وبلىس جانە قالا اكىمدەرىنىڭ الەۋمەتتىك ماسەلەلەر جونىندەگى ورىنباسارلارى نۇر-سۇلتان قالاسىنىڭ «جانۇيا» ينستيتۋتىن قولداۋ ورتالىعىنىڭ تاجىريبەسىمەن تانىستى.
قالا اكىمىنىڭ ورىنباسارى باقتيار ماكەن ارىپتەستەرىن ەكسكۋرسيالاتا ءجۇرىپ, نەگىزگى مىندەت بارلىق وڭىرلەردە وتباسى ينستيتۋتىن دامىتۋدى بارىنشا قامتاماسىز ەتۋ قاجەتتىگىن ايرىقشا اتاپ ءوتتى. «مەملەكەت باسشىسىنىڭ تاپسىرماسىنا سəيكەس ءبىز ايماقتارداعى ارىپتەستەرىمىز ءۇشىن «جانۇيا» ينستيتۋتىن قولداۋ ورتالىعى بويىنشا ەكسكۋرسيا وتكىزدىك. بۇل ەكسكۋرسيا ارىپتەستەرىمىزدى ءبىزدىڭ ورتالىقپەن تانىستىرۋ جانە تاجىريبە الماسۋ ءۇشىن وتكىزىلدى. بۇگىنگى تاڭدا بارلىق وڭىرلەردە وتباسى ينستيتۋتىن دامىتۋدى بارىنشا قامتاماسىز ەتۋ مىندەتى تۇر جانە «جانۇيا» تاجىريبەسىن بارلىق وڭىرلەردە تاراتۋ كەرەك» دەدى ب.ماكەن. ونىڭ ايتۋىنشا, ورتالىققا, نەگىزىنەن, تۇرعىن ءۇي, مەملەكەتتىك باعدارلامالار, ااك ماسەلەلەرى بويىنشا ءوتىنىش بىلدىرەتىندەر كوبىرەك كەلەدى ەكەن. «ءاربىر ماسەلە بويىنشا كەڭەستەر بەرىلىپ, تۇرعىندار جۇگىنەتىن ماسەلەلەردى شەشۋ جولدارى بار. بولاشاقتا ءبىز ورتالىق فيليالدارىن قالانىڭ ءار اۋدانىندا اشۋدى جوسپارلاپ وتىرمىز» دەدى قالا اكىمىنىڭ ورىنباسارى.
«جانۇيا» ينستيتۋتىن قولداۋ ورتالىعى – حالىققا 70-كە جۋىق قىزمەت كورسەتەتىن فۋنكتسيونالدى ورتالىق. «مۇندا وزەكتى ماسەلەلەر كوتەرىلەدى, تۇرعىندارعا كەڭەس بەرىلەدى. مەنىڭ ويىمشا, مۇنداي ورتالىقتاردى باسقا ايماقتاردا دا قۇرۋ قاجەت. ويتكەنى قازىر ااك الۋشىلار كوپ, ولاردا كوپتەگەن سۇراقتار تۋىندايدى. مۇنداي ورتالىقتاردىڭ كومەگىمەن ءوتىنىش بىلدىرگەندەردىڭ سۇراقتارىنا قاجەتتى كەڭەستەر مەن ناقتى جاۋاپتار بەرە وتىرىپ, الەۋمەتتىك شيەلەنىستى ماسەلەلەردى ۋاعىندا شەشۋگە مۇمكىندىك تۋادى. بىزدە ءاربىر وبلىستىق, اۋداندىق جۇمىسپەن قامتۋ ورتالىعىندا كەڭەس بەرەدى, بىراق وندا «جانۇيامەن» سالىستىرعاندا قىزمەت از كورسەتىلەدى» دەدى الماتى وبلىسى اكىمىنىڭ ورىنباسارى باتىرجان بايجۇمانوۆ.
«جانۇيا» وتباسىن قولداۋ ورتالىعىنىڭ ديرەكتورى ايگەرىم تاڭىربەرگەنوۆانىڭ ايتۋىنشا, ءۇش اي ىشىندە ورتالىققا 6,3 مىڭ ادام جۇگىنگەن.
– ورتالىقتىڭ باستى ماقساتى – وتباسىلارعا پسيحولوگيالىق, الەۋمەتتىك جانە زاڭگەرلىك كومەك كورسەتۋ. ءبىزدىڭ ورتالىقتا 70-كە جۋىق قىزمەت كورسەتىلەدى, 60 قىزمەتكەر جۇمىس ىستەيدى. اشىلعان كۇننەن باستاپ ءۇش اي ىشىندە ءبىزدىڭ ورتالىققا 6,3 مىڭ ادام جۇگىندى, 13 مىڭ ماسەلە قارالدى. ونىڭ 3 مىڭى شەشىلگەن. بۇل ماسەلەلەر – جۇمىسقا ورنالاستىرۋ, ااك تاعايىنداۋ, زاڭگەرلىك, پسيحولوگيالىق كومەك كورسەتۋ. بۇگىن ءبىز ايماقتارداعى ارىپتەستەرىمىزدى ءبىزدىڭ ورتالىقتىڭ قىزمەتىمەن تانىستىردىق, – دەدى ول.
