قازاق ۇلتتىق ونەر ۋنيۆەرسيتەتىندە اباي قۇنانبايۇلىنىڭ 170 جىلدىق مەرەيتويىنا وراي «ۇلت پەرزەنتىنە تاعزىم» اتتى ونەر سايىسى ءوتتى. شارانى «نۇر وتان» پارتياسى استانا قالالىق فيليالى اباي شىعارمالارىن ناسيحاتتاۋ ماقساتىندا ۇيىمداستىردى.
ونەر سايىسىنا «نۇر وتان» پارتياسى استانا قالالىق فيليالى باستاۋىش پارتيا ۇيىمدارىنىڭ مۇشەلەرى, ەلورداداعى جوعارى وقۋ ورىندارىنىڭ وقىتۋشىلارى مەن ستۋدەنتتەرى قاتىستى. شارادا ارنايى ءسوز سويلەگەن «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ پەن قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا قاتىسۋشىلارعا ساتتىلىك تىلەدى.
سايىس «بولماساڭ دا ۇقساپ باق!» جانە «ادام بولام دەسەڭىز» اتتى ەكى باعىتتان تۇردى. ءبىرىنشى باعىتتا قاتىسۋشىلار ەركىن تاقىرىپتا ولەڭ وقىسا, ەكىنشىلەرى اباي شىعارمالارىن جاتقا سوقتى. قاتىسۋشىلاردى استانا قالاسى تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ, فيلوسوفيا عىلىمدارىنىڭ دوكتورى عاريفوللا ەسىم, جازۋشى-دراماتۋرگ روزا مۇقانوۆالار باعالادى.
سايىس قورىتىندىسىندا «ادام بولام دەسەڭىز» باعىتىندا قازاق تەحنولوگيا جانە بيزنەس ۋنيۆەرسيتەتىنىڭ ستۋدەنتى ءباتيما كەمەلوۆا, «بولماساڭ دا ۇقساپ باق!» باعىتىندا س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتى نۇربالا الدامجاروۆا جەڭىسكە جەتتى.
روزا ارەن
