جاڭاجىلدىق جارقىن مەرەكەنى, اسىرەسە, بالالار قاۋىمى ايرىقشا قۋانىشپەن تاعاتسىزدانا كۇتەتىنى بەلگىلى. بۇلدىرشىندەر ءۇشىن جاڭا جىل – اسىل ارماندارىمەن قاۋىشاتىن, بالالىق تىلەكتەرى قابىل بولىپ, كۇتكەن سىيلىقتارىنا قولدارى جەتەتىن ءسات.
21 جەلتوقسان كۇنى استاناداعى جاڭا وقۋشىلار سارايىندا ءبىر توپ ءبۇلدىرشىن استانا قالاسى اكىمىنىڭ ءداستۇرلى شىرشا تويىنا قاتىسىپ, تاماشا دۋمانعا بولەنبەك. مەرەكەلىك شىرشانىڭ قىزىعىنا جەتىم, اتا-انا قامقورلىعىنان قاعىس قالعان, از قامتاماسىز ەتىلگەن جانە مۇمكىندىگى شەكتەۋلى بۇلدىرشىندەر شاقىرىلادى.
تاڭعاجايىپتارعا تولى شىرشاعا ەلوردالىق 150 بالاقاي قاتىسادى دەپ جوسپارلانۋدا. ۇيىمداستىرۋشىلاردىڭ ايتۋىنشا, مەرەكەلىك شارا بىرنەشە بولىمنەن تۇرادى. بالالارعا ارنالعان جاڭاجىلدىق دۋمان ەرتەگى الەمىنە قىزىقتى ساياحاتپەن باستالادى. ول تالانتتى ارتىستەردىڭ ساحنالاۋىنداعى تەاترلاندىرىلعان كورىنىستەرمەن ورنەكتەلەدى. بالالار ەرتەگىلەر ەلىنە ساياحات جاساپ, قازىرگى زاماننىڭ نەبىر تاماشالارىنا دا قانىعادى.
بالالاردىڭ سالتاناتتى شاقىرۋى بويىنشا اياز اتا مەن اقشاقار ورتاعا شىعىپ, دۋمان كورىگىن قىزدىرا تۇسەدى. بارلىعىنا باعالى سىيلىقتار ۇلەستىرىپ, جەتكىنشەكتەردىڭ كوڭىلىن كوتەرەدى. تويدىڭ سوڭى جاستار تەاترىنىڭ ساحناسىنان ەرتەگى قويىلىمىن تاماشالاۋمەن جالعاسپاق.
ءدال وسى كۇنى حالىقارالىق وليمپيادالار مەن كونكۋرستاردا, سپورت باسەكەلەرىندە تابىستى ناتيجە كورسەتىپ جۇرگەن جاسوسپىرىمدەردىڭ دە شىرشا تويى وتەدى.
وعان قوسا, جىل سايىن ەسىل اۋدانىنىڭ كىشكەنتاي تۇرعىندارى ءۇشىن اۋدان اكىمىنىڭ اتىنان جاڭا جىل شىرشاسى ۇيىمداستىرىلاتىنى بەلگىلى. بۇل دۋماندى مەرەكە 25 جەلتوقسان كۇنى م.وتەمىسۇلى اتىنداعى وقۋشىلار سارايىندا وتپەك. جاڭا جىل شىرشاسىنا اۋدان مەكتەپتەرىندە ءبىلىم الاتىن كوپبالالى, از قامتىلعان وتباسىدان شىققان بالالار جانە اۋداننىڭ مەملەكەتتىك قۇرىلىمدارى قىزمەتكەرلەرىنىڭ بالالارى اراسىنان 230 ءبۇلدىرشىن قاتىسادى.
جاڭاجىلدىق شىرشا باعدارلاماسى ەكى ساعاتقا سوزىلادى. العاشقى ساعاتتا بالالارعا ارنالعان مەرەكەلىك قويىلىم ۇيىمداستىرىلادى, ەرتەگى الەمى كەيىپكەرلەرىنىڭ قاتىسۋىمەن ارنايى قويىلىم كورسەتىلەدى. مەرەكەلىك ءىس-شارا سوڭىندا ءاربىر بالاعا جاڭاجىلدىق سىيلىق تابىستالادى.
ەركەجان ساتىمبەك
