وتكەن سەنبىدە فۋتبولدان قازاقستان چەمپيوناتى باستالدى. ۇلتتىق بىرىنشىلىكتىڭ العاشقى تۋرىندا التى ويىن ءوتتى.
ەل چەمپيونى «استانا» ءبىرىنشى ويىندا قاراعاندىلىق «شاحتەر» كومانداسىمەن كەزدەستى. وسى كۇنى «استانا ارەنا» ستاديونىنا جينالعان 5 مىڭ جانكۇيەردىڭ ءۇمىتى اقتالدى دەۋگە بولادى. ولار شىن مانىندە وتە تارتىستى ويىنعا كوز جەتكىزدى.
ويىندى ەكى جاق تا سابىرلى باستاعان سياقتى ەدى. بىردەن تۇرا ۇمتىلىپ شابۋىلعا شىعا قويمادى. دەگەنمەن, قاراعاندىلىقتاردىڭ «استانا» قاقپاسىنا قاراي ۇيىمداستىرعان ءبىرىنشى ۇمتىلىسى ناتيجەلى بولىپ كەتتى. ايىپ الاڭىنىڭ ورتا تۇسىندا دوپ كۇتىپ تۇرعان كورنەليۋس ۋببينك شيراقتىق تانىتتى. ارىپتەسىنەن جەتكەن ادەمى پاستى تەز يگەرگەن شابۋىلشى ءاپ-ساتتە الا دوپتى الاڭ يەلەرىنىڭ قاقپاسىنا تۋلاتىپ ءتۇسىردى. وسىلايشا «شاحتەر» ەسەپ اشىپ, كەنشىلەر قالاسىنان كەلگەن جۇزدەگەن جانكۇيەردى قۋانىشقا بولەپ تاستادى.
ويىننىڭ سەگىزىنشى مينۋتىندا وسىنداي جاعداي بولاتىنىن كۇتپەگەن «استانا» فۋتبولشىلارى ەندى وزگەرىپ سالا بەردى. دۇركىن-دۇركىن شابۋىلدى باستادى. كوماندا كاپيتانى تاڭات نوسەرباەۆ ءبىرىنشى تايمنىڭ ورتاسىندا قوناقتاردىڭ ەكى بىردەي قورعاۋشىسىن الداپ ءوتىپ, نەمانيا ماكسيموۆيچكە ادەمى پاس شىعارىپ بەرگەن ەدى. الايدا, سەربيالىق لەگيونەردىڭ باسپەن سوققان دوبىن «شاحتەر» قاقپاشىسى تكاچۋك قاعىپ الدى. الاڭ يەلەرىنىڭ شابۋىلىن جالعاستىرا ءتۇستى. تۆۋماسيدەن دوپ العان نوسەرباەۆ تاعى دا العا ۇمتىلىپ, دوپتى ايىپ الاڭىنا جەتكىزدى. بۇل جەردە دجورجە دەسپوتوۆيچ دوپتى قابىلداپ العانىمەن, سوققىسى قاقپادان ءسال قيسىق كەتتى.
قانشا شابۋىلداعانىمەن استانالىقتار ويىننىڭ ءبىرىنشى كەزەڭىندە قوناقتار قاقپاسىنىڭ قۇلپىن اشا المادى. ءسويتىپ, ۇزىلىسكە دەيىنگى ەسەپ 0:1 بولىپ, «شاحتەردىڭ» پايداسىندا قالدى.
ەكىنشى تايم باستالىسىمەن ستانيمير ستويلوۆ شاكىرتتەرى بىردەن العا ۇمتىلدى. سول قاناتتان العا شىققان دميتري شومكو الا دوپتى قوناقتاردىڭ ايىپ الاڭىنا قاراي شيىرلاتا ۇردى. بۇل پاستى ادەمى قابىلداپ العان ماكسيموۆيچ بىردەن قاقپاعا قاراي اسىردى. وسى ساتتە بارىنەن بيىك سەكىرگەن دەسپوتوۆيچ باسپەن ۇرىپ, گول سوقتى. وسىلايشا ەكىنشى تايمنىڭ باسىندا ەسەپ تەڭەستى.
ارادا كوپ ۋاقىت وتپەي-اق, سول دەسپوتوۆيچ ەسەپتى ەسەلەۋگە شاق قالدى. ونىڭ سوققىسىن قوناقتار قاقپاشىسى ارەڭ دەگەندە بۇرىشتاماعا اسىرىپ ۇلگەردى. قالايدا العاشقى ويىندا جەڭىسكە جەتۋدى ويلاعان استانالىقتار شابۋىلدى توقتاتپادى. سونداي شابۋىلدىڭ بىرىندە تاڭات نوسەرباەۆ مەرگەندىگىمەن تانىلدى. ول «شاحتەر» قورعاۋشىسىنىڭ قاتەلىگىن ۇتىمدى پايدالانا ءبىلدى. وسىدان كەيىن ءتۆۋماسيدىڭ دە, دەسپوتوۆيچتىڭ تە ەسەپتى ەسەلەۋگە مۇمكىندىگى بولدى. الايدا, ويىن سوڭىنا دەيىن وسى ەسەپ وزگەرمەي قالدى. ايتپاقشى, وسى ويىننىڭ بارىسىندا «استانا» كومانداسىندا ايتارلىقتاي رەكورد تىركەلدى. ماتچ سوڭىندا ويىنعا قوسىلعان ءمادي جاقىپباەۆ كلۋب قۇرامىندا ويىنعا كىرىسكەن ەڭ جاس ويىنشى بولدى. ول ويىنعا قوسىلعاندا تۋعانىنا 15 جاس 11 اي 21 كۇن تولعان ەدى.
سونىمەن «استانا» جاڭا ماۋسىمنىڭ ءبىرىنشى ويىنىندا 2:1 ەسەبىمەن جەڭىسكە جەتتى. كەلەسى ويىندى «استانا» شىمكەنت قالاسىندا وتكىزەدى. «ورداباسى» – «استانا» ماتچى 20 ناۋرىزدا وتەدى.
پرەمەر-ليگانىڭ باسقا ويىندارىندا مىنانداي ناتيجەلەر تىركەلدى: «جەتىسۋ» (تالدىقورعان) – «اتىراۋ» 1:1, «تاراز» – «قايرات» (الماتى) 2:1, «ورداباسى» (شىمكەنت) – «اقتوبە» 3:1, «توبىل» (قوستاناي) – «اقجايىق» (ورال) 1:0, «ەرتىس» (پاۆلودار) – «وقجەتپەس» (كوكشەتاۋ) 1:0.
