كەشە استانا قالاسىنىڭ اكىمى يمانعالي تاسماعامبەتوۆ پەن رەسەي فەدەراتسياسى باشقۇرتستان رەسپۋبليكاسى ۋفا قالاسىنىڭ قالالىق ءوڭىرى اكىمشىلىگىنىڭ باسشىسى يرەك يالالوۆ دوستىق جانە ىنتىماقتاستىق تۋرالى كەلىسىمگە قول قويدى.استانادا ءوتىپ جاتقان باشقۇرتستاننىڭ ەكونوميكا جانە مادەنيەت كۇندەرى اياسىندا وتكىزىلگەن كەزدەسۋدە قالا اكىمى يمانعالي نۇرعاليۇلى:
– قازاق پەن باشقۇرت – ەجەلدەن ىرگەسى اجىراماعان, دوستىق تامىرى تەرەڭدە جاتقان باۋىرلاس ەلدەر. بۇگىندە ۋفا قالاسى قارقىندى دامىپ كەلەدى. ەكى شاھاردىڭ ءوزارا جاراسىمدى بايلانىسى مەن ارىپتەستىك قارىم-قاتىناسى ارتا بەرەتىنىنە سەنىمىمىز مول, – دەپ اتاپ ءوتتى.
باس قالانىڭ قالىپتاسۋ تاريحىنا از-كەم توقتالعان اكىم ەلباسىنىڭ استانانى اۋىستىرۋ تۋرالى يدەياسى قيىن-قىستاۋ كەزەڭدە دۇنيەگە كەلگەنىن, كەزىندە جۇرتشىلىققا قيالداي كورىنگەن بۇل باستاما كەيىن اقيقاتقا اينالىپ, ەسىلدىڭ بويىندا قازاقتىڭ اسەم شاھارى بوي كوتەرگەنىن جەتكىزدى.
– قازىرگى تاڭدا استانا قارقىندى دامىپ كەلەدى. ەلوردامىزدا نەبىر ايشىقتى عيماراتتار بوي كوتەردى. قالا تۇرعىندارىنىڭ سانى رەسمي دەرەك بويىنشا 800 مىڭعا جەتتى. الايدا, قالاعا اعىلىپ جاتقان ەل كوپ. ولاردىڭ ىشىندە تىركەلمەگەندەرى دە قانشاما. سوندىقتان 1 ميلليونعا جەتتىك دەۋگە دە نەگىز بار. ال, كەزىندە شاھار حالقى نەبارى 200 مىڭداي بولعان, – دەدى يمانعالي تاسماعامبەتوۆ.
ەلورداعا ينۆەستيتسيا تارتۋعا ايرىقشا كوڭىل ءبولىنىپ وتىرعانىنا توقتالعان قالا اكىمى «استانا – جاڭا قالا» ارناۋلى ەكونوميكالىق ايماعىندا ورنالاسقان يندۋستريالدىق پاركتە ينۆەستورلاردى تارتۋعا قولايلى جاعداي جاسالعانىن, نىساندار سالىنىپ جاتقان ورىن جەر سالىعىنان بوساتىلاتىنىن ايتتى.
استانا اكىمىنىڭ جىلى قابىلداۋىنا ريزاشىلىعىن بىلدىرگەن يرەك يالالوۆ مىرزا ۋفا قالاسىنىڭ بۇگىندە قانشالىقتى جەتىستىككە جەتكەنىن اڭگىمەلەدى.
بۇگىندە باشقۇرتستان استاناسى ءومىر سۇرۋگە قولايلىلىعى مەن بيزنەستى دامىتۋ جاعىنان رەسەيدەگى قالالاردىڭ ىشىنەن ەكىنشى ورىندى, قۇرىلىس سالۋ جاعىنان ءۇشىنشى ورىندى يەلەنەدى ەكەن. ءارى ۋفا – الەمدىك دەڭگەيدەگى 8 بىردەي قوناقۇيدى قاتارىنان سالىپ جاتقان بىردەن-ءبىر شاھار. رەسەيدەگى حالقىنىڭ سانى ميلليوننان اساتىن 12 قالانىڭ ءبىرى دە وسى ۋفا. باشقۇرتستان رەسپۋبليكاسىنداعى ونەركاسىپتىڭ 50 پايىزى وسىندا ورنالاسقان. قالانىڭ نەگىزگى قۇراۋشى كۇشى – ونەركاسىپ ەكەندىگى دە سوندىقتان.
بۇدان كەيىن قوس تاراپ دوستىق جانە ىنتىماقتاستىق تۋرالى كەلىسىمگە قول قويدى.
قۇجات ساۋدا-ەكونوميكالىق, مادەنيەتتىك جانە گۋمانيتارلىق ءوزارا قارىم-قاتىناستاردى كەڭەيتۋگە باعىتتالعان. اسىرەسە, استانا مەن ۋفا كولىك, تۇرعىن ءۇي-كوممۋنالدىق شارۋاشىلىق, اقپاراتتاندىرۋ جانە بايلانىس سالالارىندا تاجىريبەلەر مەن اقپاراتتار الماسۋ تۋرالى كەلىسىمگە كەلدى.
ىنتىماقتاستىقتىڭ اۋقىمدى بولىگى تابيعاتتى قورعاۋعا ارنالعان. اتاپ ايتقاندا, قوس تاراپ اۋىزسۋ جانە ناۋالاردى تازارتۋدىڭ جاڭا تەحنولوگيالارىن ەنگىزۋ, ونەركاسىپتىك كاسىپورىنداردىڭ قورشاعان ورتانى قورعاۋى, تۇرمىستىق جانە ونەركاسىپتىك قاتقىل قالدىقتاردى جيناۋ, قايتا وڭدەۋ جانە كومۋ جۇيەسىن جەتىلدىرۋ, تابيعي نەمەسە تەحنوگەندى سيپاتتاعى اپاتتاردى جويۋ جانە ەكولوگيالىق ساقتاندىرۋ مەن سەرتيفيكاتتاۋدى ەنگىزۋ جۇيەلەرىن جەتىلدىرۋ بويىنشا كوپتەگەن جوبالاردى جۇزەگە اسىرۋعا ۋاعدالاستى.
قىمبات توقتامۇرات
