24 ناۋرىز كۇنى استاناداعى «Mega Silk Way» ساۋدا-ويىن-ساۋىق ورتالىعىندا «جەر ساعاتى» اتتى ەكولوگيالىق اكتسيا وتەدى. ورتالىق كوممۋنيكاتسيالار قىزمەتىنىڭ بريفينگىندە «جاسىل» ەكونوميكانى قولداۋ جانە G-Global-دى دامىتۋ كواليتسياسىنىڭ باسقارما ءتورايىمى سالتانات راقىمبەكوۆا وسىلاي دەپ مالىمدەدى.
ونىڭ ايتۋىنشا, اتالمىش اكتسياعا الەمدەگى 175-تەن استام ەلدىڭ شامامەن العاندا 7 مىڭ قالاسىندا تۇراتىن 2 ميللياردقا جۋىق ادام قاتىسادى. «جەر ساعاتىنىڭ» نەگىزگى ماقساتى – ەلەكتر ەنەرگياسىن ۇنەمدەۋ. ونىڭ بارىسىندا عيماراتتاردىڭ جارىعى, ەسكەرتكىشتەردىڭ جارىقتاندىرىلۋى مەن يلليۋميناتسيا, تۇرمىستىق تەحنيكا ءبىر ساعاتقا وشىرىلەدى. سونداي-اق, بۇل اكتسيا ەكولوگيالىق جۇيەلەردى ساقتاۋدىڭ وزەكتى ماسەلەلەرىنە, ەڭ الدىمەن جاھاندىق كليماتتىڭ وزگەرۋىنە كوڭىل اۋدارتۋ ءۇشىن ۇيىمداستىرىلادى.
جالپى, بيىل ەلىمىزدە ەنەرگيا تيىمدىلىگى تەحنولوگياسىن دامىتۋ ماقساتىندا ەكولوگيالىق فەستيۆال وتەدى. 30 ناۋرىز كۇنى استانانىڭ
20 جىلدىعى اياسىندا «حان شاتىردان» باستالاتىن شاراعا 4 مىڭعا جۋىق ادام قاتىسپاق. ال قازاقستان بويىنشا وعان ەلىمىزدىڭ 16 قالاسىنان 30 مىڭنان استام ادامدى تارتۋ كوزدەلۋدە.
ال 15 قىركۇيەك كۇنى قوقىستان تازارتۋ بويىنشا كەشەندى شارالاردى ۇيىمداستىرۋ ماقساتىندا ەلىمىزدە العاش رەت «World Cleanup day-2018» دۇنيەجۇزىلىك اكتسياسى وتپەك.
