ەكسپو كورمەسىندە قىتاي پاۆيلونى بايىرعى ەنەرگيا, بۇگىنگى ەنەرگيا جانە بولاشاق ەنەرگياسىن تانىستىرادى. بۇل تۋرالى قىتايدىڭ ۇلتتىق كۇنى اياسىندا قحر بۇكىلقىتايلىق xالىق وكىلدەرىنىڭ جينالىسى تۇراقتى كوميتەتى توراعاسىنىڭ ورىنباسارى شەن يۋەيۋە مالىمدەدى. ونىڭ ايتۋىنشا, پاۆيلون تۇراقتى دامۋ جانە جاسىل ەنەرگەتيكا سالاسىنداعى قىتاي ەلىنىڭ وزىق جەتىستىكتەرى مەن تاجىريبەسىن پاش ەتەدى.
شەن يۋەيۋەنىڭ پىكىرىنشە, بولاشاق ەنەرگياسى جانە «جاسىل» جىبەك جولى – ءداستۇرلى ەنەرگيانى بالامالى ەنەرگيا كوزىنە اينالدىرىپ, الەمدى ءارى قاۋىپسىز, ءارى ەكولوگيالىق دامۋعا جەتەلەيدى. ءسوز سوڭىندا قىتاي وكىلى قازاقستان رەسپۋبليكاسىنا كورمەگە قاتىسۋعا كومەكتەسكەنىنە العىس ءبىلدىرىپ, ەكسپو-2017 كورمەسى ەكى ەل اراسىنداعى دوستىق قارىم-قاتىناستىڭ دامۋىنا سەپتىگىن تيگىزەتىنىن ايتتى.
ال قازاقستان تاراپىنان القالى جيىنعا قاتىسقان قر پارلامەنت ءماجىلىسىنىڭ توراعاسى نۇرلان نىعماتۋلين قحر الەم بويىنشا جاڭعىرمالى ەنەرگيا كوزدەرى سالاسىنداعى كوشباسشى ەكەندىگىن جەتكىزدى.
– بۇل – جاڭعىرمالى ەنەرگيا كوزدەرىندە جاڭا تەحنولوگيالاردى ەنگىزۋ جانە دامىتۋدىڭ توتە جولى. قازاقستاننىڭ «نۇرلى جول» ەكونوميكالىق ساياساتى جانە «جىبەك جولى» ەكونوميكالىق بەلدەۋىن قۇرۋ قوس ەلدىڭ اراسىنداعى ستراتەگيالىق ىنتىماقتاستىقتىڭ ءبىر ۇلگىسى, – دەدى ءماجىلىس توراعاسى.كەشە كۇنى بويى ۇلتتىق كۇنىن ۇلىقتاعان قىتاي ەلى ەنەرگيا حولى زالىندا مادەني باعدارلاماسىمەن كوپشىلىكتىڭ كوڭىلىنەن شىقتى.
گۇلدانا تالعاتقىزى
