تاۋەلسىزدىك كۇنىنە وراي ەلوردا اكىمدىگىندە 1986 جىلعى جەلتوقسان وقيعاسىنا قاتىسۋشىلارعا مەرەيتويلىق مەدالدار تابىس ەتۋ سالتاناتى ءوتتى.
1986 جىلدىڭ جەلتوقسانىندا قازاق جاستارى الماتىنىڭ ورتالىق الاڭىنا شىعىپ, قازاقستان كومپارتياسى وك ءبىرىنشى حاتشىسى قىزمەتىنە گەننادي كولبيندى تاعايىنداۋعا قارسى شىقتى. قازاق جاستارىنىڭ نارازىلىعى بۇكىل اكىمشىلىك جۇيەگە قارسى نارازىلىققا ۇلاستى. سول جىلدارى الاڭعا شىققانداردىڭ ەرلىگى ەسكەرۋسىز قالدى. ءتىپتى قۋعىنعا تۇسكەندەردىڭ ءبىرازى ءالى كۇنگە اقتالماي كەلەدى. تاريحىمىزداعى وسى ءبىر اقتاڭداقتاردىڭ ورنى بۇگىندە تولۋدا. قالالىق اكىمدىك ءبىر توپ جەلتوقسان قوزعالىسىنا قاتىسقان باتىرلارىمىزعا قۇرمەت كورسەتىپ, ەڭبەكتەرىن باعالادى. ىشكى ساياسات باسقارماسىنىڭ باسشىسى داۋرەن بابامۇراتوۆ جەلتوقسان قاھارماندارىنا ەرەكشە ءىلتيپات كورسەتىپ, مەرەيتويلىق مەدالدار تابىستادى.
– ول كەزدە مەن قازاق مەملەكەتتىك ۋنيۆەرسيتەتى ارنايى ءبولىمىنىڭ ستۋدەنتى ەدىم ءارى كومسومول بيۋروسىنىڭ حاتشىسى بولاتىنمىن. 24 جاستاعى مەنى ءبىر كۇنى كومسومول مەن ۋنيۆەرسيتەتتەن سەبەپسىز شىعارىپ جىبەردى. سوت ماعان عانا ەمەس, جەلتوقسان وقيعاسىنىڭ باسقا قاتىسۋشىلارىنا دا دەمونستراتسيا جاسادى, – دەپ ەسىنە الدى قۇرمانعازى راحمەتوۆ. سودان كەيىن اعامىز تۇرمەدە ەكى جىل, ەكى اي وتىرادى. تۋبەركۋلەزبەن اۋىرعان ول 1989 جىلى بوستاندىققا شىقتى. 90-جىلدارى قۇرمانعازى راحمەتوۆ اقتالدى.
جەلتوقسانشىلاردىڭ تاعدىرلارى ۇقساس. قازىر ولار 50 جاستان اسقان. بەيبىت كۇنگە جەتىپ, ارايلى اق تاڭنىڭ تۋعانىنا رياسىز قۋانىشتى.
https://youtu.be/0zMxPC0HQ38
