الماتى اۋدانىنىڭ اكىمدىگىندە قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي كامەلەت جاسقا تولعان ازاماتتارعا جەكە كۋالىك تاپسىرۋ ءراسىمى ءوتتى.
– جەكە كۋالىك الۋ – ادام ومىرىندەگى ەرەكشە ساتتەردىڭ ءبىرى. بۇل دەگەنىڭىز – سىزدەر بالالىق شاقتان الىستاپ, ۇلكەن ومىرگە قادام باستىڭىزدار دەگەن ءسوز. الدارىڭىزدا ۇلكەن اسۋلار جاتىر. ەڭ باستىسى, دەندەرىڭىز ساۋ بولىپ, ەلىمىزدىڭ گۇلدەنۋى جولىندا ەڭبەك ەتىڭىزدەر. مەملەكەتتىڭ كەلەشەگى – بىلىكتى جاستاردىڭ قولىندا. سىزدەر «قازاقستان ازاماتى» دەگەن اتقا لايىق بولىپ, وتان الدىنداعى ازاماتتىق مىندەتتەرىڭىزدى ادالىمەن اتقارادى دەپ سەنەمىز, – دەدى جاستارعا جەكە كۋالىك تاپسىرعان الماتى اۋدانىنىڭ اكىمى ادىلبەك سارسەمباەۆ.
سالتاناتتى شاراعا قۇرمەتتى قوناق رەتىندە قر پارلامەنتى سەناتىنىڭ دەپۋتاتى ۆلاديمير رەدكوكاشين قاتىستى. ول ءوز سوزىندە جاستاردىڭ قادامىنا اق جول تىلەپ, ەل نامىسىن بيىك ۇستاۋعا شاقىردى.
