«ادامدى داڭققا بولەيتىن ەكى قاسيەتتى ونەر بار: ءبىرى – قولباسشىلىق, ەكىنشىسى – شەشەندىك» دەپتى ويشىل تسيتسەرون. قيىننان قيىستىرا, توتەدەن توگە سويلەيتىن تاپقىر دا اقىلدى بولۋ, كوركەمسوزدى كەلىستىرە ايتۋ – كەز كەلگەن جاننىڭ بويىنان تابىلا بەرمەيتىن قاسيەت ەكەنى انىق. بۇگىنگى كۇننىڭ تالابىنا ساي ءار ادامنىڭ جەكە پىكىرىن قورعاي ءبىلۋى, ويىن دۇرىس دالەلدەي الۋى اسا ماڭىزدى. وسى ورايدا جىل سايىن نۇر-سۇلتان قالاسىندا «استانا جاستارى» مەكەمەسىنىڭ ۇيىمداستىرۋىمەن «Nur Sultan Debate Cup» جوباسى وتكىزىلىپ كەلەدى.
پىكىرسايىس الاڭىندا ەلوردالىق جوعارى وقۋ ورىندارىنىڭ جاستارى قازىرگى قوعامنىڭ وزەكتى تاقىرىپتارىن تالقىلايدى. جوبا العاش رەت 2018 جىلدان باستاپ قالا جاستارىن تاربيەلەۋ, ولاردىڭ الەۋمەتتىك, زياتكەرلىك, پسيحولوگيالىق جانە جەكە دامۋىنا جاعداي جاساۋ ماقساتىندا وتكىزىلگەن. وتكەن جىلى قازان ايىندا كونستيتۋتسيانىڭ 25 جىلدىعى مەن قازاقستان حالقى اسسامبلەياسىنىڭ 25 جىلدىعىنا وراي نۇر-سۇلتان قالاسىنىڭ جوعارى وقۋ ورىندارى جانە ورتا ارناۋلى وقۋ ورىندارىنىڭ ستۋدەنتتەرى اراسىنداعى تۋرنيرگە 16 جوعارى وقۋ ورنى جانە 35 ورتا ارناۋلى وقۋ ورىندارىنان 50-گە جۋىق فراكتسيالار قاتىستى. پىكىرسايىس ويىندارى بارىسىندا قازاقستان رەسپۋبليكاسىنىڭ كونستيتۋتسياسى, قازاقستان حالقى اسسامبلەياسى جانە اباي قۇنانباەۆتىڭ 175 جىلدىعىنا, ءال-فارابي بابامىزدىڭ 1150 جىلدىعىنا, تۇڭعىش پرەزيدەنت كۇنىنە, قازاقستان رەسپۋبليكاسىنىڭ تاۋەلسىزدىك كۇنىنە وراي تاقىرىپتار قوزعالعان.
داستۇرگە اينالعان «NUR-SULTAN DEBAT CUP» پىكىرسايىس ءتۋرنيرىنىڭ بيىلعى جىلعى ەرەكشەلىگى بارلىق ويىندار ZOOM پلاتفورماسىندا ونلاين فورماتتا ءوتتى. 2021 جىلى دەبات ويىندارى مامىردان قاراشاعا دەيىن, اي سايىن جەكە تۋرنير رەتىندە وتكىزىلەدى. تۋرنير 6 كەزەڭنەن تۇرادى. ءار كەزەڭگە كەمىندە 50 قاتىسۋشى قاتىسادى. جوبا اياسىندا ەلوردانىڭ 600-دەن استام جاستارىن قامتۋ قاراستىرىلعان. فيناليستەردى كۋبوكتارمەن جانە باعالى سىيلىقتارمەن ماراپاتتاۋ 2021 جىلدىڭ قاراشا ايىنا جوسپارلانىپ وتىر.
بيىلعى جوبانىڭ اشىلۋ سالتاناتىنا نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ باسشىسى قايرات قامباروۆ, «استانا جاستارى» مەكەمەسىنىڭ باسشىسى شىڭعىس تلەۋلين جانە قالالىق ءماسليحات دەپۋتاتتارى قاتىستى.
بەتتى دايىنداعان ۆەنەرا تالعاتقىزى
