ەلوردادا ۇلى وتان سوعىسى جىلدارى تۋرالى ەستەلىكتەردى ساقتاۋعا باعىتتالعان «جەڭىس لەنتاسى» اتتى پاتريوتتىق شارا ءجۇرىپ جاتىر. كوك اسپان تۇستەس 100 مىڭنان اسا لەنتالار 7-9 مامىر كۇندەرى قالا تۇرعىندارى مەن قوناقتارىنا تەگىن تاراتىلادى. مۇنداي سيمۆولداردى «بايتەرەك» مونۋمەنتىنىڭ الدىنداعى الاڭنان, «حان شاتىر» ساۋدا, ويىن-ساۋىق ورتالىعىنىڭ الدىنداعى عاشىقتار ساياباعىنان جانە ەسىلدىڭ وڭ جاعالاۋىنداعى ورتالىق امبەباپ دۇكەننىڭ الدىنداعى الاڭنان الۋعا بولادى. ۇيىمداستىرۋشىلار 9 مامىرعا ارنالعان بارلىق ءىس-شارالاردا وسىنداي لەنتانىڭ تاراتىلاتىنىن حابارلادى.
كوك بايراعىمىزدىڭ تۇسىمەن سايكەس كەلەتىن جەڭىس لەنتاسى جەڭىس كۇنىن تويلاۋ سيمۆولىنىڭ قازاقشا نۇسقاسىن قالىپتاستىرۋ ءۇشىن ەنگىزىلگەنى ءمالىم. 2015 جىلدان باستاپ جەڭىس لەنتاسى جاڭارعان ديزاينمەن جاسالاتىن بولدى. جىبەك ماتادان تىگىلگەن لەنتانىڭ ۇزىندىعى – 30 سانتيمەتر, ەنى – 3 سانتيمەتر. ول التىن ءتۇستى ۇلتتىق ويۋلارمەن ورنەكتەلگەن. بىراق وندا بەس جۇلدىز, وراق پەن بالعا ساقتالدى.
وسىدان 4-5 جىل بۇرىن ەلىمىزدە گەورگيەۆ لەنتاسىنىڭ قولدانىلىپ كەلگەنى راس. الايدا قوعامدا وعان قاتىستى داۋ-داماي ءورشىپ كەتتى. ءبىر كەزدەرى وسكەمەن قالاسىنىڭ اكىمدىگى گەورگيەۆ لەنتاسىنا ۇقساس لەنتالار شىعارىپ, داۋدىڭ وتىنا ماي قۇيعانداي بولدى. كەيبىر بەلسەندىلەر «رەسەي يمپەرياسى مەن كەڭەستىك اسكەردىڭ سيمۆولى بولعان» اۋليە گەورگي لەنتاسىنىڭ ورنىنا كوك ءتۇستى لەنتا تاعىپ شىعۋدى ۇسىنعان. گەورگي لەنتاسىنا قارسىلار بۇرىن بۇل لەنتا «رەسەيدە وتارلاۋ ىسىنە ەڭبەگى سىڭگەندەرگە بەرىلگەندىكتەن» قازاقستاندا ونى تاعۋدىڭ ءجونى جوق دەگەن پىكىر ءبىلدىردى.
ايتپاقشى, بىزگە دەيىن بۇرىنعى وداقتاستارىمىز – ۋكرايندار مەن بەلارۋستار دا گەورگي لەنتاسىنان ءبىرجولا باس تارتتى. ۋكراينا ۇلى جەڭىستىڭ 70 جىلدىعىن تويلاۋدىڭ قارساڭىندا قىزىل كوكناردى ۇلى وتان سوعىسىنداعى جەڭىمپاز-ەلدىڭ سيمۆولى ەتىپ تاڭدادى. قازىر ۋكراينا 8 مامىردى ۇلى وتان سوعىسىندا قازا تاپقانداردى ەسكە الۋ كۇنى, ال 9 مامىردى سوعىستا ءتىرى قالعانداردى قادىرلەۋ كۇنى رەتىندە اتاپ وتەدى. بەلارۋس ەلى جەڭىستىڭ سيمۆولى ەتىپ مەملەكەتتىك تۋمەن تۇستەس قىزىل-جاسىل لەنتانى بەكىتتى. سونداي-اق, بۇل لەنتا فاشيستىك گەرمانيا تىزە بۇككەن مامىر ايىن بىلدىرەتىن الما گۇلىمەن بەزەندىرىلگەن.
