جاسامپازدىق پەن تابىستىڭ تۇعىرىنداي
كەشە ەكى كۇندىك «كونستيتۋتسيا: تۇراقتىلىق, بەيبىتشىلىك جانە قوعامدىق كەلىسىم» اتتى حالىقارالىق عىلىمي-پراكتيكالىق كونفەرەنتسيا باستالدى. كونفەرەنتسيانىڭ جۇمىسىنا قازاقستان رەسپۋبليكاسىنىڭ مەملەكەتتىك حاتشىسى, پارلامەنت دەپۋتاتتارى, بىرقاتار مينيسترلەر, مەملەكەتتىك ورگانداردىڭ باسشىلارى, شەتەلدەر مەن حالىقارالىق ۇيىمداردان كەلگەن قوناقتار قاتىستى.
– قازاقستان رەسپۋبليكاسىنىڭ پرەزيدەنتى – ۇلت كوشباسشىسى نۇرسۇلتان نازارباەۆتىڭ تىكەلەي باسشىلىعىمەن ازىرلەنگەن ەل كونستيتۋتسياسى مەملەكەت دامۋىنىڭ نەگىزىنە اينالدى. ساياسي سارا جولمەن كەلە جاتقاندىعىمىز سونىڭ ايقىن بەلگىسى, – دەگەن كونستيتۋتسيالىق كەڭەس توراعاسى يگور روگوۆ ەلباسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋى جۇكتەگەن مىندەتتەرگە توقتالدى.
مەملەكەتتىك حاتشى ادىلبەك جاقسىبەكوۆ اتا زاڭنىڭ مەملەكەتىمىزدىڭ وركەندەۋىنە, تۇتاس حالقىمىزدىڭ ۋايىمسىز ءومىر سۇرۋىنە بەرگەن مۇمكىندىكتەرى جايىندا اڭگىمەلەدى.
ەۋروپا كەڭەسىنىڭ ۆەنەتسيا كوميسسياسى توراعاسىنىڭ ورىنباسارى ەۆگەني تانچەۆ ءوزى قىزمەت ەتىپ وتىرعان ۇيىمنىڭ قۇتتىقتاۋىن جەتكىزدى.
ادىلەت ءمينيسترى بەرىك يماشەۆ «قازاقستان – 2050» ستراتەگياسى اياسىندا ۇلتتىق قۇقىقتىق جۇيەنىڭ باسەكەگە قابىلەتتىلىگىن قامتاماسىز ەتۋدەگى كونستيتۋتسيانىڭ رولىنە توقتالدى.
باس پروكۋرور اسحات داۋىلباەۆ پروكۋراتۋرا ورگاندارىنىڭ قوعامداعى تۇراقتىلىقتىڭ, بەيبىتشىلىك پەن كەلىسىمنىڭ كونستيتۋتسيالىق نەگىزدەرىن ساقتاۋ جولىندا اتقارىپ وتىرعان جۇمىستارىنان حاباردار ەتتى.
قازاقستان رەسپۋبليكاسىنداعى ادام قۇقىلارى جونىندەگى ۋاكىل اسقار شاكىروۆ ەلىمىزدەگى ۋاكىلدىكتە حالقىمىزدىڭ كونستيتۋتسيالىق قۇقىلارىنىڭ بۇزىلماۋى جانە مەملەكەتىمىزدەگى تۇراقتىلىق پەن قوعامدىق كەلىسىمنىڭ ساقتالۋى ءۇشىن نە ىستەلىنىپ جاتقانىن باياندادى. ەلىمىزدە قوعامدىق كەلىسىمنىڭ ۇلگىسىن قالىپتاستىرۋ جونىندە سويلەگەن مادەنيەت جانە سپورت ءمينيسترى ارىستانبەك مۇحامەديۇلى ونىڭ ءسوزىن تولىقتىرا ءتۇستى.
ساياساتتانۋشى, رەسەي فەدەراتسياسى ۇلتتىق ستراتەگيا ينستيتۋتىنىڭ حالىقارالىق باعدارلامالار جونىندەگى ديرەكتورى يۋري سولوزوبوۆ قازاقستان ءوز كونستيتۋتسياسىن قابىلداعان ۋاقىتتان بەرى جاسامپازدىق پەن تابىستىڭ جولىمەن كەلە جاتقاندىعىن اتاپ ءوتتى. ول دا مەملەكەت باسشىسى نۇرسۇلتان نازارباەۆتىڭ ەڭبەگىنە جوعارى باعا بەردى.
سۇبەلى ءسوز
ادىلبەك جاقسىبەكوۆ, قر مەملەكەتتىك حاتشىسى:
اتا زاڭدا – مەملەكەتتىڭ قالىپتاسۋ باعىتتارى كورسەتىلگەن. ازاماتتاردىڭ قۇقىلارى مەن بوستاندىقتارى ايقىندالعان. قازاقتىڭ ءوزى قابىلداعان كونستيتۋتسيا ەل دامۋىنا جول اشتى. ەلباسى اتا زاڭ ارقىلى قازاقستاندى مىقتى مەملەكەتكە اينالدىردى. ەلىمىزدە بىرلىك پەن تاتۋلىق ورنادى. ەكونوميكا مەن دەموكراتيا دامىدى. وتانداستاردىڭ بويىنا قازاقستاندىق ءپاتريوتيزمنىڭ رۋحى سەبىلدى. ەڭ باستىسى – قازاقستان تاۋەلسىز مەملەكەت ەكەنىن الەمگە تانىتتى.
قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ماحاببات بەكبوسىنوۆا ەلىمىزدەگى ايەلدەردىڭ قۇقىلارىن قامتاماسىز ەتۋ دەڭگەيىن سارالادى. «مەملەكەت باسشىسى نۇرسۇلتان نازارباەۆتىڭ جارلىعىمەن بەكىتىلگەن 2006-2016 جىلدارعا ارنالعان گەندەرلىك تەڭدىك تۋرالى ستراتەگياسى قاي سالادا بولماسىن نازىك جاندىلاردىڭ بەلسەندىلىگىن ارتتىردى. ونىڭ كۋاسى – مەملەكەتتىك بيلىك ورگاندارىندا سوڭعى جىلدارى ايەلدەردىڭ ەكى ەسە كوبەيگەندىگى. ماسەلەن, قازاقستاندا قازىر 87 مىڭ شاماسىندا مەملەكەتتىك قىزمەتكەر بار. ال, ولاردىڭ 55 پايىزى – ايەلدەر. پارلامەنتتىڭ تومەنگى پالاتاسىندا قىزمەت ەتەتىندەردىڭ 25 پايىزى – ايەلدەر. بۇل – ەقىۇ كەڭىستىگىندەگى ورتاشا كورسەتكىشتەن اسىپ وتىر» دەدى ول.
كونفەرەنتسيا بۇگىن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جالعاسادى.
امانعالي قالجانوۆ