اۋىل شارۋاشىلىعى ءمينيسترى ەربول قاراشوكەەۆ نۇر-سۇلتان قالاسىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ ۇزدىك جاس عالىمدارىمەن كەزدەسىپ, اۋىل شارۋاشىلىعىن دامىتۋ جانە مينيسترلىك ءۇشىن كادرلىق رەزەرۆ دايارلاۋ ماسەلەلەرىن تالقىلادى.
مينيستر ءوز سوزىندە ەلىمىز ءۇشىن بىلىكتى كادرلار دايارلاۋ ساپاسىن جاقسارتۋ, جوعارى وقۋ ورىندارى مەن عىلىمي-زەرتتەۋ ينستيتۋتتارىن مەملەكەتتىك قولداۋ, اگروونەركاسىپتىك كەشەننىڭ باسەكەگە قابىلەتتىلىگىن ارتتىرۋ ءۇشىن جاسالىنىپ جاتقان يگىلىكتى ىستەر تۋرالى ايتا كەلىپ, قر ۇكىمەتى بەكىتكەن 2021-2025 جىلدارعا ارنالعان اگروونەركاسىپتىك كەشەندى دامىتۋ جونىندەگى ۇلتتىق جوبانىڭ ەرەكشەلىكتەرىنە ەگجەي-تەگجەيلى توقتالدى.
– مينيسترلىك ءۇشىن كادرلىق رەزەرۆتى قالىپتاستىرۋ – وتە اۋقىمدى, شىعارماشىلىق سيپاتتاعى جانە ستاندارتتى ەمەس بەلگىلەرى بار كۇردەلى پروتسەسس. كادرلىق رەزەرۆتى قالىپتاستىرۋعا, دامىتۋعا جانە پايدالانۋعا ءتان الەمدىك بىرقاتار تاجىريبەلىك تاسىلدەر بار. ولاردىڭ بارلىعى دا ادەتتە اۋىل شارۋاشىلىعى كەشەنىنە قاجەتتىلىكتەرگە جاۋاپ بەرەتىنى انىق. ءبىز دە سول حالىقارالىق تاجىريبەلەرگە سۇيەنەمىز ءارى وسىنداي اشىق ديالوگ ارقىلى وتەتىن كەزدەسۋلەردىڭ دە جاقسى ناتيجەلەر بەرەتىنىنە سەنەمىز. بۇل مەملەكەت باسشىسىنىڭ اگرو سالاسىنىڭ الدىنا قويعان ماقساتتارعا جەتۋىمىزگە كومەكتەسەدى. سوندىقتان ءبىز ءۇشىن وزەكتى زەرتتەۋلەر مەن عىلىمي جۇمىستار جۇرگىزۋ ارقىلى جەرگىلىكتى جەرلەردە ماسەلەلەردى شەشە الاتىن جاستارمەن كەرى بايلانىس ورناتۋ وتە ماڭىزدى, – دەدى مينيستر ەربول قاراشوكەەۆ.
كەزدەسۋگە قازۇازۋ-دىڭ اتىنان 10 جاس عالىم قاتىستى. ءوز كەزەگىندە توپ جەتەكشىسى, جاس عالىم بەكزات تورەگەلديەۆ قازۇازۋ جاس عالىمدار كەڭەسىنىڭ قىزمەتى جانە ۋنيۆەرسيتەتتىڭ جەتىستىكتەرى مەن الداعى دامۋ جوسپارلارى تۋرالى ايتىپ بەردى.
«ۋنيۆەرسيتەتتىڭ جاس عالىمدار كەڭەسى ەلىمىزدىڭ جوعارى وقۋ ورىندارى اراسىندا قر تۇڭعىش پرەزيدەنتى – ەلباسى قورىنىڭ «ۇزدىك جاس عالىمدار كەڭەسى» اتاعىنا يە بولدى. ۋنيۆەرسيتەتتىڭ حالىقارالىق ءبىلىم حابى تابىستى جۇمىس ىستەۋدە: اكادەميالىق ۇتقىرلىق دامۋدا, ءۇش تىلدە ءبىلىم بەرۋ, سونداي-اق اعىلشىن تىلىندە وقىتۋ جۇرگىزىلۋدە. 15 باعىت بويىنشا حالىقارالىق جازعى جانە قىسقى مەكتەپتەر وتكىزىلەدى. قۇرامىندا 7 عىلىمي-زەرتتەۋ ينستيتۋت, 8 يننوۆاتسيالىق ورتالىق, 49 زەرتتەۋ زەرتحاناسى, 18 حالىقارالىق زەرتتەۋ ورتالىعى جۇمىس ىستەيتىن حالىقارالىق اگروتەحنولوگيالىق حابتىڭ يننوۆاتسيالىق قىزمەتى كەڭەيتىلۋدە» دەدى بەكزات تورەگەلديەۆ.
ءوز كەزەگىندە مينيستر ەربول شىراقپايۇلى ەلىمىزدىڭ الەۋمەتتىك-ەكونوميكالىق جانە عىلىمي-ءبىلىم بەرۋ سالاسىنىڭ ءتۇرلى ماسەلەلەرىنە قاتىستى بارلىق سۇراقتارعا جاۋاپ بەرىپ, الداعى ۋاقىتتا مۇنداي كەزدەسۋلەر تۇراقتى سيپاتقا يە بولىپ, اگرارلىق سەكتوردىڭ دامۋىنا جاڭا سەرپىن بەرەتىنىنە سەندىردى.
