ەلىمىزدە العاش رەت گيپوتەرميا اپپاراتى ۇلتتىق انا مەن بالا ورتالىعىندا قولدانىسقا بەرىلدى. اتالمىش قۇرىلعى نارەستەلەردى ەمدەۋ كەزىندە دەنە قىزۋىن تولىق باقىلاۋعا مۇمكىندىك بەرەدى.
قازىرگى ۋاقىتتا ىشتەگى نارەستە مەن جاڭا تۋعان بالانىڭ گيپوكسيا جانە پەريناتالدىق ينسۋلتتەن پايدا بولعان تسەرەبرالدىق بۇزىلۋى – نەوناتولوگياداعى ەڭ وزەكتى ماسەلە. نەۆرولوگيالىق ەمدەۋدىڭ ەڭ ءتيىمدى ءادىسى – تەراپەۆتىك گيپوتەرميا. ول دەگەنىمىز – ەمدەلۋشى ءسابيدىڭ مي قىزۋىن قاداعالاپ, ونى تومەندەتەتىن مەديتسينالىق مەتوديكا. اسىرەسە, تىنىس الۋ بۇزىلعان كەزدە, جۇرەككە وتا جاساعاندا, جاساندى قان اينالىمى كەزىندە مي دەرتىنىڭ ارمەن قاراي اسقىنۋىنا جول بەرمەيدى.
بۇل قۇرىلعىنى ساتىپ الۋعا «ايالا» قايىرىمدىلىق قورى قولداۋ كورسەتكەن. ناقتىراق ايتساق, قۇنى 11 350 000 تەڭگە تۇراتىن اپپاراتتى ساتىپ الۋعا قوردىڭ سەرىكتەس-دەمەۋشىلەرى – ADD Capital جانە Chevron كومپانيالارى – كومەكتەسكەن. سونىمەن قاتار, 2 900 000 تەڭگەنى «استانا مارافون-2017» قاتىسۋشىلارى جيناعان.
«بۇگىندە ەڭ قۇندى بايلىق – ادامداردىڭ دەنساۋلىعى. ساپالى قىزمەت كورسەتۋ ءۇشىن سوعان سايكەس جوعارى تەحنولوگيالىق قۇرالدار بولۋى ءتيىس. بۇل اپپارات – سابيلەردىڭ دەنساۋلىعى ءۇشىن ەڭ قاجەتتى جابدىقتاردىڭ ءبىرى. «اقىلدى» قۇرىلعى بالانىڭ جاعدايىن ءجىتى باقىلاۋعا كومەكتەسەدى. دارىگەرلەردىڭ جۇمىسىن جەڭىلدەتىپ, بالانىڭ ەم الۋىنا جايلىلىق سىيلايدى. ورتالىقتا جىل سايىن 4 مىڭ بالا دۇنيەگە كەلەتىن بولسا, سونىڭ 8-10 پايىزى وسى اپپاراتتىڭ كومەگىنە مۇقتاج ەدى» دەيدى انا مەن بالا ورتالىعى رەانيماتسيا ءبولىمىنىڭ مەڭگەرۋشىسى بوتاگوز اۋباكىرقىزى.
ايتا كەتەيىك, دەنساۋلىق ساقتاۋ مينيسترلىگى مەن «ايالا» قايىرىلىمدىلىق قورى وسى اپپاراتتى قولدانۋدىڭ ادىستەمەسىن دە قۇراستىرعان. ەندى الداعى ۋاقىتتا استانا جانە الماتى قالالارىندا ەلىمىزدىڭ بارلىق وڭىرىندەگى نەوناتولوگتار مەن مەيىربيكەلەردى شاقىرىپ, تاجىريبەلىك ترەنينگتەر ۇيىمداستىرماقشى.
گۇلميرا شارحانقىزى
