وسىمەن ءتورتىنشى جىل قاتارىنان ءوتىپ جاتقان سۇلۋلىق سايىسى ناعىز ۇلتتىق شوۋعا اينالدى. ۇلتتىق قۇندىلىقتارىمىزدى زاماناۋي ۇلگىدە ەل ىقىلاسىنا ۇسىنىپ جۇرگەن جوبانىڭ باس پروديۋسەرى بايان ەسەنتاەۆا جانە ونىڭ شىعارماشىلىق ۇجىمىنىڭ تىنىمسىز ەڭبەگىنىڭ ناتيجەسى كەشەگى وتكەن بايقاۋدان انىق كورىندى.
بيىل العاش رەت ەلوردا تورىندە وتكەن «قازاق ارۋى-2014» بايقاۋىنا ەلىمىزدىڭ ءار وڭىرىنەن جيىرما ءبىر بويجەتكەن قاتىستى. استانا قالاسى مادەنيەت باسقارماسىنىڭ باسشىسى بولات ماجاعۇلوۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ, «حابار» تەلەارناسى باعدارلامالار ديرەكتسياسىنىڭ باس پروديۋسەرى رينات كەرتاەۆ, تەاتر جانە كينو اكتەرى عاني قۇلجانوۆ, بەلگىلى تەلەجۇرگىزۋشى ايگۇل مۇكەي, ديزاينەر ايدا قاۋمەنوۆا, وتاندىق وپەرا پريماسى نۇرجامال ۇسەنباەۆا, ايتىس اقىنى اينۇر تۇرسىنباەۆا, «قازاق ارۋى – 2014» بايقاۋىنىڭ باس پروديۋسەرى بايان ەسەنتاەۆا جانە قازىلار القاسىنىڭ تۇراقتى ءتورايىمى قر پرەمەر-ءمينيسترىنىڭ ورىنباسارى گۇلشارا ابدىقالىقوۆا باستاعان تورەشىلەرگە اجارىنا اقىلى ساي, نازىكتىگى مەن اسەمدىگى ۇيلەسكەن, بىرىنەن-ءبىرى اسقان ارۋلاردىڭ ىشىنەن حاس سۇلۋدى انىقتاۋ وڭاي بولمادى. دەگەنمەن, وسى جىلى قازاقتىڭ ەڭ سۇلۋ قىزى دەگەن اتاق كەلىستى كەلبەتىمەن, نازدى قىلىعىمەن, ەرەكشە ەركەلىگىمەن ساحنانى باۋراعان جيىرما جاسار ماڭعىستاۋلىق گۇلناز جولانوۆاعا بۇيىردى. گۇلنازعا بايقاۋدىڭ بىلتىرعى جەڭىمپازى ايگەرىم قاناتباەۆا التىن ءتاجىن قيماستىقپەن تابىستادى. ءبىرىنشى ورىندى شىعىستىڭ شىرايلىسى اياۋلىم ەرعازى, ەكىنشى ورىندى ماڭعىستاۋلىق ۇلپان نۇرمانوۆا, ءۇشىنشى ورىندى استانالىق گۇلمارال قاجيحان يەلەندى.
سۇلۋلار شەرۋىندە, سونىمەن قاتار, وتاندىق جاس ديزاينەرلەر ايدا قاۋمەنوۆا, نايل بايكۇشىكوۆ, ماليكا ءۇسىپوۆانىڭ ءسان ۇلگىلەرى مەن اسەم نۇرسەيىتوۆانىڭ اشەكەي بۇيىمدار كوللەكتسياسى تانىستىرىلدى.
نۇرگۇل احانقىزى
