قۇتقارۋشىلار كۇنىنە وراي ەلوردانىڭ Binom مەكتەپتەرى اراسىندا «جاس قۇتقارۋشىلار» زياتكەرلىك سايىسى ءوتتى. ءبىلىم بەرۋ ۇيىمدارىندا توتەنشە جاعدايلار كەزىندە بالالار مەن جاسوسپىرىمدەردىڭ قاۋىپسىزدىگىن قامتاماسىز ەتۋ ماقساتىندا ۇيىمداستىرىلعان ءىس-شارانى ەسىل اۋدانى اكىمدىگى مەن ەسىل اۋدانى توتەنشە جاعدايلار باسقارماسى بىرلەسە ۇيىمداستىردى.
زياتكەرلىك سايىس 5 وقۋشىدان قۇرالعان 6 توپتىڭ باسىن قوستى. «تانىستىرۋ», «برەين-رينگ», «مەن قۇتقارۋشىمىن», «نە؟ قايدا؟ قاشان؟» اتتى 4 كەزەڭ بويىنشا قاتىسۋشىلار بىلىمدەرىن ورتاعا سالدى. ءار كوماندا توپ اتاۋى مەن ءوز ۇراندارىن دا دايىنداپ كەلگەن.
– ينتەللەكتۋالدى سايىس ءبىرىنشى كەزەكتە قۇتقارۋشىلار كۇنىنە وراي وتكىزىلدى. بۇل جارىس بالالاردىڭ توتەنشە جاعداي بولعان ساتتە ءوزىن-ءوزى قالاي ۇستاۋ كەرەك ەكەنىن, ءارى زارداپ شەككەندەرگە العاشقى مەديتسينالىق كومەك كورسەتۋدى دۇرىس ۇيرەتۋگە باعىتتالدى. بيىل سايىس ويىن-ساۋىق فورماتىندا وتكىزىلۋىمەن ەرەكشەلەندى, – دەدى ءوز سوزىندە ەسىل اۋدانى اكىمىنىڭ ورىنباسارى دارمەنيار قىدىربەكۇلى.
دوداعا ساقاداي ساي دايىندالعان قاتىسۋشىلار العاشقىدا وزدەرىن تانىستىرىپ, كەيىن ءورت قاۋىپسىزدىگى, توتەنشە جاعدايلار كەزىندە ارەكەت ەتۋ داعدىلارى, قۇتقارۋشى ماماندىعىنىڭ باعىتتارى بويىنشا سۇراقتارعا جاۋاپ بەردى. ال ءۇشىنشى كەزەڭدە العاشقى كومەك كورسەتۋ بويىنشا پراكتيكالىق تاپسىرمالاردى ورىندادى. سوڭعى كەزەڭدە توتەنشە جاعدايلار مينيسترلىگى وكىلدەرىنىڭ بەينە سۇراقتارىنا جاۋاپ بەردى.
ەسىل اۋدانى توتەنشە جاعدايلار باسقارماسىنىڭ باستىعى تالعات كاەرلينوۆتىڭ ايتۋىنشا, زياتكەرلىك سايىستار قالا مەكتەپتەرىندە تۇراقتى تۇردە وتكىزىلەدى.
«ءبىلىم بەرۋ وبەكتىلەرىندە پروفيلاكتيكالىق ءىس-شارالاردى ۇلعايتۋ ماقساتىندا Binom مەكتەپتەرى اراسىندا ۆيكتورينا ۇيىمداستىرىلدى. سايىس جوعارى سىنىپ وقۋشىلارى اراسىندا ءوتتى. سەبەبى 9-11 سىنىپ وقۋشىلارى توتەنشە جاعداي سالاسىنا وسى باستان-اق قىزىعىپ, ءتۇرلى جاعدايلاردا ارەكەت ەتۋ جولىن زەرتتەي تۇسەدى. ايتا كەتەتىنى, بيىل وقىتۋ ءادىسى وزگەرتىلدى. وقۋشىلار ءوزارا باسەكەلەسىپ, تەوريالىق تۇرعىدا بىلىمدەرىن جەتىلدىرەدى» دەدى ت.كاەرلينوۆ.
سايىس قورىتىندىسى بويىنشا ءىس-شاراعا بەلسەنە قاتىسقانى ءۇشىن قادىر مىرزا ءالي اتىنداعى Binom.School مەكتەپ-ليتسەيى, ءابىش كەكىلباەۆ اتىنداعى Binom.School مەكتەپ-ليتسەيى جانە احمەت بايتۇرسىنۇلى اتىنداعى Binom.School مەكتەپ-ليتسەيى ماراپاتتالدى. ال 3-ورىن قانىش ساتباەۆ اتىنداعى Binom.School مەكتەپ-ليتسەيىنە, 2-ورىن ءاليحان بوكەيحان اتىنداعى Binom.School مەكتەپ-ليتسەيىنە جانە 1-ورىن ىبىراي التىنسارين اتىنداعى Binom.School مەكتەپ-ليتسەيىنە تابىستالدى. جەڭىمپاز كوماندالارعا ارنايى سىيلىقتار مەن كۋبوكتار بەرىلدى.
«مەكتەپ وقۋشىلارى قازىرگى تاڭدا كۇندەلىكتى تۇرمىستا قانداي دا ءبىر وقىس وقيعا بولعاندا قالاي دۇرىس ارەكەت ەتۋ كەرەكتىگىن بىلمەيدى. سوندىقتان بۇل سايىس وقۋشىلار ءۇشىن قاجەت دەپ ويلايمىن. ءبىز «العاشقى اسكەري دايىندىق» ساباعى بارىسىندا توتەنشە جاعداي سالاسىن تەرەڭىرەك مەڭگەرىپ, ادام ومىرىنە جاۋاپكەرشىلىكپەن قاراۋعا ۇيرەنەمىز» دەدى ىبىراي التىنسارين اتىنداعى Binom.School مەكتەپ-ليتسەيىنىڭ وقۋشىسى ءنۇرىلياس توقتاروۆ.
