ەلوردا تويى كۇنى قالا اكىمى يمانعالي تاسماعامبەتوۆ استانانىڭ اكىمشىلىك ورتالىعىن حالىقارالىق اۋەجايمەن بايلانىستىراتىن ورتالىق ماگيسترالدىڭ ءبىرى – ورىنبور كوشەسىندە اۆتوكولىك قوزعالىسىن اشتى.
بۇل كوشە باس شاھارعا كەلەتىن قوناقتار مەن شەتەلدىك دەلەگاتسيا وتەتىن نەگىزگى جولعا اينالادى. «ايس استانا» جانە «قازگەرستروي» مەكەمەسى سالعان تاس جولدىڭ ۇزىندىعى – 4,1 شاقىرىم. مەرەكە قارساڭىندا ەلوردانىڭ جول-كولىك ينفراقۇرىلىمىنىڭ جاڭا نىساندارىن ارالاۋ كەزىندە وسى نىسانعا تابان تىرەگەن ەلباسى جول توسەمىنىڭ ساپاسىنا ءوز باعاسىن بەرگەن.
قالا باسشىسى استانانىڭ كولىك ستراتەگياسى مەن جول قۇرىلىسى مەملەكەت باسشىسىنىڭ ەرەكشە نازارىندا ەكەنىن ايتتى. «استانا – مەملەكەتىمىزدىڭ باس قالاسى. سوندىقتان دا, وسى قالانىڭ تۇرمىس-تىرشىلىگى, كوشەلەر مەن نىساندار – باستى نازاردا. ارينە, قالا ءوسىپ-وركەندەۋ ءۇشىن ساپالى جولدار كەرەك. وسى ورايدا بۇگىن استانا كۇنىندە قالا ءۇشىن ماڭىزدى داڭعىل جول پايدالانۋعا بەرىلىپ جاتىر. ياعني, زامان تالابىنا ساي كوشە پايدا بولدى», – دەدى ي.تاسماعامبەتوۆ.
اكىم سونىمەن قاتار ەلوردادا جۇزەگە اسىپ جاتقان جول-كولىك سالاسىنداعى اۋقىمدى جوبالاردى اتاپ ءوتتى.
«ەلوردانىڭ كولىك ستراتەگياسى كەڭ كولەمدە جۇزەگە اسىرىلىپ جاتىر. بۇل جەردە تەك ەكى جوبانى عانا ايتا كەتۋگە بولادى, جالپى ۇزاقتىعى 28 شاقىرىمدى قۇرايتىن شاعىن كولىك اينالىمىنىڭ قۇرىلىسى جانە بۇگىن ءبىرىنشى كەزەگى پايدالانۋعا بەرىلگەن ۇزىندىعى 16 شاقىرىم بولاتىن باتىس جارتىلاي ساقيناسى», – دەدى ول جۇمىسشىلارمەن كەزدەسۋىندە.
سالىنىپ جاتقان شاعىن كولىك اينالىمى تاۋلىگىنە 90 مىڭنان اسا اۆتوكولىك وتكىزۋ مۇمكىندىگىنە يە. كولىك اينالىمى قۇرىلىسىنىڭ اياقتالۋى 2014 جىلى قالا ورتالىعىنا كەم دەگەندە تاۋلىگىنە 20 مىڭ كولىك جونەلتۋگە مۇمكىندىك بەرەدى. ۇزىندىعى 16 شاقىرىم بولاتىن باتىس جارتىلاي ساقيناسى, ول قورعالجىن تاس جولى مەن تۇران داڭعىلىنداعى كولىك قاتىناسىن جەڭىلدەتۋى ءتيىس. قازىرگى تاڭدا بۇل جەردەن تاۋلىگىنە 60 مىڭ اۆتوكولىك وتەدى, ال نورماتيۆ بويىنشا 15 مىڭنان اسپاۋى كەرەك.
ايتا كەتكەن ءجون, 2013 جىلى ەسىل وزەنى ارقىلى كوپىرمەن تىلەنديەۆ داڭعىلىنا شىعۋعا مۇمكىندىك بەرەتىن بەيسەكوۆ كوشەسىنىڭ قۇرىلىسى جوسپارلانىپ وتىر. بۇل جولدىڭ پايدالانۋعا بەرىلۋى, ءوز كەزەگىندە جەڭىس, سارىارقا, قورعالجىن تاس جولى مەن بوگەنباي باتىر كوشەسىندەگى كولىك كەپتەلىسىن ازايتپاق.
گۇلميرا ايماعانبەت
