جاڭالىقتار
جاس پاتريوتتار جارىسى
استانا قالاسىنداعى «قازتۇتىنۋوداعىنىڭ» ساۋدا-ەكونوميكالىق كوللەدجىندە مەملەكەتتىك رامىزدەر كۇنىنە ارنالعان اسكەري-پاتريوتتىق شارا وتكىزىلدى. ونىڭ جەڭىمپازدارى ەكى قاباتتى تۋريستىك اۆتوبۋسپەن استانا قالاسىنىڭ كورنەكتى ورىندارىن ارالاۋعا مۇمكىندىك الدى.
بۇل شارا بايقاۋ ءتۇرىندە وتكىزىلدى. قاتىسۋشىلار «ۇزدىك كوماندير», «ءۇزدىك اۆتومات قۇراستىرۋشى», «ۇزدىك اسكەري كيىم», «ۇزدىك اسكەري جاتتىقتىرۋشى» نوميناتسيالارى بويىنشا سايىسقا ءتۇستى. بولاشاق جاۋىنگەرلەر وتان قورعاۋعا قاۋقارلى ەكەنىن اڭعارتتى. سونداي-اق, العاشقى اسكەري دايىندىققا سايما-ساي ەكەنىن كورسەتتى.
«اسكەري-پاتريوتتىق شارا وتكىزۋىمىزدىڭ ءبىر سەبەبى – ەلىمىزدىڭ ەرتەڭىن سەنىپ تاپسىرا الاتىن دەنساۋلىعى مىقتى, العاشقى اسكەري دايىندىقتارىنان وتكەن ازاماتتاردى تاربيەلەپ شىعارۋ. بولاشاق سارباز بوسبەلبەۋ بولماس ءۇشىن اتا-انالارمەن قاتار, سول ازامات وقيتىن وقۋ ورنى دا بۇل ماسەلەنى ەستەن شىعارماۋ كەرەك. ويتكەنى, وتاندى قورعاۋ – ابىرويلى مىندەت» دەيدى كوللەدج ديرەكتورى مىرزابەك كۇجىموۆ.
قىمبات نۇرعالي