعدارلاماسىنىڭ 5 جىلدىعىن باعدارلاما كەيىپكەرلەرىمەن بىرگە اتاپ ءوتتى.
وسى ۋاقىت ارالىعىندا باعدارلامانىڭ سەپ بولۋىمەن 20 جەتىم بالا وتباسىلى بولدى, 13 بالا شەتەلدە ەم الىپ, امان-ەسەن ەلگە ورالدى, باسپانالى بولۋدى ارمانداپ جۇرگەن سەگىز وتباسى ارماندارىنا قول جەتكىزدى. قايىرىمدىلىق كونتسەرتىندە «جان جىلۋى» شۋاق سىيلاعان باعدارلامانىڭ بىرقاتار كەيىپكەرى كەلىپ, جاعدايلارىنىڭ وڭالۋىنا جاردەم بەرگەن جاندارعا شەكسىز العىستارىن جەتكىزدى. كورەرمەندەردىڭ نازارىنا جۇرەگى بار ادامدى بەي-جاي قالدىرمايتىن بەينەكورىنىستەر ۇسىنىلدى. كونتسەرتكە جينالعاندار ول كادرلار ارقىلى توعىز تاعدىردىڭ كەشەگى الماعايىپ كۇندەرىنەن حابار الدى.
ديدار قايىپوۆ ەسىمدى ازامات تەپسە تەمىر ۇزەتىن شاعىندا قايعىلى جاعدايعا تاپ بولدى. جۇمىسىندا جۇرگەندە دەنەسىنىڭ 80 پايىزىن كۇيىك شالعان ونىڭ ءومىرىن دارىگەرلەر امان الىپ قالسا دا, ءبىر اياعىن كەسىپ تاستاۋعا ءماجبۇر بولىپتى. سودان اۋرۋحانادا جاتقان ازاماتتىڭ بار ارمانى اياققا تۇرىپ كەتۋ ەدى. «جان جىلۋى» باعدارلاماسىندا ول تۋرالى سيۋجەت كورگەن جۇرت شاما-شارقىنشا كومەك قولىن سوزىپتى. مايرا ءىلياسوۆا باستاعان انشىلەر قايىرىمدىلىق كونتسەرتىن وتكىزدى. سونىڭ ناتيجەسىندە ديدارعا پروتەز سالىنىپ, ول بۇرىنعىداي جۇگىرىپ كەتپەسە دە, ەكى اياعىن باسىپ جۇرە الاتىن بولدى. جىگىت ساحناعا ءوز اياعىمەن كوتەرىلدى.
رامازان ەسماعامبەتوۆ پەن ارۋجان ەسىمدى سابيلەردىڭ دەرتتەرى ۇقساس. تۋعاندارىنان وستەوگەنەز, ياعني سۇيەك سىنعىشتىق اۋرۋىنا شالدىققان ولارعا ارتىق قوزعالۋدىڭ ءوزى قاۋىپتى ءىس ەدى. سۇيەگىنىڭ ەلۋ رەت سىنعانىنىڭ كەسىرىنەن رامازاننىڭ بويى دا وسپەي قالىپتى. قايىرىمدى جانداردىڭ كومەگىمەن ولارعا ءتيىستى ەم-دوم جاسالدى. ارۋجان ماسكەۋدە ەمدەلدى. اۋرۋلارى ەرتە ەسەيتكەن بالالار قازىر بولاشاققا ۇمىتپەن قارايدى. رامازان وسكەندە اقىن بولعىسى كەلسە, ارۋجان سوت بولامىن دەيدى.
جەتىمنىن كوزى جاستى ەكەن,
ۋدان دا ءدامى اششى ەكەن.
اكەنىڭ مۇز با جۇرەگى
انانىڭ باۋىرى تاس پا ەكەن…
اسقار يمانقۇلوۆ پەن ايگۇل ءىلياس ەسىمدى ۇل مەن قىزدىڭ تاعدىرى وسى ءان جولدارىن ەسكە تۇسىرەدى. بالالار ۇيىندە تاربيەلەنىپ, اتا-انا مەيىرىمىنە زار بولىپ جۇرگەن ولاردىڭ تىلەۋىن اللا تاعالا بەرىپ, اكە-شەشەلى قىلدى. وعان قوسا قازىر اسقاردىڭ ءتورت اپكەسى بار. ال, ايگۇلدى اقتوبەلىك جەتەسوۆتەر وتباسى اسىراپ الىپتى. بۇل ونەرلى وتباسى ەكەن. وتاعاسى ءومىرحان اعانىڭ ايتۋىنشا, ولار انسامبل قۇرىپ, وبلىستىق بايقاۋدا باس جۇلدە جەڭىپ العان. بوي جەتىپ قالعان ايگۇلدى دە بۇگىندەرى ونەرگە باۋلىپ ءجۇر.
