ەلوردادا قالا اكىمدىگىنىڭ, «استانا جاستارى» كمم جانە قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعى قولداۋىمەن «جاس سارباز – تاۋەلسىزدىك تىرەگى» جوباسىنىڭ قورىتىندى كەشى ءوتتى.
«جاس سارباز» جاسوسپىرىمدەر اسكەري-پاتريوتتىق قوزعالىسى رەسپۋبليكالىق قوعامدىق بىرلەستىگى جوباسى وسى جىلدىڭ اقپان ايىندا باستالىپ, جىل بويى جالعاستى. جوبا اياسىندا اسكەري-قولدانبالى سپورت تۇرلەرىنەن سايىستار, سپورتتىق جانە شىعارماشىلىق سايىستار, ءۇش كۇندىك اسكەري-پاتريوتتىق جيىن جانە وزگە دە 100-گە جۋىق اكتسيا مەن ءىس-شارا ۇيىمداستىرىلدى.
«ءجاسوسپىرىم جاستاردىڭ بويىندا پاتريوتتىق سەزىمدى ارتتىرۋ ءۇشىن اتالمىش جوبا اياسىندا بىرقاتار ءىس-شارا ۇيىمداستىردىق. بۇگىندە ەلوردامىزداعى 91 مەكتەپ پەن 37 كوللەدجدە «جاس سارباز» سىنىپتارى مەن كلۋبتارى قۇرىلدى. سول سياقتى 150-گە جۋىق اسكەري-پاتريوتتىق كلۋب پەن «جاس سارباز» سىنىپتارى اشىلىپ, ونداعى تاربيەلەنۋشىلەر سانى 7000-نان اسىپ وتىر. جاسوسپىرىمدەردىڭ اسكەري-پاتريوتتىق تاربيەسىن جەتىلدىرۋ ماقساتىندا ءداستۇرلى تۇردە 3 جىل كولەمىندە نۇر-سۇلتان قالاسى اكىمدىگىنىڭ قولداۋىمەن كۇزگى اسكەري-پاتريوتتىق جيىندار, جەڭىل اتلەتيكا مارافونى, فۋتبول, ۆولەيبول سپورت تۇرلەرىنەن جارىستار مەن ءىس-شارالار, سونداي-اق اسكەري-پاتريوتتىق اندەر بايقاۋى, پاتريوتتىق فيلمدەر مەن ەرلىك ساباقتارى جانە باسقا دا ءىس-شارالاردى جۇزەگە اسىرۋ ۇستىندەمىز. بۇل كەشە عانا نەگىزىن سالعان قوزعالىس ءۇشىن ۇلكەن جەتىستىك دەپ بىلەمىن. سونىمەن قاتار بيىل 2000 جاس سارباز تاربيەلەنۋشىسىنە جاس سارباز كۋالىگىن تابىستادىق» دەدى «جاس سارباز» قوزعالىسى نۇر-سۇلتان قالالىق فيليالىنىڭ توراعاسى اسحات نالشىبەك.
ءىس-شارا بارىسىندا جىل بويى ۇزدىك قىزمەت ەتكەن مەكتەپ ديرەكتورلارىنا قالا اكىمى ورىنباسارىنىڭ العىس حاتى تاپسىرىلسا, العاشقى اسكەري دايىندىق ءپانىنىڭ ۇستازدارى «جاس سارباز» قوزعالىسىنىڭ توراعاسى اتىنان العىس حاتپەن ماراپاتتالدى. كەش سوڭىندا جىلدىڭ ۇزدىك «جاس سارباز» كلۋبى انىقتالدى. بۇل سىيلىققا نۇر-سۇلتان قالاسىنداعى سىرباي ماۋلەنوۆ اتىنداعى №37 مەكتەپ-ليتسەيىنىڭ «جاس سارباز» سىنىبى يە بولدى.
