كەلەسى اپتادا بەيبىتشىلىك جانە كەلىسىم سارايىندا «جاس قانات – 2016» رەسپۋبليكالىق بايقاۋى كەزەكتى مارتە شىمىلدىعىن تۇرەدى. دۇيسەنبى كۇنى ىرىكتەۋدەن ءوتىپ, بايقاۋعا قاتىسۋعا جولداما العان ۇمىتكەرلەر ءبىر-بىرىمەن جۇزدەسەدى. ال, 20-22 مامىر كۇندەرى ساحنادا سايىسادى.
بۇل جولعى بايقاۋ ەرەكشە بولعالى تۇر. سەبەبى, بيىل «جاس قانات» 25-ءشى رەت وتەدى. بايقاۋدىڭ مەرەيتويىنا وراي جاقىندا ونىڭ رەسمي سايتى اشىلدى. www.contest.kz مەكەنجايىنا كىرگەن ادام بيىلعى قاتىسۋشىلاردىڭ تىزىمىمەن, بايقاۋ تاريحىمەن, قاتىسۋ شارتتارىمەن تانىسىپ, جالپى ول جونىندە تولىققاندى اقپارات الادى.
بيىلعى قاتىسۋشىلارعا كەلسەك, ىرىكتەۋدەن وتكەن 30 جاسقا دەيىنگى 14 ءانشى اقتىق كەزەڭگە جولداما الدى. ەلىمىزدىڭ تۇكپىر-تۇكپىرىنەن جينالعان انشىلەردىڭ اراسىندا اقجول ساپارالى جانە جالعاس سۇلتانوۆ اتتى ەكى استانالىق ۇمىتكەر بار. جالپى, 25 جىلدا استانالىق جاس انشىلەر ءتورت رەت جەڭىسكە جەتتى. سوڭعى رەت وسىدان ەكى جىل بۇرىن ەلدار وماروۆ باس قالاعا ءبىرىنشى ورىندى الىپ بەردى.
ال, اتالمىش بايقاۋ مەدەۋ ارىنباەۆ, نۇرلان ابدۋللين, گاۋھار قاسپاقوۆا, گۇلنۇر ورازىمبەتوۆا, ءمادينا سادۋاقاسوۆا, نۇرجان قالجان, ت.ب. بەلگىلى انشىلەردىڭ ونەر جولىنداعى العاشقى باسپالداق بولدى.
بايقاۋ جەڭىمپازدارى «التىن قانات», «كۇمىس قانات», «قولا قانات» سىندى جۇلدەلەردەن بولەك استانا قالاسى اكىمىنىڭ, قالالىق مادەنيەت, مۇراعاتتار جانە قۇجاتتامالار باسقارماسىنىڭ, سونداي-اق, «حابار» اگەنتتىگىنىڭ ارنايى جۇلدەسىمەن ماراپاتتالاتىنىن ايتا كەتەيىك.
امانعالي قالجانوۆ
