تاياۋدا»باسپانا» يپوتەكالىق ۇيىمى باستاپقى جارنانى ارزانداتاتىن ونىمدەر ازىرلەدى.
«باسپانا» يپوتەكالىق ۇيىمى جاس وتباسىلار مەن بيۋدجەتتىك سالا قىزمەتكەرلەرىنە قارجىلىق جۇكتەمەنى ازايتۋ ماقساتىندا «جاس ارمان» جانە «قامقور باسپانا» ونىمدەرىن ازىرلەدى. ونىمدەر باسپانا جانە جەرگىلىكتى اتقارۋشى ورگاندار اراسىنداعى ىنتىماقتاستىققا نەگىزدەلىپ, اتالمىش ساناتتاعى ازاماتتارعا «7-20-25» يپوتەكاسىنىڭ العاشقى جارناسىن ەكى ەسەگە ازايتۋدى قاراستىرادى.
سونداي-اق, جەرگىلىكتى اتقارۋشى ورگانداردىڭ وبليگاتسيالار شىعاراتىنى جانە حالىقتىڭ اتالعان ساناتى ءۇشىن باستاپقى جارنانىڭ جارتىسىن سۋبسيديالاۋعا مىندەتتەنەتىنى ايتىلادى. ءوز كەزەگىندە باسپانا اكىمدىكتەر وبليگاتسيالارىن ساتىپ الىپ, «7-20-25» باعدارلاماسىنا قاتىساتىن بانكتەرمەن حالىقتىڭ وسى ساناتىن نەسيەلەندىرۋدى قامتاماسىز ەتەدى. ء«بىز «7-20-25″ باعدارلاماسىنا جاس وتباسىلار مەن بيۋدجەتتىك سالا قىزمەتكەرلەرىنىڭ قاتىسۋىنا وراسان زور ءمان بەرەمىز. ولار تاراپىنان العاشقى جارنانى جيناۋدىڭ قيىندىعى جونىندە كوپتەگەن پىكىرلەر كەلىپ ءتۇستى. سول سەبەپتى, قولداۋ مۇمكىندىكتەرىن بارىنشا قاراستىردىق. مۇنداي الەۋمەتتىك شەشىمدەردى ىسكە اسىرۋ ءۇشىن اكىمدىكتەر تاراپىنان قولداۋ كۇتەمىز», – دەدى «باسپانا» يپوتەكالىق ۇيىمىنىڭ باسقارما توراعاسى قايرات التىنبەكوۆ.
بۇعان دەيىن بەلگىلى بولعانىنداي, «جاس ارمان» جانە «قامقور باسپانا» ونىمدەرى ءبىرىنشى بولىپ شىمكەنت قالاسىندا پيلوتتىق رەجيمدە جۇمىس ىستەي باستادى. تاراپتار ءتيىستى مەموراندۋمعا 2018 جىلدىڭ 3 قىركۇيەگىندە قول قويعان بولاتىن. مەموراندۋمعا سايكەس شىمكەنت اكىمدىگى قايتارىمدى نەگىزدە باستاپقى جارنانى سۋبسيديالاۋ ءۇشىن اعىمداعى جىلى 500 ميلليون تەڭگە جانە 2019 جىلى 1,5 ميلليارد تەڭگە بولەدى. اكىمدىكتىڭ قولداۋى 2 مىڭعا جۋىق جاس وتباسى مەن بيۋدجەتتىك سالا قىزمەتكەرلەرىن قامتىماق.
دەرەككوز: Tengrinews.kz
