نۇر-سۇلتاندا قالا تۇرعىندارىنا كورسەتىلەتىن قىزمەتتەردى ء«بىر تەرەزە» ارقىلى بىرىكتىرىپ, وتباسىلارمەن جەكە جۇمىس جۇرگىزەتىن «جانۇيا» ورتالىعى اشىلدى. قر پرەمەر-ءمينيسترىنىڭ ورىنباسارى بەردىبەك ساپارباەۆ پەن قالا اكىمى التاي كولگىنوۆ زاڭگەرلىك, الەۋمەتتىك جانە پسيحولوگيالىق كومەك كورسەتەتىن جاڭا ورتالىقتىڭ اشىلۋ راسىمىنە قاتىسىپ, جۇمىس باعىتىمەن تانىستى.
ورتالىقتىڭ «Open space» الاڭىندا ەلوردالىقتار جۇمىس تابۋ, بيزنەس اشۋ, ءوزىن تولعاندىرعان الەۋمەتتىك ماسەلە بويىنشا اقپارات پەن كەڭەس الادى. 12 مەملەكەتتىك جانە كۆازيمەملەكەتتىك سەكتور جۇمىس ىستەيتىن ورتالىقتىڭ ماماندارى ااك الۋ, كاسىپتىك وقۋدان ءوتۋ, جۇمىسقا ورنالاستىرۋ, جاپپاي وقىتۋ باعدارلاماسىنا قاتىسۋ, بالاباقشاعا كەزەككە قويۋ, قامقورشىلىقتى ورناتۋ, جاردەماقىلاردىڭ بارلىق تۇرلەرىن جانە ت. ب. الۋ ماسەلەلەرى بويىنشا قىزمەت كورسەتەدى.
قر پرەمەر-ءمينيسترىنىڭ ورىنباسارى بەردىبەك ساپارباەۆ: «ازاماتتار ءوزىنىڭ قابىلەتىنە قاراي 3-6 ايلىق كۋرستاردى وقىپ, ەكونوميكاعا كەرەك ماماندىقتى الادى, وعان 16 مىڭ تەڭگە ستيپەنديا تولەنەدى. مەملەكەتتە ءجۇرىپ جاتقان مەملەكەتتىك باعدارلامالاردان حاباردار بولىپ, مەملەكەتتىڭ قولداۋىن پايدالانۋ كەرەك. «اناۋ جوق, مىناۋ جوق» دەپ وتىرا بەرسەك ەشكىم ەشتەڭە اكەپ بەرمەيدى. الەۋمەت سالاسىنداعى ءىس-شارالاردىڭ بارلىعى حالىققا ارنالعان. مۇقتاجدىق پەن ماسىلدىقتى اجىراتا بىلگەن ءجون. ماقسات – جاستار, ەڭبەككە قابىلەتتى ادامدار جۇمىس ىستەسىن. ورتالىقتىڭ ماقساتى وتە دۇرىس, قالا اكىمشىلىگىنە راحمەت» دەدى.
قالا اكىمى التاي كولگىنوۆ بۇل ورتالىقتىڭ تۇرعىندار سۇرانىسىمەن اشىلعانىن, ازاماتتارمەن جەكە قابىلداۋ وتكىزۋ بارىسىندا وسىنداي ورتالىقتىڭ قاجەتتىلىگىنە كوز جەتكەنىن ءتۇسىندىرىپ ءوتتى. «ازاماتتار ماسەلەلەرىمەن قىزمەت كورسەتۋ ورتالىعىنا, الەۋمەتتىك كومەك كورسەتۋ ورتالىعىنا بارادى, ەڭ سوڭىندا قايتادان اكىمگە كەلەمىز دەيدى. وسى سەبەپتى از قامتىلعان وتباسىلارعا ارنالعان وتباسى قۇندىلىقتارىن قولدايتىن ورتالىق اشتىق. از قامتىلعان وتباسىلار مۇشەلەرىنىڭ كوبىندە ديپلوم جوق, ولار كۋرستار وقىسا, جۇمىس ورىندارىنا مامان دايارلاساق, شاعىن بيزنەستى اشىپ اياققا تۇرعاندار, ىسكەر ايەلدەر ءوز تاجىريبەسىمەن بولىسسە دەيمىز» دەدى شاھار باسشىسى.
ايتا كەتۋ كەرەك, ورتالىقتاعى «كاسىپكەر انا» قولداۋ ورتالىعى كوپبالالى جانە از قامتىلعان وتباسىلارعا ءوز كاسىبىن اشۋعا جان-جاقتى كومەك كورسەتپەك. ونىڭ اياسىندا ومىرلىك تاجىريبەلەرىمەن بولىسەتىن تابىستى «Self made» ايەلدەرىمەن موتيۆاتسيالىق بيزنەس ترەنينگتەر وتەدى. قالا اكىمى التاي كولگىنوۆ ورتالىقتىڭ مۇمكىندىكتەر الاڭىنا اينالاتىنا سەنىم ءبىلدىردى. «ءبىز كەلەشەكتە ورتالىقتى سۇرانىسقا سايكەس دامىتا بەرەمىز. بۇل جەرگە كەلسە ءۇي بەرەدى دەگەن تۇسىنىك دۇرىس ەمەس, ازاماتتارعا ءوز مۇمكىندىكتەرىن پايدالانۋدا ورتالىقتاعى بۇكىل مامان اتسالىسادى. مەملەكەت تاراپىنان بارلىق قولداۋ جاسالىپ جاتىر, دەگەنمەن اتا-انا بالالار الدىنداعى ءوز جاۋاپكەرشىلىگىن ۇمىتپاۋ كەرەك. جەكە قابىلداۋعا ءارتۇرلى ماسەلەمەن كەلەدى, كەي وتباسىلاردىڭ ەكى نە ءۇش نەسيە العانىن كورەمىز. جارايدى, ءبىرىنشى نەسيە مۇقتاج بولعاسىن العان شىعارسىز, ال ءۇشىنشى نەسيەنى نەگە الدىڭىز دەگەنگە «سمارتفون الدىم» دەپ جاۋاپ بەرەدى. سمارتفون الدىڭىز, بالالارىڭىزعا كومەكتەسە الماي وتىرسىز, ال بانكتىڭ قاراجاتىن قايتارۋ كەرەك, بۇل قارجىلىق ساۋاتتىلىقتىڭ جەتكىلىكسىزدىگىن كورسەتەدى. سوندىقتان قارجىلىق ساۋاتتىلىققا قاتىستى دا ترەنينگتەر وتكىزۋ جوسپاردا بار. قالا شەتىندەگى اۋىلداردا تۇراتىندار نەسيەگە سمارتفون العانشا مال السا, بالانى باعۋعا بولادى, ءارى بالالار ەڭبەككە ۇيرەنەدى. سول ءۇشىن ءبىز حالىقتى ەڭبەك ەتۋگە شاقىرۋىمىز كەرەك. ەڭبەكسىز ەشبىر مەملەكەت وسپەگەن, دامىماعان. ءبىزدىڭ مىندەتىمىز – مۇمكىندىك تۋعىزۋ جاعداي جاساۋ» دەدى قالا اكىمى التاي كولگىنوۆ.
«جانۇيا» ورتالىعىندا قالا اكىمىنىڭ اشىق قوعامدىق قابىلداۋى جۇمىس ىستەيدى. بەكىتىلگەن كەستەگە سايكەس ازاماتتاردى قابىلداۋدى اۋدان اكىمدەرى, باسقارمالار مەن باسقا ۇيىمداردىڭ باسشىلارى دا جۇرگىزەتىن بولادى.
جادىرا شامۇراتوۆا
