بۋرابايداعى «بالداۋرەن» رەسپۋبليكالىق وقۋ-ساۋىقتىرۋ ورتالىعى ونداعان جىلدان بەرى وقۋشىلارعا جىل بويى قىزمەت ەتىپ كەلەدى. وندا ءار اۋىسىم سايىن ەلىمىزدىڭ بارلىق وڭىرىنەن جۇزدەگەن بالا كەلىپ, وقۋىن ۇزبەي, دەمالۋ داستۇرگە اينالعان.
بۇرىنعى كەزدە مۇنداي وقۋشىلار لاگەرى قىرىمدا بولاتىن. ونى «ارتەك» دەپ اتاعان. «ارتەككە» بارىپ-قايتۋ ۇل مەن قىزدىڭ ارمانى سانالاتىن. قازىر ازات ەلىمىزدىڭ «بالداۋرەن» كەشەنى سونداي ۇردىستە قىزمەت ەتىپ وتىر. ءبىر اتاپ ايتارلىعى, العاشقى كەزدە بۋرابايدا عانا بولسا, قازىر ەلىمىزدىڭ وزگە وڭىرلەرىندە دە بولىمشەلەرى قۇرىلا باستادى. اتاپ ايتقاندا, الماتى, تۇركىستان وبلىستارىندا وقۋشىلار لاگەرى بىرنەشە جىلدان بەرى جۇمىس جاساۋ ۇستىندە. وسى بولىمدەر ارقىلى وزات بالالاردى «بالداۋرەنگە» جىبەرۋ دە داستۇرگە اينالىپ وتىر.
جاقىندا «بالداۋرەننىڭ» ءبىر بولىمشەسى سانالاتىن «بالداۋرەن-قاپشاعاي» رەسپۋبليكالىق وقۋ-ساۋىقتىرۋ ورتالىعىندا تاقىرىپتىق شارا ءوتتى. وعان حالىق قاھارمانى, پارلامەنت ءماجىلىسىنىڭ دەپۋتاتى باقىتجان ەرتاەۆ ارنايى بارىپ قاتىسىپ, دەمالىپ جاتقان وقۋشىلارمەن ديدارلاستى. بۇل يگىلىكتى شاراعا اتالمىش ورتالىقتىڭ باس ديرەكتورى م.تولەپباي, «نۇر وتان» پارتياسى» قاپشاعاي قالالىق فيليالىنىڭ توراعاسى ە.نۇرپەيىسوۆ, وزگە دە ازاماتتار قاتىستى.
شاراعا قاتىسۋشىلار «قازاقستاندىق جاس پاتريوتتىقتار اكادەمياسى» قۇرىلىمى بويىنشا بەرىلىپ جاتقان تاربيە تاسىلدەرىمەن تانىستى. حالىق قالاۋلىسى مۇنداي جاقسى قادام بارلىق جەردە ءورىس الۋى كەرەكتىگىن ەسكە سالدى. بەلسەندى وقۋشىلارعا «قازاقستاننىڭ جاس پاتريوتتارى» توسبەلگىسىن تاپسىرىپ تۇرىپ, ب.ەرتاەۆ بۇل ۇلكەن جاۋاپكەرشىلىك جۇكتەيتىنىن, پاتريوتتىق سەزىم وسىنداي ىزدەنىستەردىڭ ناتيجەسىندە قالىپتاساتىنىن تىلگە تيەك ەتتى. سونىمەن قاتار, بۇگىنگى قازاق ەلىنىڭ بار ارمان-اڭسارى ەل تاۋەلسىزدىگىن بەكەم ەتۋ ەكەنىن دە ەسكە سالدى. ديدارلاسۋ ۇستىندە ەلباسى جولداۋىندا ايتىلعان حالىقتىڭ الەۋمەتتىك جاعدايىن كوتەرۋ جايىنداعى تاپسىرمالار ءسوز بولىپ, اسىرەسە, ۇستاز مارتەبەسىن كوتەرۋ, بۇل ىستە وقۋشىلاردىڭ مۇعالىمدەرىن قۇرمەتتەۋ قاجەتتىگىن نازارعا سالىپ, الداعى جىلى بولاتىن «جاستار جىلىنا» قاتىستى ويلارىن دا ايتتى.
قاسىم-جومارت سۇلەيمەن
