قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ۇلى ابايدىڭ تۋعان كۇنىن ەلەۋسىز قالدىرمادى. جاستاردىڭ وقۋ مادەنيەتىن, ادەبي تالعامىن قالىپتاستىرۋ ماقساتىندا الەۋمەتتىك جەلىلەردە «ءىى اباي وقۋلارى» جىل سايىنعى ادەبي سايىس جاريالانعان بولاتىن. بۇل مادەني وشاقتا اتالمىش بايقاۋ جەڭىمپازدارىن ماراپاتتاۋ ءراسىمى ءوتتى.
– «اباي ءسوزى – قازاقتىڭ بويتۇمارى, اباي مۇراسى – حالىقتىڭ ەڭ قاسيەتتى قازىناسى» دەپ ەلباسىمىز ايتقانداي, قازاق حالقى ابايدى ءوزىنىڭ رۋحاني ۇستازى, ۇلتتىق جاڭعىرۋىمىزدىڭ قاينار كوزى دەپ قابىلدايدى. ۇلى اقىن ەڭبەكتەرىنىڭ ۋاقىت وتكەن سايىن وزەكتىلىگى ارتىپ, قوعامدىق, رۋحاني ءارى مادەني ومىردەگى باعىتى ايقىندالا تۇسۋدە. بۇگىنگى كۇنى ەلىمىزدىڭ ەلدىگىن ۇلى ابايدىڭ اسىل سوزدەرىنسىز ەلەستەتۋ مۇمكىن ەمەس, – دەدى سالتاناتتى ءراسىمدى اشقان ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ.
قازاق رۋحانياتىنا ولشەۋسىز ەڭبەك سىڭىرگەن عالىم اقسەلەۋ سەيدىمبەك كەزىندە «قازاقتاردى ابايدى وقىعاندار جانە وقىماعاندار دەپ ەكى توپقا بولەمىن» دەگەن بولاتىن. وسىنى ەسكە العان بەلگىلى قوعام قايراتكەرى ورازگۇل اسانعازى ادامنىڭ ەڭ اسىل قاسيەتتەرىن جىرلاعان ۇلى ويشىلدىڭ باي شىعارماشىلىق مۇراسى قازاق ەلىن ماڭگىلىك رۋحتاندىراتىنىن ايتىپ ءوتتى.
بۇل جولعى «اباي وقۋلارى» سايىسىنا استانا, الماتى قالالارى, اقتوبە, قىزىلوردا, الماتى, اقمولا, سولتۇستىك قازاقستان وبلىستارىنان 70 ءوتىنىم كەلىپ ءتۇستى. بۇعان قوسا, فەيسبۋك جانە ينستاگرام جەلىلەرىنىڭ قولدانۋشىلارى سايىسقا اق تىلەكتەرى مەن ىزگى لەبىزدەرىن ءبىلدىرىپ, قاتىسۋشىلار وقىعان ولەڭدەردى جەلى ىشىندە تاراتۋعا اتسالىستى.
بايقاۋدىڭ «اباي مۇراسىن الەمدىك دەڭگەيدە ناسيحاتتاۋشى» اتالىمىنىڭ جەڭىمپازى پولشاداعى جەشۋۆ اقپاراتتىق تەحنولوگيالار جانە مەنەدجمەنت ۋنيۆەرسيتەتىنىڭ ستۋدەنتى گۇلناز قاليەۆا ابايدىڭ تاعىلىمى مول وسيەتتەرى ەشقاشاندا وزەكتىلىگىن جوعالتپايدى دەپ ەسەپتەيدى.
ادەبي سايىستىڭ ەڭ تاجىريبەلى قاتىسۋشىسى اقمولا وبلىسى شورتاندى اۋدانى قاراادىر اۋىلىنىڭ 7-سىنىپ وقۋشىسى اراي ارحاروۆا بولدى. ول 1-سىنىپتان باستاپ ادەبي سايىستارعا قاتىسىپ قانا قويماي, وسى جىلى اۋداندىق اباي وقۋلارىنىڭ «ولەڭ – ءسوزدىڭ پاتشاسى, ءسوز ساراسى» اتالىمىندا ءبىرىنشى ورىندى يەلەنگەن. اراي ابايدىڭ 102 ولەڭىن جاتقا وقيدى ەكەن. ال بايقاۋدىڭ ەڭ كىشكەنتاي قاتىسۋشىسى استانا قالاسى №5 مەكتەپ-گيمنازياسىنىڭ 2-سىنىپ وقۋشىسى اقمونشاق سەرىكباي بولدى.
فيلولوگيا عىلىمدارىنىڭ دوكتورى سەرىك نەگيموۆ, ايتىسكەر اقىن, ادەبيەتتانۋشى عالىم سەرىكزات دۇيسەنعازى, عىلىم مەن مادەنيەت قايراتكەرلەرى, استانا قالاسىنىڭ پەداگوگيكالىق قاۋىمداستىعىنىڭ وكىلدەرى قاتىسقان سايىستا قازىلار القاسىنىڭ شەشىمىمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ ستۋدەنتتەرى مەرۋەرت توقمولداەۆاعا ءبىرىنشى جانە دانا مۇحامەتىلداعا ءۇشىنشى ورىندار بەرىلدى. ەكىنشى ورىن الماتىداعى №81 مەكتەپ-گيمنازياسىنىڭ 8-سىنىپ وقۋشىسى اقتوتى اسانوۆاعا ءتيدى.
سونداي-اق, «ەڭ كىشكەنتاي ۇمىتكەر», «ءبىر اۋلەتتىڭ ونەرپازدارى», «اباي مۇراسىن الەمدىك دەڭگەيدە ناسيحاتتاۋشى», «ءۇش ءتىلدىڭ دانەكەرى»,
«ەڭ العاشقى وقىرمان» اتالىمدارىندا توپ جارعاندار ماراپاتتالدى.
