ەلوردا اكىمى التاي كولگىنوۆ پەن قر دەنساۋلىق ساقتاۋ ءمينيسترى ەلجان ءبىرتانوۆ جاڭا جەدەل جاردەم ماشينالارىنىڭ پارامەترلەرىمەن, ستانسانىڭ جابدىقتالۋىمەن جانە بايلانىس ورتالىقتارىنىڭ جۇمىسىمەن تانىستى.
جەلىگە 52 جەدەل جاردەم كولىگى شىقتى. جاڭا جىلدان باستاپ تاعى 22 جەدەل جاردەم كولىگى الىنادى. كولىك سانى 64-تەن 138-گە دەيىن, ەكى ەسە ارتادى. ماشينالاردىڭ باسىم بولىگى – قارقىندى تەراپيا, مونيتورينگ جانە شۇعىل مەديتسينالىق كومەكتى قاجەت ەتەتىن پاتسيەنتتەردى تاسىمالداۋ مۇمكىندىگى بار رەانيموبيلدەر. بۇل كولىك دەفيبريلياتورلارمەن جانە جۇرەك ىرعاعىنا تولىق مونيتورينگ جاسايتىن جۇيەمەن جابدىقتالعان. سونداي-اق ءار كولىكتە وكپەنى جاساندى جەلدەتۋ اپپاراتى, وتتەگى باللونى, جاساندى قاناينالىم اپپاراتى بار. «مەديتسينالىق كومەك كورسەتۋ ساپاسىن ارتتىرۋ مەن ەڭبەك جاعدايىن جاقسارتۋ بويىنشا بىرقاتار جۇمىستار اتقارىلدى. بىرىنشىدەن, اۆتوكولىكتەر سانىن ەكى ەسەگە ارتتىرۋ ناتيجەسىندە جەدەل جاردەم بريگاداسىنىڭ كەلۋ ۋاقىتى 10 مينۋت بولدى. جەدەل جاردەم بريگادالاردىڭ سانى 20-عا دەيىن ارتتى. ەكىنشىدەن, دەنساۋلىق ساقتاۋ باسقارماسىمەن جانە ikomek109 بايلانىس ورتالىعىمەن بىرلەسە مەملەكەتتىك مەديتسينالىق مەكەمەلەردىڭ جۇمىسىنا تالداۋ جاسادىق. قازان ايىنان باستاپ مەديتسينالىق ۇيىمداردىڭ ءبىرىنشى باسشىلارىنىڭ ۇيالى تەلەفوندارىنا موبيلدىك قوسىمشالار ورناتىلدى. 
بۇل 3 اي ىشىندە تۇرعىنداردىڭ وتىنىشتەرىن ورىنداۋ ۋاقىتىن 5-6 كۇننەن 1-2 كۇنگە دەيىن قىسقارتۋعا مۇمكىندىك بەردى. ۇشىنشىدەن, پاتسيەنتتەردىڭ وتىنىشىنە سايكەس 2, 6 جانە 9 ەمحانالاردا ەلەكتروندىق كەزەك جۇيەسى ەنگىزىلدى. جاڭا جىلدان باستاپ اتالمىش جۇيەنى بارلىق مەديتسينالىق مەكەمەلەردە ەنگىزىپ باستايمىز. تورتىنشىدەن, كەلەسى جىلدان باستاپ مەملەكەتتىك-جەكەمەنشىك ارىپتەستىك اياسىندا سارىارقا اۋدانىندا ورنالاساتىن جاڭا مەديتسينالىق مەكەمەنىڭ قۇرىلىسى باستالادى. بەسىنشىدەن, ەلىمىزدى تسيفرلاندىرۋ اياسىندا 2019 جىلدىڭ ءساۋىر ايىندا «iKOMEK» ورتالىعى بازاسىندا «iKOMEK112» بىرىڭعاي كەزەكشى-ديسپەتچەرلىك قىزمەتى پيلوتتىق جوباسى ىسكە قوسىلدى. بۇل جوبا 101, 102, 103 قىزمەتتەرىنە كەلىپ تۇسەتىن قوڭىراۋلار جۇكتەمەسىن 81 پايىزعا جەڭىلدەتۋگە مۇمكىندىك بەرەدى» دەدى ەلوردا اكىمى التاي كولگىنوۆ.
