«جاستار – ءبىزدىڭ بولاشاعىمىز» دەپ ءجيى ايتىلادى. سەبەبى جالىنداعان جاستارعا كوپ ءۇمىت ارتىلادى. بۇل ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا دا ايتىلدى. سول سەبەپتى جاستار ۇيىمىنىڭ وكىلدەرى ماقالانى جان-جاقتى تالقىلاۋعا جينالدى.
بەلسەندىلەر وسكەلەڭ ۇرپاق ەل دامۋىنا ەلەۋلى ۇلەس قوسا الاتىنىنا سەنىمدى. سەبەبى الەمدەگى ەڭ سوڭعى تەحنولوگيالاردى قولدانا وتىرىپ, كۇندەلىكتى ومىرگە قاجەتتى ونىمدەردى شىعارۋ كوپ ءتىل بىلەتىن جاستاردىڭ قولىنان كەلەدى دەيدى ولار. سونداي-اق, استانا قالاسى قازاقستان حالقى اسسامبلەياسى جاستار قاناتىنىڭ وكىلدەرى «تۋعان جەر» باعدارلاماسىن جۇزەگە اسىرۋعا قاتىستى ۇسىنىستاردى جاسادى.
«ءبىز مەملەكەت باسشىسىنىڭ ماقالاسىنا سۇيەنە وتىرىپ, وزەكتى ماسەلەلەردى العا تارتتىق. ءوز ويىمىزدى ءبىلدىرىپ, كەلەشەك ۇرپاقتىڭ قوعام ومىرىندەگى ءرولىن ايقىندادىق» دەدى استانا قالالىق «جاس وتان» جاستار قاناتىنىڭ ورىنباسارى داۋرەن ۇزاقباەۆ.
