6-10 قاراشا ارالىعىندا وقۋشىلار سارايىندا استانا قالاسى اكىمدىگى مەن يسپانيانىڭ قازاقستان رەسپۋبليكاسىنداعى ەلشىلىگىنىڭ ۇيىمداستىرۋىمەن «FIESTALONIA-قازاقستان» حالىقارالىق بايقاۋى وتەدى.
بيىل بايقاۋدى ەۋروپالىق فەستيۆال كوميتەتى العاش رەت ەۋرووداقتان تىس جەردە, ياعني, ءبىزدىڭ ەلىمىزدە وتكىزىپ وتىر. بايقاۋدىڭ قازىلار القاسى – حالىقارلىق اككرەديتاتسيادان وتكەن الەمگە ايگىلى مۋزىكانتتار, بيشىلەر مەن ۆوكاليستەر.
بالالار مەن جاستار اراسىندا جاڭا دارىنداردى انىقتاپ, ولاردى حالىقارالىق دەڭگەيگە شىعارۋدى جانە شىعارماشىلىق ۇجىمدار اراسىنداعى تاجىريبە الماسۋدى ماقسات تۇتاتىن ءىس-شاراعا حالىقارالىق دەڭگەيدەگى حورەوگرافيالىق ۇجىمدار, انسامبلدەر, شوۋ-بالەتتەر, بي جانە ءسان تەاترلارى, اسپاپتى مۋزىكا ورىنداۋشىلارى, وركەسترلەر, حور ۇجىمدارى, بالالار حورى, فولكلورلىق انشىلەر, پوپ, دجاز, گوسپەل-سپيريۋچۋەل ورىنداۋشىلارى, ۆوكالدىق ورىنداۋشىلار قاتىسپاق.
بايقاۋ كەزىندە قازىلار القاسى مۇشەلەرى مەن الەمدىك دەڭگەيدەگى تانىمال مۋزىكانتتار ۇستازدار مەن وقۋشىلار ءۇشىن شەبەرلىك ساباقتارىن وتكىزەدى. سايىس قورىتىندىلارى بويىنشا ءاربىر قاتىسۋشىعا جەكە ءنومىرى بار ەۋروپالىق ۇلگىدەگى ديپلوم تابىس ەتىلەدى. ۇزدىك ۇجىمدار مەن جەكەلەگەن ورىنداۋشىلار يسپانيا, يتاليا, فرانتسيا ەلدەرىنىڭ اتاقتى ساحنالارىندا ونەر كورسەتۋگە جولداما الادى.
جۇما عازيەۆ
