جاس عالىمدار باس قوستى
جاقىندا مەملەكەت تاريحى ينستيتۋتى مەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جاس تاريحشىلارىنىڭ ۇيىمداستىرۋمەن «جاس تاريحشىلاردىڭ رەسپۋبليكالىق قاۋىمداستىعى» قۇرىلعان بولاتىن.ەندى, مىنە, وسى قاۋىمداستىق بىرنەشە عىلىمي زەرتتەۋ جوبالارىن 2014-16 جىلدارى جۇزەگە اسىرۋدى جوسپارلاپ وتىر.
وسىعان وراي مەملەكەت تاريحى ينستيتۋتىنىڭ ءماجىلىس زالىندا «وتان تاريحىنىڭ وزەكتى ماسەلەلەرى جانە ونى زەرتتەۋگە جاس عالىمداردىڭ قاتىسۋى» تاقىرىبىندا ءدوڭگەلەك ءۇستەل ءماجىلىسى ءوتتى.
ءىس-شاراعا مەملەكەت تاريحى ينستيتۋتىنىڭ ديرەكتورى, تاريح عىلىمىنىڭ دوكتورى, پروفەسسور بۇركىتباي اياعان, ءا.مارعۇلان اتىنداعى ارحەولوگيا ينستيتۋتىنىڭ استانا ءبولىمشەسىنىڭ ديرەكتوى, تاريح عىلىمىنىڭ كانديداتى اقان وڭعار, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ اعا عىلىمي قىزمەتكەرى, تاريح عىلىمىنىڭ كانديداتى ءداۋىتحان راحىمقۇلوۆ جانە «جاس تاريحشىلاردىڭ رەسپۋبليكالىق قاۋىمداستىعى» قوعامدىق بىرلەستىگىنىڭ ءار وڭىردەگى مۇشەلەرى مەن بۇقارالىق اقپارات قۇرالدارى وكىلدەرى قاتىستى.
جيىندا مەملەكەت تاريحى ينستيتۋتىنىڭ اعا عىلىمي قىزمەتكەرى قانات ەڭسەنوۆ بىرلەستىكتىڭ اتقارىپ جاتقان جۇمىستارى مەن كەلەشەكتە العا قويىلعان ماقسات-مىندەتتەرىنە ەگجەي-تەگجەيلى كەڭىنەن توقتالدى.
«جاس تاريحشىلاردىڭ رەسپۋبليكالىق قاۋىمداستىعى» قوعامدىق ءبىرلەستىگىنىڭ ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندەگى مۇشەسى, تاريح ماگيسترى گۇلميرا قارساقوۆا, ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىندەگى مۇشەسى, ت.ع.ك. جۇلدىز قارسىباەۆا, ش. ءۋاليحانوۆ اتىنداعى تاريح جانە ەتنولوگيا ينستيتۋتىنداعى مۇشەسى, عىلىمي قىزمەتكەر الماس ءجۇنىسباەۆ, ق. جۇبانوۆ اتىنداعى اقتوبە ءوڭىرلىك مەملەكەتتىك ۋنيۆەرسيتەتىندەگى مۇشەسى, تاريح ماگيسترى باقىت بايشوۆ وتان تاريحىن زەرتتەۋدىڭ وزەكتى ماسەلەلەرىنە قاتىستى وي ءبولىسىپ, وڭىرلەردەگى تاريح ءپانىنىڭ زەرتتەلۋ دەڭگەيى مەن ماسەلەلەرى ءجونىندە تارقاتىپ ايتىپ بەردى.
باس قوسۋ سوڭىندا جاستار كەلەشەكتە اتقارىلاتىن جۇمىستسپارلارىن بەلگىلەدى.
تاعى ءبىر ايتا كەتەرلىگى, جاس عالىمدار مەن تاريحشىلارعا ارنالعان «تاريح تاعىلىمى» رەسپۋبليكالىق عىلىمي جۋرنالى شىعاتىن بولدى. جۋرنال توقسان سايىن قازاق, ورىس جانە اعىلشىن ءتىلدەرىندە جارىق كورەدى.