بيىل جەمقورلاردان تاركىلەنگەن قارجىعا سالىنعان 25 مەكتەپ اشىلادى, دەپ حابارلايدى astana-akshamy.kz
بۇعان دەيىن اپاتتى جانە ءۇش اۋىسىمدى مەكتەپتەر ماسەلەسىن شەشۋ ءۇشىن ءبىلىم بەرۋ ينفراقۇرىلىمىن قولداۋ قورىنىڭ ەسەبىنەن 76 738 ورىنعا ارنالعان 62 مەكتەپتىڭ قۇرىلىسى قارجىلاندىرىلدى. ونىڭ ىشىندە بۇگىنگى تاڭدا 37 مەكتەپ ىسكە قوسىلدى, دەپ حابارلايدى قر وقۋ-اعارتۋ مينيسترلىگى.
ءبىلىم نىساندارىن ىسكە قوسۋ ناتيجەسىندە وڭىرلەردە 48 مىڭ جاڭا وقۋشى ورنى پايدالانۋعا بەرىلدى.
كوپشىلىگى ءىرى مەگاپوليستەردە جانە ولارعا جاقىن اگلومەراتسيالاردا ورنالاسقان.
«قور قازاقستاننىڭ ءبىلىم بەرۋ سالاسىنداعى جوبالاردى ىسكە اسىرۋ بويىنشا بەلسەندى جۇمىستى جالعاستىرىپ جاتىر. پرەزيدەنتتىڭ تاپسىرماسى بويىنشا قۇرىلعان قوردىڭ قىزمەتى مەكتەپتەر, ولارعا قوسىمشا قۇرىلىس نىساندارىن, ينتەرناتتار سالۋ, رەكونسترۋكتسيالاۋ ارقىلى ءۇش اۋىسىمدى, اپاتتى مەكتەپتەر مەن وقۋشى ورنىنىڭ جەتىسپەۋشىلىگىن جويۋعا باعىتتالعان. وسى جىلى 28 مىڭ وقۋشى ورنىنا ارنالعان تاعى 25 مەكتەپتى ىسكە قوسۋ جوسپارلانعان», – دەپ اتاپ ءوتتى ينفراقۇرىلىمدى دامىتۋ دەپارتامەنتى ديرەكتورىنىڭ م.ا. مارلەن قاسەنوۆ.
ەستەرىڭىزگە سالا كەتەيىك, وسى جىلدىڭ باسىندا ءبىلىم بەرۋ ينفراقۇرىلىمىن قولداۋ قورىنىڭ قاراجاتى ەسەبىنەن شامامەن 15 مىڭ ورىندىق تاعى 20 جاڭا مەكتەپ سالىناتىنى بەلگىلى بولدى.
ولار پايدالانۋعا 2025 جىلى بەرىلەدى دەپ كۇتىلىپ وتىر.
