جەڭىسكە باستاعان 25 جىل
«ەلىڭنىڭ ۇلى بولساڭ, ەلىڭە جانىڭ اشىسا, ازاماتتىق نامىسىڭ بولسا, قازاقتىڭ ۇلتتىق جالعىز مەملەكەتىنىڭ نىعايىپ-كوركەيۋى جولىندا جان تەرىڭدى سىعىپ ءجۇرىپ ەڭبەك ەت. جەردىڭ دە, ەلدىڭ دە يەسى ءوزىڭ ەكەنىڭدى ۇمىتپا!».
ءبىر قالامنىڭ ۇشىمەن جازىلىپ, بارشا قاۋىمنىڭ جۇرەگىنە ورناعان, ءبىر اۋىزدان ايتىلىپ, كەڭ ولكەمدى شارلاعان ەلباسىنىڭ وسىناۋ ءبىر ءسوزى قاي ۋاقىتتا دا قان تامىرىمىزدىڭ بۇلكىلىندەي ەستىلەدى بىزگە. ءيا, بۇل – بۇكىل قازاق جۇرتىنىڭ, ءدۇيىم ەلدىڭ قىزۋ قۇشتارلىقپەن, سارقىلماس سۇيىسپەنشىلىكپەن ايتار, ارداق تۇتار اسىل لەبىزى. ەلدىك تۋىمىز تىگىلگەن ءۇلكەن ءۇيىمىز, التىن شاڭىراعىمىز دا وسىندا. جاراستىعىمىزدىڭ دا, جاقسىلىعىمىزدىڭ دا, تىنىشتىعىمىزدىڭ دا قياسى, ماحابباتىمىزدىڭ ۇياسى دا – قازاقستان.
2016 جىل – قازاقستان رەسپۋبليكاسىنىڭ ءوز تاۋەلسىزدىگىن جاريالاعانىنا 25 جىل تولاتىن, ەل ومىرىندەگى ايشىقتى جىل. وسى وتكەن شيرەك عاسىر ۋاقىت – تاريحي دامۋدىڭ ۇلكەن ساتىسىنان وتكەن قازاقستاندىقتار تاۋەلسىز ەلىمىزدىڭ تۇڭعىش پرەزيدەنتى, ۇلت كوشباسشىسى نۇرسۇلتان نازارباەۆتىڭ باسشىلىعىمەن الەۋەتتى دە وركەنيەتتى مەملەكەت قۇرۋ جولىندا بىلەك بىرىكتىرە ەڭبەك ەتكەن كەزەڭ. حالقىنىڭ مىزعىماس تۇتاستىعى مەن رۋحىنىڭ مىقتىلىعى ارقاسىندا ادام سەنگىسىز جوعارى ەكونوميكالىق دامۋ مەن ازاماتتىق كەلىسىمگە قول جەتكىزگەن ەلىمىز مەملەكەتتىك قۇرىلىستىڭ ساپالى جاڭا كەزەڭىنە قادام باستى. بولاشاقتىڭ باعدارىن بەلگىلەگەن باسىم باعىتتار مەملەكەت باسشىسى ۇسىنعان بەس ينستيتۋتسيونالدىق رەفورمادا ايقىن كورىنىس تاپتى. ال الەمنىڭ بارىنشا دامىعان 30 ەلىنىڭ قاتارىنا ەنۋ ءۇشىن بىرىڭعاي بولاشاق ۇلت قالىپتاستىرۋدى كوزدەگەن جالپىۇلتتىق «ماڭگىلىك ەل» پاتريوتتىق يدەياسى ۇلت جوسپارىنىڭ نەگىزى بولىپ قالاندى.
وسىناۋ مەملەكەت پەن قوعامدا ورىن الىپ وتىرعان بارلىق ساياسي-ەكونوميكالىق, الەۋمەتتىك رەفورمالاردىڭ ءبارى 1995 جىلى قابىلدانعان نەگىزگى زاڭ – قازاقستان رەسپۋبليكاسى كونستيتۋتسياسىنىڭ قاعيدالارى نەگىزىندە جۇزەگە اسىپ جاتتى. تۇتاستاي العاندا, تاۋەلسىزدىك جىلدارىندا ەلدىڭ زاڭ شىعارۋشى ورگانى 2000-نان اسا زاڭ قابىلدادى, ونىڭ 90 پايىزدان استامىن قازىرگى قوس پالاتالى پارلامەنت قابىلدادى. قابىلدانعان زاڭدار مەملەكەتىمىزدىڭ تۇراقتى جانە ورنىقتى دامۋىنىڭ بەرىك قۇقىقتىق تۇعىرناماسىنا اينالدى.
ەل ەگەمەندىگىن العان ساتتەن باستاپ مەملەكەت دامۋىنا باعىتتالعان رەفورمالاردىڭ ءوز دەڭگەيىندە ءجۇزەگە اسىرىلۋىن ءجىتى قاداعالاپ, زاڭدىق نەگىزدەرىن باقىلاۋدا ۇستاعان, تاۋەلسىزدىكتىڭ باستى جەتىستىگى جانە بەرىك ىرگەتاسى – ىشكى تۇراقتىلىقتى كوزدىڭ قاراشىعىنداي ساقتاپ, جاس مەملەكەتىمىزدىڭ اياعىنان نىق تۇرۋىنا, الەمنىڭ الپاۋىت ەلدەرىمەن تەرەزە تەڭەستىرۋىنە تاۋەلسىزدىكپەن بىرگە قايتا قۇرىلعان سوتتىڭ دا قوسقان ۇلەسى ۇلان-عايىر. تاۋەلسىزدىكتىڭ ارقاسىندا قوعامدىق-ساياسي ومىردە, ەكونوميكادا تۇبەگەيلى رەفورمالار جاسالدى.
1991 جىلى قابىلدانعان «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭ جاڭا دەربەس مەملەكەتتىڭ قالىپتاسۋىنا جول اشتى. الەۋمەتتىك باعدارلانعان دەموكراتيالىق جانە قۇقىقتىق مەملەكەت قۇرۋعا باعىتتالعان جوسپارلى ساياسي, ەكونوميكالىق جانە باسقا دا قايتا قۇرۋلار قوعامنىڭ زاڭدىق سالاسىن رەفورمالاۋ قاجەتتىلىگىنە الىپ كەلدى. ەلدە ورىن العان وزگەرىستەر قوعامنىڭ ەڭ باستى قۇندىلىعى رەتىندە ادامدى, ادام ءومىرىن الدىڭعى قاتارعا شىعاردى.
بۇگىندە ازاماتتاردىڭ كونستيتۋتسيالىق قۇقىقتارى مەن بوستاندىقتارىن قورعاۋ, مەملەكەتتىك-قۇقىقتىق قۇرىلىمداردىڭ تۇراقتى جۇمىس ىستەۋى ءۇشىن قاجەتتى جاعدايلاردى قۇرۋ, ىشكى ساياسي تۇراقتىلىق پەن قوعام بىرلىگىن ساقتاۋ ماسەلەلەرى ەرەكشە مانگە يە.
س.جۇماعاليەۆ,
اقمولا گارنيزونى اسكەري سوتىنىڭ جەتەكشى مامانى