ەلورداداعى «ساراندا» تۇرعىن كەشەنىندە 240 ورىندىق بالاباقشا پايدالانۋعا بەرىلدى. بۇل جاڭا باقشانىڭ ىسكە قوسىلۋى – استاناداعى بالاباقشا كەزەگىن ازايتا تۇسەرى انىق. بالاباقشانىڭ اشىلۋ سالتاناتىنا «قازاقستان تەمىر جولى» ۇك» اق ۆيتسە-پرەزيدەنتى ب.كاماليەۆ, استانا قالالىق ءبىلىم باسقارماسىنىڭ وكىلدەرى مەن تەمىر جول سالاسىنىڭ ارداگەرلەرى قاتىستى.
– بۇگىن «ساراندا» تۇرعىن كەشەنىندە ايتۋلى دا ماڭىزدى وقيعا. مەملەكەت باسشىسى نۇرسۇلتان نازارباەۆتىڭ تاپسىرماسى بويىنشا سالىنعان زاماناۋي بالاباقشا تەمىر جول كولىگى قىزمەتكەرلەرىنىڭ كاسىبي مەرەكەسى قارساڭىندا ەسىگىن ايقارا اشتى. بىرەگەي قۇرىلىس قازىرگى مەكتەپ جاسىنا دەيىنگى بالالارعا ارنالعان مەكەمەلەردىڭ حالىقارالىق ۇلگىدەگى بارلىق تالاپتارىن ەسكەرە وتىرىپ سالىنعان, – دەدى ب.كاماليەۆ.
ايتا كەتۋ كەرەك, بالالار باقشاسى سوڭعى ۇلگىدەگى تالاپتارعا ساي ەتىپ تۇرعىزىلعان. جاپ-جاڭا ەكى قاباتتى عيماراتتا جاس ايىرماشىلىعى بار 12 توپتا جيىرما بالادان تاربيەلەنەدى. ولاردىڭ جاتىن ورىندارى مەن تاربيەلەنەتىن زالدارى ينتەراكتيۆتىك تاقتالارمەن جاراقتانعان. باسسەين, مۋزىكا جانە گيمناستيكا زالدارى, مەديتسينالىق قىزمەت كورسەتۋ بولمەلەرى بار. ءار توپ سپورتتىق جانە ويىن الاڭدارىمەن قامتىلعان.
بالاباقشا ەدەنى ارقىلى جىلىتىلادى. اقىلدى «جارىق» قۇرالدارى بار. شكافتاردا كيىمدەر مەن اياق كيىمدەردى كەپتىرۋگە بولادى. تاماقتانۋ جانە كىر جۋاتىن بولمەلەر سوڭعى ۇلگىدەگى قوندىرعىلارمەن جابدىقتالعان.
