كۇنى كەشە استانا قالاسى اكىمى اسەت يسەكەشەۆتىڭ قولىنان ءبىر توپ مەديتسينا قىزمەتكەرلەرى پاتەردىڭ كىلتىن العان بولاتىن. سولاردىڭ ىشىندە №2 قالالىق بالالار اۋرۋحاناسىنىڭ انەستەزيولوگ-رەانيماتولوگ دارىگەرى ساعىنعالي سەيىتجان دا بولدى. بەس جىلدان بەرى مەديتسينا سالاسىندا قىزمەت ەتىپ كەلە جاتقان ول ءوزىنىڭ ءۇيلى بولعانىنا سەنەر ەمەس. الايدا جۇزدەگەن جاننىڭ ءومىرىن اجالدان قۇتقارعان دارىگەردىڭ ەڭبەگى قانداي قۇرمەتكە بولسا دا لايىق.
ساعىنعالي سەيىتجان 2005 جىلى وڭتۇستىك قازاقستان وبلىسىنا قاراستى كەنتاۋ قالاسىنان قاراعاندى مەملەكەتتىك مەديتسينالىق ۋنيۆەرسيتەتىنە وقۋعا كەلىپ تۇسەدى. اتالعان ۋنيۆەرسيتەتتەن ءبىلىم نارىنە قانىققان دارىگەر 2012 جىلى №2 قالالىق بالالار اۋرۋحاناسىنا كەلىپ جۇمىسقا ورنالاسادى. وقۋىن حيرۋرگ دارىگەرى رەتىندە ءبىتىرىپ شىققان ول كەيىن كەلە انەستەزيولوگ-رەانيماتولوگ ماماندىعىن مەڭگەرىپ الادى.
– قۇدايعا شۇكىر, وسى ماماندىقتىڭ ارقاسىندا تالاي ادامنىڭ ءومىرىن اجالدان اراشالاپ قالۋعا سەبەپكەر بولدىم. ويتكەنى انەستەزيولوگ-رەانيماتولوگ بولعاندىقتان ءبىز ءولىم مەن ءومىردىڭ ورتاسىندا جۇرەمىز. ءوزىڭىز بىلەسىز, بالالاردى قاراپ, ولاردى ەمدەۋ وڭاي شارۋا ەمەس. ويتكەنى بالالار ناقتى قاي جەرى اۋىرىپ تۇرعانىن ەرەسەك ادامدار سياقتى ايتا المايدى. تەك مەديتسينانىڭ الىپبيىمەن ناۋقاسىن انىقتاپ, دياگنوز قويىپ جاتامىز. ونىڭ ۇستىنە اۋىر جاعدايدا كەلىپ تۇسكەن بالالاردى قاراۋ پسيحولوگيالىق تۇرعىدان وتە قيىن. كەيدە ءوزىمدى وسى ماماندىققا قۇداي ايداپ كەلگەن شىعار دەپ ويلايمىن. سوندىقتان دا ءوزىمدى باسقا سالانىڭ مامانى رەتىندە ەلەستەتە المايمىن. سەبەبى اۋىر جاعدايدا كەلىپ تۇسكەن بالانىڭ بەتى بەرى قاراعان كەزدە دارىگەرلىكتەن ارتىق ماماندىق جوق دەپ ويلايمىن, – دەيدى ول.
ساعىنعالي سەيىتجان بىلىكتى مامان ءاردايىم ءوزىن جەتىلدىرىپ وتىرۋى قاجەت دەپ ەسەپتەيدى. سوندىقتان دا ول ءوزىنىڭ كاسىبي ءبىلىمىن ارتتىرۋ ءۇشىن كوپ ىزدەنەتىنىن ايتادى.
– انەستەزيولوگيا-رەانيماتولوگيا سالاسىندا ءبىزدىڭ ەلدە ءالى دە بولسا دامىتاتىن تۇستارىمىز جەتەرلىك. ماسەلەن, شەت ەلدىڭ سۋ جاڭا قۇرىلعىلارىن ساتىپ الىپ, ەلىمىزگە اكەلىپ ورناتساق, نۇر ۇستىنە نۇر بولار ەدى. ءيا, قازىرگى تاڭدا اۋرۋحانالارىمىزدا كوپتەگەن قۇرىلعىلار بار. بىراق اۋرۋحانالارىمىزدىڭ حالىقارالىق تالاپتارعا ساي بولۋى ءۇشىن ودان ءارى تاجىريبەمىزدى ارتتىرا ءتۇسۋىمىز كەرەك. سوندىقتان دا مەن وسىمەن شەكتەلىپ قالماي, العا قاراي ۇمتىلىپ, ءبىلىمىمدى جەتىلدىرسەم دەيمىن. ناقتىراق ايتسام, «بولاشاق» باعدارلاماسى بويىنشا شەت ەلدە ءبىلىم العىم كەلەدى, – دەيدى دارىگەر.
ساعىنعالي سەيىتجاننىڭ زايىبى نۇرشات امانجول فەلدشەر ماماندىعىن العان ەكەن. الايدا ول بۇگىندە ەكى بالانىڭ كۇتىمى بويىنشا ۇيدە دەكرەتتىك دەمالىستا وتىر. جالپى, جاس وتباسى ءۇشىن قالا اكىمىنىڭ قولىنان پاتەر كىلتىن الۋ – ۇمىتىلماس وقيعا.
سەرىك جولداسباي
