بۇگىن استانا قالالىق ءماسليحاتىنىڭ كەزەكتەن تىس سەسسياسىندا بايقوڭىر اتالاتىن جاڭا اۋداندى قۇرۋ تۋرالى شەشىم ماقۇلدانىپ, ونىڭ شەكاراسى بەكىتىلدى. سەسسياعا قالا اكىمىنىڭ ورىنباسارى ەرمەك امانشاەۆ قاتىستى.
جاڭا اۋداندى قۇرۋداعى ماقساتىمەن قالا اكىمى اپپاراتىنىڭ باسشىسى بەرىك جاكەنوۆ تانىستىردى. ونىڭ ايتۋىنشا, قالانى مونوتسەنتريستىك باعىتتا دامىتۋ بويىنشا ناقتى جۇمىستار ىستەلۋدە. ەلوردا حالقى ەڭ قاجەتتى 32 الەۋمەتتىك ستاندارت بويىنشا 129 سەكتورعا ءبولىندى.
ال اۋدان شەكاراسى تەمىرجولدان استانا-قوستاناي باعىتىنا قاراي, قازىرگى شەكارادان سولتۇستىككە اقبۇلاق وزەنىن, اتالعان وزەندى بويلاي راقىمجان قوشقارباەۆ داڭعىلىن, وسى داڭعىلدىڭ جۇپ قاپتالىنان ساۋدا كوشەسىن, ءارى قاراي جوبالىق اتاۋى №84 كوشەنى, ەسىل مەن اقبۇلاق وزەندەرى قوسىلاتىن تۇستى, ەسىل وزەنىنەن باستاپ «قاراوتكەل» كوپىرىن, ا. باراەۆ كوشەسى مەن رەسپۋبليكا داڭعىلىن, اتالمىش داڭعىلدىڭ جۇپ قاپتالىنان تارتقاندا بوگەنباي باتىر داڭعىلىن, وسى داڭعىلدى بويلاي الاش تاسجولىن قوسا العاندا تەمىرجولدى جانە قالانىڭ باتىس شەكاراسىن قامتيدى. اۋدان شەكاراسىنا سونىمەن قاتار قالالىق زيرات (460 گەكتار) كىرەدى. اۋداننىڭ جالپى اۋماعى 18,1 مىڭ گەكتاردى الىپ, وندا 211 مىڭنان استام ادام تۇراتىن بولادى.
«جاڭا اۋدان قالا اكىمىنىڭ «شەت ايماقسىز قالا» جوباسى اياسىنداعى جۇمىستى جالعاستىرۋ, شاھار ينفراقۇرىلىمىن دامىتۋ جانە جەتىلدىرۋ, شاعىن بيزنەستىڭ وركەندەۋىنە قولايلى جاعداي جاساۋ, قالا تۇرعىندارىنىڭ ءارتۇرلى الەۋمەتتىك ماسەلەلەرىن جەدەل شەشۋ ماقساتىندا قۇرىلادى» دەدى ب. جاكەنوۆ.
امانعالي قالجانوۆ
