بەلگىلى جۋرناليست, پرەزيدەنت گرانتىنىڭ يەگەرى, «ەگەمەن قازاقستان» گازەتىنىڭ قىزمەتكەرى ءاليسۇلتان قۇلانباي اۋلەتى مەن ارىپتەستەرىنىڭ قابىرعاسىن قايىستىرىپ, 64 جاسىندا كەنەتتەن دۇنيەدەن ءوتتى.
قازاق جۋرناليستيكاسىنىڭ ەڭبەكقور وكىلى كۇتپەگەن جەردەن اجالدىڭ قاپىسىز وعىنا تاپ كەلىپ, بۇل دۇنيەنىڭ شىنىندا جالعان ەكەنىن تانىتتى.
بۇگىندە قاتارىنا قادىرمەندى, ەلگە سىيلى بولىپ ۇلگەرگەن ءاليسۇلتان مۇقانالىۇلى 1954 جىلعى 21 قاڭتاردا الماتى وبلىسى ۇيعىر اۋدانىنىڭ ۇلكەن ديقان اۋىلىندا دۇنيە ەسىگىنەن اتتاعان ەدى. ال 1984 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەننەن كەيىن رەسپۋبليكالىق «ەڭبەك تاڭى» جۋرنالىندا, «اۋىل» («دالا ديدارى») گازەتىندە, «قازاقستان رەسپۋبليكاسى باعالى قاعازدار جونىندەگى ۇلتتىق كوميسسيانىڭ جارشىسى» جۋرنالىندا ءتۇرلى قىزمەتتەر اتقاردى. ال 1996 جىلدىڭ 1 ناۋرىزىنان ءومىرىنىڭ سوڭىنا دەيىن تابان اۋدارماي «ەگەمەن قازاقستان» گازەتىندە قىزمەت ىستەدى. ءتاۋەلسىز ەلىمىزدىڭ قالىپتاسۋ كەزەڭىندەگى ساياسات, ەكونوميكا ماسەلەلەرى جونىندە وتكىر دە باعالى ماقالالار جازدى.
جۋرناليست رەتىندە ويى وزىق, قيالى ۇشقىر, تىلگە باي قالامگەر بولا بىلگەن الەكەڭ ادام رەتىندە بارىنشا سالماقتى, ساليقالى, كەڭ جۇرەكتى, مول پاراساتتى ازامات ەدى. ونىڭ ادام بالاسىنا قىلداي قياناتى, زارەدەي زيانى جوق ەدى. قانداي ءبىر قيىن ماسەلەنى دە وزىنە ءتان سابىرلىلىقپەن, اقىل-پاراساتپەن شەشەتىن.
اللا الدىڭنان جارىلقاسىن, باقۇل بول, ارىپتەس قالامگەر!
«استانا اقشامى» گازەتىنىڭ ۇجىمى
