ءماجىلىستىڭ زاڭناما جانە سوت-قۇقىقتىق رەفورما كوميتەتىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا دوڭگەلەك ۇستەل وتىرىسى ءوتتى. بەينەكونفەرەنتسيا بايلانىسى ارقىلى تالقىلاۋعا ءماجىلىس دەپۋتاتتارى, مەملەكەتتىك ورگانداردىڭ, ۇەۇ وكىلدەرى, عالىمدار, قازاقستاندىق جانە حالىقارالىق ساراپشىلار قاتىستى.
تالقىلانعان زاڭ جوباسىنىڭ ماڭىزدىلىعى تۋرالى ايتقان سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى مارات احمەتجانوۆ مەملەكەتتىك قىزمەتشىلەر مەن ولارعا تەڭەستىرىلگەن ادامدار شىعىستارىنىڭ نەگىزسىز بايىعانى ءۇشىن جاۋاپكەرشىلىكتى بەلگىلەي وتىرىپ, ولاردىڭ تابىستارى سايكەستىگىنە باقىلاۋ ەنگىزۋ, سىبايلاس جەمقورلىق فاكتىلەرى تۋرالى حابارلاعان ادامداردى قورعاۋ جۇيەسىن قالىپتاستىرۋ سياقتى نورمالارعا نازار اۋداردى.
زاڭ جوباسىمەن 11 زاڭنامالىق اكتىگە, ونىڭ ىشىندە 3 كودەكسكە جانە 8 زاڭعا تۇزەتۋلەر ەنگىزىلەدى. ءوز كەزەگىندە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ولجاس بەكتەنوۆ زاڭ جوباسىندا ۇسىنىلاتىن ناقتى تەتىكتەرگە توقتالدى. اتاپ ايتقاندا, شەنەۋنىكتەردىڭ شىعىستارى ولاردىڭ كىرىستەرىنە سايكەس كەلمەگەنى ءۇشىن وسى جىلدان باستاپ باستالعان جالپىعا بىردەي دەكلاراتسيالاۋ شەڭبەرىندە سالىقتىق اكىمشىلەندىرۋدىڭ قولدا بار قۇرالدارىن پايدالانا وتىرىپ جاۋاپكەرشىلىك ەنگىزۋ ۇسىنىلادى.
سىبايلاس جەمقورلىق فاكتىلەرى تۋرالى حابارلاعان ادامداردى قورعاۋ جۇيەسىن قالىپتاستىرۋ ماقساتىندا, اتاپ ايتقاندا, سىبايلاس جەمقورلىققا قارسى ءىس-قيمىلعا جاردەم كورسەتكەن مەملەكەتتىك قىزمەتشىنى تارتىپتىك جاۋاپتىلىققا تارتۋعا نەمەسە لاۋازىمىنان بوساتۋعا نەمەسە تارتىپتىك كوميسسيانىڭ ۇسىنىمىنسىز باسقا لاۋازىمعا اۋىستىرۋعا بولمايدى دەپ بەكىتۋ ۇسىنىلادى. ال ادامنىڭ سىبايلاس جەمقورلىققا قارسى ءىس-قيمىلدا جاردەم كورسەتۋى تۋرالى اقپاراتتى جاريا ەتكەنى ءۇشىن قىلمىستىق جاۋاپتىلىق ەنگىزە وتىرىپ, ونى قۇپيا اقپاراتقا جاتقىزۋ ۇسىنىلادى.
