ەلوردادا قالدىقتاردى باسقارۋ جانە «جاسىل» ەنەرگيا سالاسىن دامىتۋ ماسەلەلەرىنە ارنالعان «Green Energy & Waste Recycling Forum – GEWR’19» IV ەۋرازيالىق بيزنەس-فورۋمى ءوز جۇمىسىن باستادى.
بۇگىنگى تاڭدا قورشاعان ورتانىڭ لاستانۋى وزەكتى ماسەلەگە اينالىپ وتىر. جيىننىڭ باستى تاقىرىبى ادام اعزاسىنا زياندى قالدىقتاردى قايتا وڭدەۋ سالاسىن تۇراقتى دامىتۋ ارقىلى تسيركۋليارلىق ەكونوميكانىڭ قالىپتاسۋىنا, پارنيكتىك گازداردىڭ شىعارىلۋىن ازايتۋعا جانە ەنەرگيانىڭ بالامالى تۇرلەرىن وندىرۋگە ەلەۋلى ۇلەس قوسۋعا باعىتتالعان. «KazWaste» قازاقستاندىق قالدىقتاردى باسقارۋ قاۋىمداستىعىنىڭ اتقارۋشى ديرەكتورى ۆەرا مۇستافينانىڭ ايتۋىنشا, قالدىقتاردى وڭدەۋ سالاسىنداعى نەگىزگى مىندەتتەر قولدانىستاعى تەحنولوگيالاردى جەتىلدىرۋگە, جاڭا تەحنولوگيالاردى قۇرۋعا جانە ەنگىزۋگە باعىتتالۋى ءتيىس. حالىقارالىق قوعامداستىق جاريالاعان پلاستيك ىدىستارمەن كۇرەسۋدىڭ جاڭا قاعيداتتارىنا سۇيەنە وتىرىپ, ءاربىر ءۇي مەن ءاربىر تۇرعىندى قالدىقتاردى جيناۋعا جۇمىلدىرۋ دا ويلاستىرىلعان.
سونداي-اق فورۋم جۇمىسى بارىسىندا The Coca-Cola Foundation حالىقارالىق قايىرىمدىلىق قورىنىڭ قولداۋىمەن «پلاستيكتى قايتا وڭدەۋگە ءيا دەپ ايت!» ورتاق جوباسى تانىستىرىلدى. وتكەن جىلى الەمنىڭ 127 ەلى پلاستيكتەن جاسالعان ءبىر رەتتىك ءونىمدى پايدالانۋدى شەكتەدى, 30 ەل پلاستيكالىق پاكەتتەر ءۇشىن تولەم ەنگىزدى, ال 27-ءسى قورشاعان ورتاعا زياندى كەيبىر ماتەريالداردى پايدالانۋعا تىيىم سالدى. قازىرگى ۋاقىتتا قازاقستاندا پوليەتيلەن پاكەتتەرىن تەگىن ساتۋعا تىيىم سالۋدى ەنگىزۋ بەلسەندى تۇردە تالقىلانۋدا.
بەيبىت وسپان
