ەلوردادا قر تۇڭعىش پرەزيدەنتى قورىنىڭ ۇيىمداستىرۋىمەن «RocketFest» اتتى جاستارعا ارنالعان كەڭ اۋقىمدى ويىن-ساۋىق ءبىلىم فەستيۆالى ءوتتى.
العاش بايراعىن كوتەرگەن بۇل ءىس-شاراعا 1000-نان اسا جاستار جينالىپ, ولار ۋاقىت تالابىنا ساي وزدەرىنىڭ جەكە جانە كاسىبي قاسيەتتەرىن دامىتۋ, ونى ناسيحاتتاۋ جايىندا وسى باعىتتا جاقسى جەتىستىكەرگە قول جەتكىزگەن ازاماتتارمەن جۇزدەسىپ, ەمىن-ەركىن اڭگىمە ءوربىتتى.
فەستيۆال باعدارلاماسى «IT», «الەۋمەتتىك مەديا» جانە «عىلىم» اتتى ءۇش مودۋلگە بولىنگەن. ولاردىڭ ارقايسىسى بىرنەشە باعىتتاردى قامتيدى. ماسەلەن, «ا2» سۋپەرماركەتتەر جەلىسىن ۇيىمداستىرۋشى ءىلياس يساتاەۆ پەن «Astana Hub» IT-ستارتاپتارىنىڭ حالىقارالىق تەحنوپاركىنىڭ نەگىزىن قالاۋشى ماعجان ماديەۆ باعدارلامالار داعدىلارىن دامىتۋ, بيزنەستە ءوز ورنىڭدى دۇرىس تابۋ جولدارى, سونداي-اق جاڭا IT-تەحنولوگيالارىنىڭ كەلەشەگى مەن مۇمكىندىكتەرى تۋرالى سالماقتى ءسوز سويلەدى. «الەۋمەتتىك مەديا» ءمودۋلى اياسىندا «الماتا, شتات نەبراسكا» جوباسىن قالاۋشىلاردىڭ ءبىرى ءاشىم ءبىرجان, ماركەتولوگ «Yuframe» راسۋل ابدۋللاەۆ, رەجيسسەر, ستسەناريست قۋانىش بەيسەكوۆ, «Bloggers» اگەنتتىگىنىڭ نەگىزىن قالاۋشى ابىلايحان كاماللادين سەكىلدى ازاماتتار الەۋمەتتىك جەلىلەردە ۆيرۋستى كونتەنت جاساۋعا, ينتەرنەت-اۋديتوريا ءۇشىن ساپالى ماتەريال دايىنداۋعا بايلانىستى ءوز تاجىريبەلەرىمەن ءبولىستى. سونىمەن قاتار «BeichTech» كوممۋنيكاتسيا جونىندەگى ديرەكتورى ساياسات نۇربەك پەن «Rocket Study» ءبىلىم ورتالىقتارىن ۇيىمداستىرۋشى, كاسىپكەر ارسلان داريموۆتىڭ جاڭاشا يدەيالار جولى جايىنداعى ويلارى دا جاستاردىڭ قىزىعۋشىلىعىن تۋعىزدى.
