بۇرىن كامەلەتكە جاسى تولعان بوزبالا اسكەرگە بارعىسى كەلەتىن. جانە ونى مارتەبە كورەتىن. ال, بۇگىندە جاستار ازاماتتىق بورىشىن وتەۋدەن قايمىعاتىن بولدى. ايتەۋىر, سوقتالداي-سوقتالداي جىگىتتەرىمىز اسكەرگە بارۋدان قاشىپ, مەديتسينالىق كوميسسيادان وتپەۋدىڭ ءتۇرلى امالدارىن قاراستىرادى. قازىر اسكەرگە بارماعانىنا ەشكىم نامىستانبايتىن بولدى دا.
وعان سەبەپ, كەيىنگى كەزدەرى تەلەارنالاردا اشىق كورسەتىلىپ جاتقان اسكەردەگى الەۋمەتتىك جاعدايلار بولسا كەرەك. بۇل وقيعا جاس جەتكىنشەكتەر مەن ولاردىڭ اتا-انا, تۋعان-تۋىستارىن شوشىتارى انىق. اسكەرگە بارۋدان جالتارۋدىڭ ەڭ ءبىرىنشى سەبەبى وسى بەينەروليكتەردە سياقتى. ۇرىپ-سوعىپ جاتقان سارباز جايلى بەينەماتەريالدار ينتەرنەت پەن ۇيالى تەلەفونداردا دا تولىپ ءجۇر. ءوز-وزىنە قول جۇمساۋ فاكتىسى دە از ەمەس. مايدانعا ەمەس, وتان تىنىشتىعىن كۇزەتۋگە اتتاندىرعان اتا-انا وسىدان كەيىن قايتىپ ۇلىن اسكەرگە جىبەرسىن؟ قازىرگى تاڭدا حالىق كينودان نە كورسە, سوعان يمانداي سەنەدى ەمەس پە؟ ەندەشە, قازاق جىگىتتەرىن جىگەرلەندىرەتىن كينولار قاجەت. «جاۋجۇرەك مىڭ بالا», بۇگىندە تۇساۋكەسەرى ءجۇرىپ جاتقان «باۋىرجان مومىشۇلى» سىندى فيلمدەر سونىڭ باستاۋى بولارى انىق.
دەرەكتەرگە سۇيەنسەك, قالالىقتار مەن اۋىلدىقتاردىڭ اراسىندا اسكەرگە دەگەن قۇلشىنىس ءار الۋان ەكەن. مىسالى, قالالىقتاردا سارباز اتانۋ ىنتاسى اۋىل بالالارىنا قاراعاندا تومەن. سونداي-اق, جەتكىنشەكتەرىمىز ءوز جەكە باسىنىڭ مۇددەسى ءۇشىن اسكەر قاتارىنا قوسىلعىسى كەلەدى. ياعني, اسكەري بيلەت الۋ ارقىلى مانسابىن جوعارىلاتۋ مۇمكىندىگىن كوزدەيدى. بۇگىندە اسكەري ءادىس-ءتاسىلدى مەڭگەرىپ, ەرلىكتى شىڭداۋ ءار ازاماتتىڭ وتان الدىنداعى بورىشى دەپ قارايتىندار از. كەيدە كەيبىر جاستاردىڭ تەرىس جولدا جۇرگەنىن, جامان ارەكەتتەرگە بارىپ جاتقانىن كورگەندە, جانىڭ اۋىرادى. سوندىقتان ولارعا بۇقارالىق اقپارات قۇرالدارى ارقىلى, بالاباقشا, مەكتەپ, جوعارى وقۋ ورىندارىندا بارىنشا پاتريوتتىق تاربيە بەرۋگە تىرىسقان ءجون. اسكەرگە بارۋ, اسكەري ءومىردى كورۋ, مىلتىق اتۋ, ءتۇرلى اسكەري تەحنيكانى مەڭگەرۋ كامەلەتكە تولعان ءاربىر بوزبالانىڭ قىزىعۋشىلىعىن تۋدىرۋى كەرەك. سەبەبى, تاربيەلى ازامات بار اقىل كەنىن وتانىن قورعاۋعا جۇمسايدى. ولار وتانعا قىزمەت ەتۋدەن, وتاندى قورعاۋدان ەش ۋاقىتتا قاشپايدى.
ەركەجان ساتىمبەك
ە.satimbek@astana-akshamy.kz