بىرنەشە جىل بۇرىن تۇركىستان قالاسىندا قايعىلى وقيعا ورىن الىپ, ءبىر كۇندە ءۇش بالانى اتا-اناسىنان ايىردى. جەتىمىن جىلاتپاعان ەلمىز عوي, سودان بالالاردىڭ ناعاشى اعالارى جيەندەرىن قولىنا الادى. الايدا, ونىڭ دا عۇمىرى ۇزاققا بارمايدى. ۇشەۋىنىڭ اراسىنداعى ەستيارى گۇلزيرا باۋىرلارىن بالالار ۇيىنە بەرمەيمىن دەپ بەلگىلى جازۋشى دۋلات يسابەكوۆتىڭ دراماسىنداعى اپكەدەي جەتكىزەمىن دەپ تىرمىسىپ باعادى. بىراق, قىزدىڭ اتى قىز ەمەس پە, ونىڭ ۇستىنە جاس بولعاننان كەيىن قولىنان كوپ نارسە كەلە قويمايدى. ول جاعدايدان كاريما ەسىمدى مەيىرىمدى اپاي حاباردار بولىپ, «جان جىلۋى» باعدارلاماسىنا بالالاردىڭ جاعدايىن جەتكىزەدى. سيۋجەت وتكەننەن كەيىن تۇركىستانداعى كاسىپكەرلەر بۇل ىسكە جۇمىلىپ, 5 بولمەلى ءۇي سوعىپ بەرەدى. قۇلاعىنان اۋىرلاپ قالعان گۇلزيراعا گەرمانيادا وتا جاساتادى.
اقمولا وبلىسى اقمول اۋىلىنىڭ تۇرعىنى امانگەلدى قاپانوۆتى 25 جاسىندا قاسكويلەر پىشاقتاپ كەتەدى. بۇل وقيعادان ءبىراز جىل وتسە دە, سودان بەرى ارباعا تاڭىلىپ قالعان ول اياعىنا تۇرا الماي كەلەدى. الايدا, مويىمايدى. سۇيەنىشىن سپورتتان تاۋىپ, اربامەن 100-200 مەترگە جۇگىرە باستادى, كەيىننەن زىلتەمىر كوتەردى. قازىر دە بيمەن اينالىسىپ ءجۇر. ول ونەرىن «قازاقستان» ۇلتتىق ارناسىنىڭ باعدارلاما جۇرگىزۋشىسى ارداق وتارباەۆ ەكەۋى كورسەتتى دە. اربادا وتىرىپ, قىزدارمەن شىر اينالىپ بيلەگەن ولار ءبيدى تاماشا مەڭگەرگەندەرىن تانىتتى.
امانگەلدى اعامىز بىرەۋگە ماسىل بولماي, ءوز ءىسىن دە اشتى. «بولاشاق» قوعامدىق بىرلەستىگىن قۇرعان ول 3 جىلدان بەرى مۇمكىندىگى شەكتەۋلى جاندارعا زاڭگەرلىك, پسيحولوگيالىق, قارجىلاي كومەك كورسەتىپ ءجۇر. جارى ەكەۋى ساۋاپ ءىس جاساپ, بالالار ۇيىنەن ەكى بالانى دا اسىراپ العان.
بۇگىنگى كۇنگە دەيىن «جان جىلۋى» باعدارلاماسىنىڭ 250 كورسەتىلىمى ءوتىپ, 500 ادامنىڭ تاعدىرى تۋرالى باياندالعان. بۇل, كومەككە مۇقتاج ادامنىڭ ءالى دە كوپ ەكەنىن كورسەتەدى. سونداي جانداردىڭ ءبىرى – اسەت جيەنبەك ەسىمدى ءسابي. مارگانەتس قىشقىلىن جۇتىپ, كومەكەيىن كۇيدىرىپ العان ول قازىر تۇتىكشە ارقىلى تاماقتانىپ ءجۇر. وعان دەرەۋ وتا جاساتۋ قاجەت ەكەن. باعدارلامانىڭ بەس جىلدىعىنا ارنالعان كونتسەرتتە ول جونىندە دابىل قاعىلدى. بالاعا كومەك بەرۋ ءۇشىن كونتسەرت زالىنىڭ دالىزىندە اقشا سالاتىن جاشىكتەر قويىلعان. دوسىمجان تاڭاتاروۆ, گۇلنۇر ورازىمبەتوۆا, باقىت شاداەۆا, جاڭاباي وتەگەنوۆ, مايرا ءىلياسوۆا سىندى بەلگىلى انشىلەر مەن حالىقارالىق «شابىت» بايقاۋىنىڭ گران-پري يەگەرى شولپان ءشارىپوۆا, جانار داۋكەەۆا, قانات ۇمبەتوۆ ءان سالعان شارا نەگىزىنەن وسى ءۇشىن ۇيىمداستىرىلدى.
امانعالي قالجانوۆ
