استانا قالاسىندا گرەك-ريم, ەركىن جانە ايەلدەر كۇرەسىنەن قازاقستان كۋبوگى ءۇشىن وتكەن جارىس مارەسىنە جەتتى.
كوماندالىق جارىس جۇيەسىمەن العاش رەت ۇيىمداستىرىلعان بايراقتى باسەكەگە ەلىمىزدىڭ بارلىق ايماقتارىنان بالۋاندار قاتىسىپ, جەر-جەردەگى كۇرەس ونەرىنىڭ دامۋ كورسەتكىشىن سارالاۋعا مۇمكىندىك تۋعانداي بولدى. وسى رەتتە الماتى وبلىسىندا كۇرەسكە ايرىقشا ءمان بەرىلىپ وتىرعانى بايقالدى. اتاپ ايتقاندا, گرەك-ريم كۇرەسىندە الماتى وبلىسىنىڭ بالۋاندارى اقتىق كەزدەسۋدە الماتى قالاسىنان باسىم ءتۇسىپ قازاقستان كۋبوگىن جەڭىپ الدى. ال ءۇشىنشى ورىن ءۇشىن استانا مەن وڭتۇستىك قازاقستان بالۋاندارى كۇش سىناستى. بۇل سىندا افينى وليمپياداسىنىڭ كۇمىس جۇلدەگەرى گەورگي تسۋرتسۋميا باپتايتىن ەلوردالىق بالۋاندار قارسىلاستارىن 7:1 ەسەبىمەن تىزە بۇكتىردى.
ەركىن كۇرەستە تاعى دا الماتى وبلىسى جەڭىمپاز اتاندى. قۇرامىندا نۇرماحان تىناليەۆ, مارعۇلان اسەمبەكوۆ سەكىلدى مىقتى بالۋاندارى بار كوماندا فينالدا بوز كىلەم يەلەرىن, ياعني, استانا قۇراماسىن 5:3 ەسەبىمەن جەڭىپ كەتتى. ءۇشىنشى ورىن ءۇشىن باسەكەدە الماتى قالاسىنىڭ بالۋاندارى جامبىل وبلىسى قۇراماسىنان باسىم ءتۇستى.
ال ايەلدەر كۇرەسىندە قازاقستان كۋبوگىن استانا ارۋلارى جەڭىپ الدى. ساپىندا ۇلتتىق قۇرامانىڭ ۇزدىكتەرى تاتيانا امانجول, جۇلدىز ەشيموۆا, ايىم ءابىلدينا جانە گيۋزەل مانيۋروۆا بار ەلوردالىق كوماندا بارلىق قارسىلاستارىنان وق بويى الدا بولدى. ايەلدەر كۇرەسىندە ەكىنشى ورىنعا الماتى قالاسىنىڭ, ءۇشىنشى ورىنعا پاۆلودار وبلىسىنىڭ بالۋان قىزدارى كوتەرىلدى.
جاڭا جۇيەمەن وتكەن قازاقستان كۋبوگى جەڭىمپازدارى مەن جۇلدەگەرلەرىن قازاقستان گرەك-ريم, ەركىن جانە ايەلدەر كۇرەسى فەدەراتسياسىنىڭ پرەزيدەنتى ساۋات مىڭباەۆ, وليمپيادا ويىندارىنىڭ جەڭىمپازدارى جاقسىلىق ۇشكەمپىروۆ پەن سەرگەي بەلوگلازوۆ, ۇلتتىق قۇرامانىڭ باس باپكەرلەرى قۇتتىقتاپ, كۋبوك پەن ديپلومداردى جانە اقشالاي سىيلىقتاردى تابىس ەتتى.
دايىنداعان: عالىم قوجابەكوۆ
