قازىرگى تاڭدا باس قالامىز 1 ملن 400 مىڭعا جۋىق جاسىل جەلەكپەن كومكەرىلگەن. «جاسىل بەلدەۋ» اۋماعىندا 14 ملن جاسىل جەلەك بار. وسى جىلى 600 مىڭنان استام جاسىل جەلەك ەگۋ جوسپارلانعان. ونىڭ ىشىندە «جاسىل بەلدەۋدىڭ» قۇرامىندا 452 مىڭ كوشەت وتىرعىزىلماق. بۇل تۋرالى قالالىق قوعامدىق كەڭەستىڭ وتىرىسىندا قالالىق قورشاعان ورتانى قورعاۋ جانە تابيعاتتى پايدالانۋ باسقارماسى باسشىسىنىڭ ورىنباسارى ايدىن بەگىمبەكوۆ باياندادى. سونىمەن قاتار, قالاعا قاراستى اۋدانداردىڭ باسشىلارى دا ءوز اۋداندارىن اباتتاندىرۋ جۇمىسىنىڭ جالپى بارىسى جايلى ايتتى.
قوعامدىق كەڭەستىڭ توراعاسى زۇلفۋحار عايىپوۆ جۇرگىزگەن جيىندا كەڭەس مۇشەلەرى الدىمەن قالاداعى جاسىل جەلەكتەر مەن سۋ جۇيەلەرىنىڭ جاعدايى, ولاردى پاسپورتتاۋ مەن تسيفرلاندىرۋ ماسەلەسىنە قاتىستى باياندامانى تىڭدادى.
باس قالانىڭ جاسىل جەلەكپەن كومكەرۋگە قاتىستى ماسەلەلەرگە ءبىر-بىرلەپ توقتالعان باسقارماسى باسشىسىنىڭ ورىنباسارى بيىل كوگالداندىرۋ اياسىندا الماتى اۋدانىندا 8 مىڭعا جۋىق, بايقوڭىر اۋدانىندا 7 مىڭعا جۋىق, سارىارقا اۋدانىندا 7 مىڭعا جۋىق, ەسىل اۋدانىندا 23500-گە جۋىق اعاش ەگۋ جوسپارلانعانىن جەتكىزدى. سونداي-اق نىساندار قۇرىلىسى شەڭبەرىندە جول-كولىك باسقارماسى 71862 اعاش, كوممۋنالدىق شارۋاشىلىق باسقارماسى 552 اعاش, «جاسىل بەلدەۋدى» دامىتۋ اياسىندا «استانا ورمانى» جشس 451518 اعاش ەگۋدى جوسپارلاپ وتىرعانىن اتاپ ءوتتى. «ساياباقتار مەن شاعىن گۇلباقتار قۇرىلىسى اياسىندا قورشاعان ورتانى قورعاۋ باسقارماسى 92 332 اعاش ەگۋدى جوسپارلاپ وتىر. كوكتەمگى ماۋسىمدا 186 مىڭ اعاش وتىرعىزىلدى. ياعني, جالپى جوسپاردىڭ 30 پايىزى ورىندالدى. قالعان جۇمىستار كۇزدە جالعاسادى. سونداي-اق بيىل قالا اۋماعىندا 9 گۇلزاردىڭ قۇرىلىسى جوسپارلانعان. ونىڭ ىشىندە 5 گۇلزاردى اياقتاپ, تاپسىردىق. جاسىل جەلەكتەردى تۇگەندەۋ جۇمىستارى دا ءجۇرىپ جاتىر, 134 ۋچاسكەدە 20 بريگادا جۇمىس جاساپ جاتىر. قازىر بوتانيكالىق باق اۋماعىنداعى اعاشتار تولىق تۇگەندەلىپ, پورتالعا ەنگىزىلدى, 70 مىڭعا جۋىق اعاشقا ەلەكتروندى پاسپورت بەرىلدى. تۇگەندەۋ كەزەڭى اياقتالعاننان كەيىن ەلوردانىڭ جاسىل ەكپەلەرىنىڭ ءتىزىمىن جاسايمىز» دەدى ايدىن بەگىمبەكوۆ.
باياندامانى تىڭداعاننان كەيىن قوعامدىق كەڭەس مۇشەلەرى قالانى جاسىل جەلەكپەن كومكەرۋدەگى ساقتالىپ وتىرعان ماسەلەلەرگە باسا نازار اۋدارىپ, اتالعان جۇمىستارعا جاۋاپتى مەكەمەلەردىڭ, اۋدانداردىڭ باسشىلارىنا سۇراۋلار قويىپ, سىن, ۇسىنىستار ايتتى. باسقارما باسشىسىنىڭ ورىنباسارى ولاردىڭ سۇراۋىنا جاۋاپ بەرىپ, ءوز جۇمىستارىن ويداعىداي اتقارۋعا ۋادە ەتتى.
باسقوسۋدا جوعارىداعى ماسەلەلەردەن سىرت, «نۇر-سۇلتان قالاسىنىڭ ساۋلەتتىك كەلبەتىن قالىپتاستىرۋ جانە قالا قۇرىلىسىن جوسپارلاۋ قاعيدالارىن بەكىتۋ»; «استانا قالاسىنىڭ اۋماعىنداعى جەر ۋچاسكەلەرى ءۇشىن تولەماقىلارىنىڭ بازالىق ستاۆكالارىن بەلگىلەۋ تۋرالى» استانا قالاسى اكىمدىگىنىڭ 2011 جىلعى 5 جەلتوقسانداعى №79 قاۋلىسى مەن استانا قالاسى ءماسليحاتىنىڭ 2011 جىلعى 7 جەلتوقسانداعى №523/75-IV شەشىمىنە وزگەرىستەر ەنگىزۋ» سياقتى 9 ءتۇرلى ماسەلە قارالىپ, داۋىسقا سالىندى.
