استاناداعى ۇلتتىق عىلىمي كارديوحيرۋرگيا ورتالىعىندا ەرەكشە وتا جاسالدى.
ياعني CARMAT جاساندى جۇرەگىنەن كەيىن دونورلىق جۇرەك سالىنعان الەمدەگى العاشقى وتا رەتىندە عالىمنىڭ بۇل سالاسىنا جاڭالىق بولىپ ەنبەك. وتاشىلاردىڭ جەڭىل قولىمەن پاۆلودارلىق قۇنانباي ابراەۆتىڭ جۇرەگى قايتا سوقتى.
وسىدان جىلعا جەتپەس ۋاقىت بۇرىن, 2017 جىلدىڭ 9 قازانىندا اۋىر جاعدايداعى جۇرەك جەتكىلىكسىزدىگىنەن زارداپ شەككەن ازاماتقا العاشقى حالىقارالىق جاساندى جۇرەك يمپلانتاتسياسى جاسالعان بولاتىن. جاساندى جۇرەكتى يمپلانتتاۋ ناۋقاستىڭ ءومىرىن ساقتاۋدىڭ جالعىز جولى بولدى. ارادا 8 اي وتكەن سوڭ, 2018 جىلدىڭ 19 ماۋسىمىندا قۇنانباي ابراەۆقا ورتوتوپيالىق جۇرەكتى ترانسپلانتتاۋ وتاسى جاسالدى.
جۋرناليستەرمەن بولعان كەزدەسۋدە اق باسقارما توراعاسى يۋري پيا نە سەبەپتى ناۋقاسقا بىردەن دونورلىق جۇرەك سالىنباعانىن ايتىپ بەردى. «وعان باستاپقىدا دونورلىق جۇرەكتى سالۋ مۇمكىن بولمادى, سەبەبى وكپە, باۋىر جانە ت.ب. اعزالارىندا وزگەرىس بولدى. سول سەبەپتى جاساندى جۇرەكتى يمپلانتتاۋ تۋرالى شەشىم قابىلدانىپ, ارادا 6 اي وتكەن سوڭ جاعدايى جاقسارعاننان كەيىن دونورلىق جۇرەكتى كۇتىپ وتىرعانداردىڭ تىزىمىنە قوسۋ مۇمكىن بولدى. 8 ايدان سوڭ ءبىز سايكەس دونورعا يە بولىپ, ترانسپلانتتادىق. قازىرگى كۇنى ول رەابيليتاتسيادان ءوتىپ جاتىر, ناۋقاس ءۇشىن اۋىر پروتسەدۋرا بولعاندىقتان, ول قازىر رەانيماتسيادا, الايدا ەسىن بىلەدى».
سونداي-اق, كارديوحيرۋرگيا ورتالىعىنىڭ ماماندارى جاساندى جۇرەگى دونورلىق جۇرەككە اۋىستىرىلعان ناۋقاس پالاتادا جاتقانىن, تۋىستارىمەن سويلەسىپ, تەلەديدار كورگەنىن ايتىپ, ناۋقاستىڭ بۇگىنگى حالىنەن حابار بەردى.
